ބިލެއްފަހި، ކަނޑިތީމު، ގޮއިދޫ އަދި ނޫމަރާ ސްކޫލްގައި ހިންގާ ޕްރޮޖެކްޓްތަކުގެ އަޕްޑޭޓް 4 މަސް ފަހުން މިނިސްޓަރު ދެއްވައިފި
ބިލެއްފަހި ސްކޫލްގެ މަލްޓްޕަރޕަސް ހޯލުގެ ބިޑް ނެގި އިވެލުއޭޝަންގެ މަސައްކަތް ވަނީ ނިމިފަ
ކަނޑިތީމު ދާއިރާގެ މެންބަރު ޢަބްދުﷲ ޝަހީމް ޢަބްދުލްޙަކީމް އަދި މިނިސްޓަރ އޮފް އެޑިއުކޭޝަން ޑރ. އައިޝަތު އަލީ
ށ. ބިލެއްފަހި، ކަނޑިތީމު، ގޮއިދޫ އަދި ނޫމަރާ ސްކޫލްގައި ހިންގާ ޕްރޮޖެކްޓްތަކުގެ މައުލޫމާތު ހޯދުމަށް ކަނޑިތީމު ދާއިރާގެ މެންބަރު ޢަބްދުﷲ ޝަހީމް ޢަބްދުލްޙަކީމް، މިނިސްޓަރ އޮފް އެޑިއުކޭޝަން ޑރ. އައިޝަތު އަލީއާއި ކުރެއްވި ސުވާލުގެ ޖަވާބު ލިޔުމުން އަންގާރަ ދުވަހު ދެއްވައިފިއެވެ.
25 އެޕްރީލް 2022 ގައި ކަނޑިތީމު ދާއިރާގެ މެންބަރު ޝަހީމް، ލިޔުމުން ޖަވާބު ހޯއްދެވުމަށް ކުރެއްވި ސުވާލަކީ ށ. ބިލެއްފަހި، ށ. ކަނޑިތީމު އަދި ށ. ގޮއިދޫ، މި ތިން ރަށުގެ މަލްޓިޕަރޕަސް ހޯލުގެ އަމަލީ މަސައްކަތް ނުފެށި ދިގުލައިގެންދާ ސަބަބަކީ ކޮބައިތޯއާއި އަދި ށ. ނޫމަރާ ސްކޫލްގެ އިތުރު ކްލާސްރޫމްތަކުގެ މަސައްކަތް ނުފެށި ލަސްވާ ސަބަބަކީ ކޮބައިތޯއެވެ.
އަންގާރަ ދުވަހުގެ ޖަލްސާގައި މެންބަރުގެ ސުވާލަށް މިނިސްޓަރު ލިޔުމުން ފޮނުއްވި ޖަވާބު އަމީން އާންމު ވަނީ އިއްވައިދެއްވާފައެވެ. މި ޖަވާބުގައި ވަނީ ށ. ބިލެއްފަހި ސްކޫލްގެ މަލްޓްޕަރޕަސް ހޯލު އިމާރާތުގެ މަސައްކަތް ކުރުމަށް ޓެންޑަރ ބޯޑަށް 19 ޑިސެމްބަރު 2021 ގައި ފޮނުވި 17 ޖެނުއަރީ 2022 ގައި އިއުލާންކުރެވި އިވެލުއޭޝަންގައި އެއްވެސް ފަރާތަކުން ޝަރުތު ފުރިހަމަވެފައި ނުވާތީ ދެވަނަ ފަހަރަށް 31 މާޗް 2022 ގައި އިއުލާންކުރެވި 26 އެޕްރީލް 2022 ގައި ބިޑް ނެގި އިވެލުއޭޝަންގެ މަސައްކަތް ވަނީ ނިމިފައެވެ. އަދި މި ހަފްތާގައި ޓެންޑަރ ބޯޑަށް ހުށަހެޅޭނެކަމަށެވެ.
