މެންބަރުކަން ކޮށްފައިވާ މީހަކަށް ލިބޭ މާލީ އިނާޔާތްތައް އުނިކުރުމަށް ގާނޫނަށް އިސްލާހު ހުށަހަޅައިފި
22 އޯގަސްޓު 2022 | ހޯމަ 08:35މެމްބަރުކަން ކޮށްފައިވާ ފަރާތްތަކަށް ލިބޭ މާލީ އިނާޔަތުގެ އިތުރުން ބައެއް އިތުރު އިނާޔަތްތައްވެސް އުނިކުރަން ވަނީ ހުށަހަޅާފައި
ވިލިމާލެ ދާއިރާގެ މެމްބަރު އަހުމަދު އުޝާމް
ރައްޔިތުންގެ މަޖިލީޖހުގެ މެމްބަރުކަން ކޮށްފައިވާ މީހަކަށް ލިބޭ މާލީ އިނާޔާތްތަކަށް ބަދަލު ގެންނަން، ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް އިސްލާހު ހުށަހަޅައިފިއެވެ.
މި ބިލު ރައްޔިތުންގެ މަޖިލީހަށް ހުށަހެޅުއްވީ ވިލިމާލެ ދާއިރާގެ މެންބަރު އަހުމަދު އުޝާމެވެ. ބިލު ހުށަހެޅުއްވި ސަބަބެއްގެ ގޮތުގައި މެމްބަރު އުޝާމު ވިދާޅުވެފައިވަނީ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނުގައި ރައްޔިތުންގެ މަޖިލީހުގެ 1 ނުވަތަ 2 ދައުރު މެމްބަރުކަން ކޮށްފައިވާ މީހަކަށް ހިދުމަތުގެ އިނާޔަތުގެ ގޮތުގައި ދައުލަތުގެ ފަރާތުން އިނާޔަތްތަކެއް ކަނޑައަޅާފައިވާ އިރު، ދައުލަތަށް އެތަކެއް އަހަރު ހިދުމަތްކޮށްފައިވާ ފަރާތަކަށް ލިބޭ އިނާޔަތްތަކާއި ނުބައްދަލު އިނާޔަތްތަކެއް ފަސް އަހަރުގެ ދައުރެއް ފުރިހަމަ ކުރާ މީހަކަށް ދިނުމަކީ އިންސާފުވެރިކަމަކަށް ނުވާ ކަމަށެވެ.
އަދި މިކަން ބަދަލުކުރުމަށް ދިވެހިރާއްޖޭގެ ވަރަށް ގިނަ އަދަދެއްގެ ރައްޔިތުން ގޮލާމުންދާތީ، ރައްޔިތުންގެ މަޖިލީހަކީ ރައްޔިތުންގެ އިހްސާސްތަކާއި އެއްގޮތަށް ކަންކަން ނިންމަންޖެހޭ މަޖިލީހެއްކަމަށް މޯލްޑިވްސް ނެޝަނަލް ޕާޓީން ދެކޭތީ، ރައްޔިތުންގެ މަޖިލީހުގެ މެމްބަރުކަން ކޮށްފައިވާ ފަރާތަކަށް ލިބޭ ހިދުމަތާ ނުބައްދަލު އިނާޔަތްތައް އުނިކުރުމަށް ގާނޫނަށް އިސްލާހު ގެނައުން ކަމަށެވެ.
މި ގާނޫނުގެ 8 ވަނަ މާއްދާ އުނިކުރުމަށް އުޝާމް ވަނީ ހުށަހަޅުއްވާފައެވެ. ހިދުމަތުގެ އިނާޔަތް އަރިމަތީ ސުރުހީގެ ދަށުން ހިމަނާފައިވާ މި މާއްދާގައި ބުނެފައިވަނީ ރައްޔިތުންގެ މަޖިލީހުގެ ރައްޔިތުންގެ މަޖިލީހުގެ 1 ދައުރު މެމްބަރުކަން ކުރައްފައިވާ މީހަކަށް، މާލީ ޢިނާޔަތެއްގެ ގޮތުގައި ރައްޔިތުންގެ މަޖިލީހުގެ މެމްބަރުކަމުގެ މަޤާމުގައި ހުންނަ މީހަކަށް އޮންނަ މުސާރައެއްގެ 30 އިންސައްތަ އަދި 2 ދައުރު މެމްބަރުކަން ކޮށްފައިވާ މީހަކަށް، މާލީ ޢިނާޔަތެއްގެ ގޮތުގައި ރައްޔިތުންގެ މަޖިލީހުގެ މެމްބަރުކަމުގެ މަޤާމުގައި ހުންނަ މީހަކަށް އޮންނަ މުސާރައެއްގެ 45 އިންސައްތަ ދައުލަތުން ދޭންވާނެ ކަމަށެވެ.
އަދި މި މާލީ އިނާޔަތްތައް ލިބޭނީ އެ މެމްބަރަކު މަޖިލީހުން ވަކިކުމަށްފަހު އުމުރުން 55 އަހަރުފުރުމަށްފަހުގައި ކަމަށެވެ. މީގެ އިތުރުން ދައުލަތުގެ އެއްވެސް އިސް ވަޒީފާއެއް އަދާކުރާނަމަ، އެ ވަޒީފާ އަދާކުރަމުންދާ މުއްދަތުގައި އިނާޔަތް ނުލިބޭނެ ކަމަށާއި، މާލީ ޢިނާޔަތް ލިބޭކަމުގައިވާނަމަ ދައުލަތުގެ އިތުރު ޕެންޝަނެއް ނުވަތަ މާލީ ޢިނާޔަތެއް ދައުލަތުން ނުލިބޭނެ ކަމަށެވެ.
މީގެ އިތުރުން ރައްޔިތުންގެ މަޖިލީހުގެ މެމްބަރުކަން ކޮށްފައިވާ ކޮންމެ މީހަކަށް ރައްޔިތުންގެ މަޖިލީހުގެ މެމްބަރުންނަށް އޮންނަ ފަދަ ހެލްތު އިންޝުއަރަންސް ސްކީމެއްގެ ދަށުން ބޭސްފަރުވާ ކޮށްދޭންވާނެ ކަމަށެވެ. އަދި ރައްޔިތުންގެ މަޖިލީހުގެ މެމްބަރުކަން ކޮށްފައިވާ ކޮންމެ މީހަކަށް އޮފިޝަލް ޕާސްޕޯޓް ލިބޭނެ އިންތިޒާމު ހަމަޖައްސައިދޭންވާނެ ކަމަށް ވެސް ގާނޫނުގައި ބުނެފައިވެއެވެ.
މެމްބަރު އުޝާމް ހުށަހެޅުއްވީ މި އިނާޔަތްތައް އުވާލުމަށެވެ. ހޯމަ ދުވަހުގެ ޖަލްސައަށް މި ބިލުގެ ފުރަތަމަ ކިޔުން ވަނީ އިއްވާފައެވެ.
