އިމްރާން ޚާންގެ މައްޗަށް ޓެރަރިޒަމްގެ ކުށުގެ ދައުވާ އުފުލައިފި

ޕާކިސްތާންގެ ކުރީގެ ބޮޑުވަޒީރު އިމްރާން ޚާންގެ މައްޗަށް ޕާކިސްތާން ފުލުހުން، ޓެރަރިޒަމް މަނާކުރާ ގާނޫނުގެ ދަށުން ދައުވާ އުފުލައިފި އެވެ. މިކަމާ ގުޅިގެން އިމްރާން ޚާންގެ ސަޕޯޓަރުންގެ އެތައް ހާސް ބަޔަކު ވަނީ އިސްލާމް އާބާދުގައި ހުންނަ އޭނާގެ ގެކޮޅު ކައިރިއަށް އެއްވާން ފަށާފައެވެ. އަދި އިމްރާން ޚާން ހައްޔަރުކޮށްފިނަމަ އެކަމުގެ ބަދަލު ހިފާނެ ކަމަށް އެމީހުން ދަނީ ގޮވަމުންނެވެ.

މިދިޔަ އެޕްރިލް މަހު މަގާމުން ދުރު ކުރެވުނު ފަހުން އިމްރާން ޚާން ގެންދަވަނީ ޕާކިސްތާނުގެ މިހާރުގެ ސަރުކާރަށާއި އަސްކަރިއްޔާއަށް ވަރަށް ބޮޑަށް ފާޑު ވިދާޅުވަމުންނެވެ. ފުލުހުން އިމްރާންގެ މައްޗަށް ދައުވާ އުފުލާފައިވަނީ އޭނާގެ ގާތް އެއިޑްއަކަށް ފުލުހުން ބިރުދައްކާ ޓޯޗަރކޮށްފައިވާ ކަމަށް ވިދާޅުވުމާއި ގުޅިގެންނެވެ. އިމްރާން ޚާންގެ މައްޗަށް އުފުލުނު ދައުވާގެ ކުރިން އެއިޑް ޝަޚްބާޒް ގިލް ހުރީ ގައުމުގައި ބިރުވެރިކަމާ ފަސާދަ އުފައްދަން އުޅޭ ކަމުގެ ތުހުމަތުގައި ހައްޔަރުކޮށްފައެވެ.

ހޮނިހިރު ދުވަހު ދެއްވި އާންމު ތަގުރީރެއްގައި އިމްރާން ޚާން ވަނީ އޭނާގެ އެއިޑް ހައްޔަރުކޮށް އޭނާއަށް އަނިޔާކޮށް ބިރުދައްކަމުން ދާކަމަށް ވިދާޅުވެ ޕޮލިސް ޗީފް އަދި އަންހެން ފަޑިޔާރަކު ކުށްވެރި ކުރައްވާ ވާހަކަ ދައްކަވާފައެވެ. އަދި އެމީހުންގެ ކިބައިން ބަދަލު ހިއްޕަވާނެ ކަމަށް ވަނީ ވިދާޅުވެފައެވެ.

އޮފިޝަލުން ވިދާޅުވާ ގޮތުގައި ދައުލަތުގެ އިސް ފަރާތްތަކަށް އެގޮތަށް އިންޒާރު ދެއްވާ އިމްރާން ޚާން ވާހަކަފުޅު ދެއްކެވުމަކީ އެންޓި ޓެރަރިޒަމް ގާނޫނާ ޚިލާފް އަމަލެކެވެ.

އިމްރާން ޚާންގެ ތަގުރީރުތަކުގައި ނަފްރަތު އުފެއްދެވުމަށް މަސައްކަތް ކުރައްވާ ކަމަށް ބުނެ، ޕާކިސްތާންގެ މީޑިޔާގެ ކަންތައްތައް ރެގިއުލޭޓް ކުރާ އިދާރާއިން މިހާރު ވަނީ އިމްރާން ޚާންގެ ތަގުރީރުތައް ލައިވްކޮށް ގެނެސްދޭ ޗެނެލްތައް ބަންދު ކުރާނެ ކަމަށް ވެސް އަންގާފައެވެ. މިކަމާ ގުޅިގެން އިމްރާން ޚާން ވިދާޅުވީ ސަރުކާރުން އޭނާގެ މައްޗަށް ސެންސަރުގެ އަމުރު ހިންގަން އުޅޭ ކަމަށާއި އޭނާގެ ސަޕޯޓަރުންނާ ހަމަޔަށް އޭނާގެ އަޑު ފޯރިޔަ ނުދޭން އުޅެނީ ކަމުގައެވެ.

ސަރުކާރުން އޭނާއަށް ޔޫޓިއުބްވެސް ބަންދު ކޮށްލި ކަމަށް އިމްރާން ޚާން ތުހުމަތު ކުރައްވާފައިވެއެވެ.

މިދިޔަ މަހު ޕަންޖާބްގައި ބޭއްވުނު ޕްރޮވިންޝަލް އެސެމްބްލީ އިންތިޚާބުގައި ވެރިކަން ކުރާ ޕާޓީ ބަލިކޮށް އިމްރާން ޚާންގެ ޕީޓީއައި ޕާޓީއަށް ވަނީ ވަރަށް ފުރިހަމަ ކާމިޔާބެއް ލިބިފައެވެ. އަދި ގިނަ ބަޔަކު ދުށް ގޮތުގައި އިމްރާން ޚާން ގޮވާލައްވާގޮތަށް ގައުމުގައި އަވަސް އިންތިޚާބެއް ބާއްވައިފި ނަމަވެސް، ނަތީޖާއަކަށް ވާނީ އިމްރާން ޚާން އިންތިޚާބް ކާމިޔާބު ކުރެއްވުމެވެ.

އިމްރާން ޚާން ޕާކިސްތާންގެ ބޮޑުވަޒީރު ކަމުގެ މަގާމަށް އިންތިޚާބުވެ ވަޑައިގެންނެވީ 2018 ގައެވެ. އޭނާގެ ދައުރު ނިމެން ގާތްވެފައި ވަނިކޮށް އެގައުމުގެ ބާރުގަދަ އަސްކަރިޔާ އޭނާއާއި ފެއަށް ޖެހުނެވެ. އެއަށް ފަހު ޕާޓީއިން މަޖިލިސް މެމްބަރުންތަކެއް ވެސް ވަކިވެފައިވަނިކޮށް، ނެގުނު އިތުބާރު ނެތް ކަމުގެ ވޯޓަކުން ބަލިވެވަޑައިގެން މަގާމުން ވަކިވާން ޖެހިވަޑައިގަތީއެވެ.