ޔޫރަޕްގެ ޗެމްޕިއަން ރެއާލް މެޑްރިޑް ދޫކޮށް, ޗެމްޕިއަންސްލީގުގައި ކުޅުމުގެ ފުރުސަތު ނެތް މެންޗެސްޓަރ ޔުނައިޓެޑަށް ބަދަލުވަނީ ފައިސާގެ ދަހިވެތިކަމުގައި ނޫންކަމަށް ބްރެޒިލްގެ މިޑްފީލްޑަރ ކަސެމީރޯ ބުނެފިއެވެ.

ރެއާލް މެޑްރިޑާއެކު ފަސް ފަހަރު ޗެމްޕިއަންސްލީގު ކާމިޔާބުކުރި މިޑްފީލްޑަރ މެންޗެސްޓަރ ޔުނައިޓެޑަށް ބަދަލުވަނީ ހަތަރު އަހަރުގެ އެއްބަސްވުމެއްގެ ދަށުންނެވެ. 30 އަހަރުގެ މިޑްފީލްޑަރ ހިމެނެނީ އެކްލަބްގެ އެންމެ ބޮޑު މުސާރަ ލިބޭ ކުޅުންތެރިންގެ ތެރޭގައެވެ. މެންޗެސްޓަރ ޔުނައިޓެޑުން ވަނީ ކަސެމީރޯ ހޯދުމަށް ރެއާލްއަށް 70 މިލިއަަން ޕައުންޑް ދީފައެވެ. ކަސެމީރޯ ބުނީ ނުވަ އަހަރު ރެއާލް މެޑްރިޑްގައި ހޭދަކުރުމަށްފަހު ބަދަލުވަނީ ދުނިޔޭގެ އެންމެ ބޮޑު ކްލަބަށްކަމަށެވެ. ކަސެމީރޯ ބުނީ އޭނާ ކްލަބް ބަދަލުކުރަނީ ފައިސާއަށްޓަކައި ކަމަށް ބުނާ މީހުންގެ ގަބޫލުކުރުން ގޯސްކަމަށާއި, ފައިސާއަށްޓަކައި ކްލަބް ބަދަލުކުރާނަމަ މީގެ ތިން ހަތަރު އަހަރު ކުރިން އެނިންމުން އޮންނާނީ ނިންމާފައިކަމަށެވެ.

ކަސެމީރޯ ބުނީ ރެއާލްއިން އޭނާއާމެދު ކަންތައްކުރީ ވަރަށް ރަނގަޅަށް ކަމަށާއި, ކްލަބް ބަދަލުކުރުމަކީ އޭނާގެ އަމިއްލަ ނިންމުމެއްކަމަށެވެ. އޭނާ ބުނީ މިދިޔަ ސީޒަންގެ ޗެމްޕިއަންސް ލީގު ފައިނަލަށްފަހު އެޖެންޓާ ވާހަކަ ދެއްކިކަމަށެވެ. ކްލަބް ބަދަލުކުރަންވީ ވަގުތު ޖެހިއްޖެކަމުގެ އިހުސާސް އޭނާއަށް ކުރެވޭކަން އެޖެންޓްގެ ސަމާލުކަމަށް ގެނައިކަމަށް، ކަސެމީރޯއާ ހަވާލާދީ ބައިނަލްއަގުވާމީ މީޑިޔާތަކުން ވަނީ ރިޕޯރޓްކޮށްފައެވެ. ކަސެމީރޯ ޔުނައިޓެޑަށް ބަދަލުވާއިރު އޭނާއާއެކު ރެއާލްއަށް ކުޅުނު ދެ ކުޅުންތެރިން ޔުނައިޓެޑްގައި އެބަތިއްބެވެ. އެއީ ރޮނާލްޑޯއާއި ވެރާންއެވެ.

ކަސެމީރޯ ބުނީ ރެއާލްގައި އޭނާކުރި މަސައްކަތް ޔުނައިޓެޑްގައިވެސް ކޮށް, ޔުނައިޓެޑާއެކު ލީގު ހޯދަން ބޭނުންވާކަމަށެވެ. އޭނާ ހުރީ ފިޓްކޮށް ކަމަށާއި, ކްލަބް ބަދަލުކުރަން މިއީ އެންމެ ރަނގަޅު ވަގުތު ކަމަށްވެސް ކަސެމީރޯ ބުންޏެވެ. ރެއާލް މެޑްރިޑްގެ ރައީސް ޕެރޭޒް ވިދާޅުވީ ކަސެމީރޯގެ ނިންމުމަށް އިހުތިރާމް ކުރާކަމަށާއި, ކުޅުންތެރިޔާގެ ނިންމުން ނިންމުމުގެ ފުރުސަތު އޮންނަން ޖެހޭކަމަށެވެ. އެކަމަކު ކަސެމީރޯއަކީ ރެއާލްގެ އެމްބެސެޑަރެއްކަމަށާއި, ކޮންމެ ވަގުތަކުވެސް ރެއާލްގައި އޭނާއަށް ފުރުސަތު އޮންނާނެކަމަށް ޕެރޭޒް ވިދާޅުވިއެވެ.

ކަސެމީރޯ ވަނީ މިސީޒަންގައި ލީގުގައި ރެއާލް ކުޅުނު ފުރަތަމަ މެޗުގައި އަލްމީރިޔާއާ ދެކޮޅަށް ކުޅެފައެވެ. ރެއާލް ދޫކޮށްލަނީ ކްލަބަށް 336 މެޗު ކުޅެދީފައެވެ. ޗެމްޕިއަންސްލީގު ފަސް ފަހަރު, ލީގު ތިންފަހަރު ހޯދިއެވެ. ބްރެޒިލްގެ ސައުޕޯލޯއިން ކަސެމީރޯ ރެއާލްއާ ގުޅުނީ 2013 ވަނަ އަހަރުއެވެ.