ކަނޑިތީމުގައި ހުންނަ ށ. އަތޮޅު މަދުރަސާ މަލްޓިޕަރޕަސް ހޯލު އިމާރާތުގެ މަސައްކަތް ކުރުމަށް ފުރަތަމަ ފަހަރަށް އިއުލާންކުރެވި އިވެލުއޭޝަންގައި އެއްވެސް ފަރާތަކުން ޝަރުތު ފުރިހަމަ ނުވާތި ދެވަނަ ފަހަރަށް 21 މާޗް 2022 ގައި އިއުލާންކޮށްގެން ވެސް އެއްވެސްފަރާތަކުން ޝަރުތުފުރިހަމަވެފައި ނުވާތީ ސިންގަލް ސޯސްގެ ދަށުން ކުރިއަށް ގެންދިއުމަށް 1 ޖޫން 2022 ގައި ޕްރޮޕޯސަލްއަށް ހުޅުވާލެވި 5 ޖޫން 2022 ގައި ޕްރޮޕޯސަލްތައް ނެގި މިހާރު ކުރިއަށް ދަނީ އިވެލުއޭޝަންގެ މަސައްކަތް ކަމަށް މިނިސްޓަރު ވަނީ ވިދާޅުވެފައެވެ.
އަދި ށ. ގޮއިދޫ 8 ކްލާސްރޫމުގެ މަސައްކަތް އިއުލާން ކުރުމަށް ޓެންޑަރ ބޯޑަށް 19 ޑިސެމްބަރ 2021 ގައި ފޮނުވި 23 ޑިސެމްބަރ 2021 ގައި އިއުލާންކުރެވި އިވެލުއޭޝަންގައި އެއްވެސް ފަރާތަކުން ޝަރުތު ފުރިހަމަވެފައި ނުވާތީ ދެވަނަ ފަހަރަށް 21 ފެބްރުއަރީ 2022 ގައި އިއުލާންކުރެވި 8 މާޗް 2022 ގައި ބިޑް ނެގި އިވެއުލޭޝަން ނިމި ފިނޭންސް މިނިސްޓްރީގެ ކޮމިޓީއަށް ވަނީ ހުށަހެޅިފައި ކަމަށް މިނިސްޓަރ ވިދާޅުވިއެވެ. އަދި މިހަފްތާ ތެރޭގައި ބޯޑުން ނިންމާނެކަމަށް ޓެންޑަރ ބޯޑުން ދަންނަވާފައިވާ ކަމަށްވެސް މިނިސްޓަރު ވިދާޅުވިއެވެ.
މީގެ އިތުރުން ށ. ނޫމަރާ 4 ކްލާސް ރޫމްގެ މަސައްކަތް 22 ނޮވެމްބަރ 2021 ގައި އިއުލާންކުރެވި އިވެލުއޭޝަންގައި އެއްވެސް ފަރާތެއް ޝަރުތު ފުރިހަމަވެފައި ނުވާތީ 16 ފެބްރުއަރީ 2022 ގައި ދެވަނަ ފަހަރަށް އިއުލާންކުރެވި، 2 މާޗް 2022 ގައި ބިޑް ނެގި އިވެލުއޭޝަން ނިމި 21 އެޕްރީލް 2022 ގައިވަނީ ނެކްސްޓާ މޯލްޑިވްސް ޕްރައިވެޓް ލިމިޓެޑަށް ވަނީ އެވޯޑްކުރެވިފައެވެ. އަދި 10 މެއި 2022 ގައި މި އިމާރާތުގެ މަސައްކަތް 4 މިލިއަނަށްވުރެ ގިނަ ރުފިޔާއަށް 190 ދުވަހުގެ ތެރޭގައި ނިންމުމަށް ވަނީ ސޮއިކުރެވިފައެވެ. އަދި 17 ޖޫން 2022 ގައި ބިން ހަވާލުކުރެވި ވަނީ އަމަލީ މަސައްކަތް ފެށިފައި ކަމަށް މިނިސްޓަރު ވިދާޅުވިއެވެ.
