ކުށް ބަޔާންކުރާ ޤާނޫނުތައް ގިނަވުން، ޕީޖީއަށް ގޮންޖެހުމަކަށް!
މައްސަލަ ބަލަން ޖެހޭ މުއްދަތު އޮންނަ ގޮތުން ދިމަވާ ގޮންޖެހުންތައް އެބަހުރި
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނީ
ކުށް ބަޔާން ކުރާ ޤާނޫނުތައް ގިނަވުމުން މައްސަލަތައް ކުރިއަށް ގެންދިއުމަށް ދަތިވާ ކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި ވާހަކަދައްކަވަމުން ޝަމީމް ވަނީ މައްސަލަތައް ކުރިއަށް ގެންދިއުމަށާއި އަވަސްކުރުމަށް ޕީޖީ އޮފީހަށް ދިމާވާ ދަތިތަކުގެ ތަފްސީލް ހިއްސާކުރައްވާފައެވެ. އެގޮތުން ކުށް ބަޔާން ކުރާ މާއްދާގެ ތަފާތު ޤާނޫނުތައް ހުރުމުގެ ސަބަބުން މައްސަލަތައް ކުރިއަށްގެންދާނީ ކޮން ޤާނޫނެއްގެ ދަށުންކަން ދެނެގަތުމަށް ދަތިތަކާއި ދިމާވާ ކަމަށް ޝަމީމް ވިދާޅުވިއެވެ. އެހެންކަމުން ބޮޑެތި ޖިނާއީ ކުށްތައް ފިޔަވައި އެހެން ކުށްތައް ޤާނޫނުލް އުޤޫބާތުގެ ދަށުން ބަޔާންކުރާ ގޮތަށް ހަމަޖައްސާދިނުމަށް އެޓަރނީ ޖެނެރަލް އަށް ދަންނަވާފައިވާ ކަަމަށާއި، އެކަމާއި ގުޅޭ މައްސަލައެއް މަޖިލީހަށް ވެސް ހުށަހަޅުއްވާފައިވާނެ ކަމަށް އޭނާ ވިދާޅުވިއެވެ.
މީގެ އުތުރުން މައްސަލަތައް ބަަލަންޖެހޭ މުއްދަތު މިހާރު ކަނޑައަޅާފައި އޮންނަ ގޮތުން މައްސަލަތައް ބަލާ މުއްދަތު އެކި ގޮތްގޮތަށް މާނަކުރުމުގެ ފުރުސަތު އޮތް ކަމަށާއި އެއީ ވެސް ޕީޖީ އަށް ދިމާވާ ބޮޑު ގޮންޖެހުމެއް ކަމަށް ޝަމީމް ވިދާޅުވިއެވެ. ޝަމީމް ވަނީ މައްސަލަތައް އަވަސްކުރުމަށް ދިމާވާ ގޮންޖެހުންތަކަށް އަލިއަޅުވާލައްވާފައެވެ. އަދި މައްސަލަަތައް އަވަސް ކުރުމަށް އިދާރާތަކާއި އެކުގައި ކުރަމުންދާ މަސައްކަތްތައް ވެސް ޝަމީމް ވަނީ ތަފްސީލްކޮށްދެއްވާފައެވެ. އެގޮތުން ފުލުހުންނާއި އެކުގައި މަސައްކަތްތަކެއްކޮށް މައްސަލަތައް އަވަސް ކުރަން މަޝްވަރާކުރަމުންދާ ކަމަށް ޕީޖީ ވިދާޅުވިއެވެ.
