ލިވަޕޫލާ ދެކޮޅަށް ނުކުންނައިރު ޓެން ހާގް ހުރީ އިތުބާރާއެކު

އިނގިރޭސި ޕްރިމިއަރ ލީގުގައި ވަރުގަދަ ލިވަޕޫލާ ދެކޮޅަށް ނިކުންނައިރު، ޒިންމާތަކާމެދު އިތުބާރާއެކު ހުރި ކަމަށް މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގް ބުނެފިއެވެ.

އައު ސީޒަންގައި ލީގުގެ ތިން ވަނަ މެޗަށް ޔުނައިޓެޑް ނިކުންނައިރު، ފުރަތަމަ ދެ މެޗުން އެ ޓީމު ވަނީ ބަލިވެފައެވެ. ޕޮއިންޓެއް ނުލިބި މި ވަގުތު ޔުނައިޓެޑް އޮތީ ތާވަލްގެ 19 ވަނައިގައެވެ. އަމިއްލަ ދަނޑުގައި ލިވަޕޫލާ ދެކޮޅަށް ނިކުންނަ މެޗުގެ ކުރިން ޓެން ހާގް ވަނީ ޔުނައިޓެޑުގެ ރަން ދުވަސްްތަކަށް ޓީމު ގެންދެވޭނެ މީހަކީ އޭނާ ކަމަށް ވެސް ބުނެފައެވެ.

ޓެން ހާގް ބުނީ ޔުނައިޓެޑުގެ ކޯޗުކަމުގައި އޭނާ ހުރީ އަމިއްލަ ނަފްސަށް ކަމެއް ޙާސިލްކުރުމަށް ނޫން ކަމަށެވެ. އޭނާ ބުނީ ކުލަބުގައި ހުރީ މިހާރުގެ ހާލަތު ބަދަލުކުރުމުގެ ބޭނުމުގައި ކަމަށާއި، ޒިންމާތަކާ ހަވާލުވީއިރު ވެސް ޗެލެންޖަކަށް ވާނެ ކަން އިނގޭކަމަށެވެ. އޭނާ ބުނީ މަގާމާ ހަވާލުވީ ޗެލެންޖުތަކާ ކުރިމަތިލާން ކަމަށެވެ.

މީގެ އިތުރުން ޓެން ހާގް ބުނީ އޭނާގެ ކެރިއަރުގައި ކޮންމެ ކަމެއް ވެސް ފަށާއިރު އުނދަގޫ ހާލަތެެއް މެދުވެރިވާ ކަމަށެވެ. ނަމަވެސް ފަހުން އެކަންކަން ހާސިލްކުރެވޭކަން ފާހަގަކޮށް ޓެން ހާގް ބުނީ ޔުނައިޓެޑާއެކު ވެސް އެކަން ކުރެވޭނެ ކަމުގެ އިތުބާރު އޮތް ކަމަށެވެ. ޓެން ހާގް ބުނީ ޔުނައިޓެޑް މިހާރު އޮތް ހިސާބު އެނގޭ ކަމަށާއި، ބޭނުންވަނީ ލިވަޕޫލަށް ބަލާކަށް ނޫން ކަމަށެވެ. އޭގެ ބަދަލު ޓީމުގައި އޮތް ޕްލޭނަށް މަސައްކަތް ކުރަން ޖެހޭ ކަމަށް އޭނާ ބުންޏެވެ.

ލިވަޕޫލާ ދެކޮޅަށް ނިކުންނައިރު ޓީމުގައި ހުރި ކަންކަން ހައްލުކޮށް، ރަނގަޅު ނަތީޖާއެއް ނެރެވޭނެ ކަމަށް ޓެން ހާގް އުންމީދުކުރެއެވެ. ލިވަޕޫލާއި ޔުނައިޓެޑު ބައްދަލުކުރާ މެޗު އޮންނާނީ ރާއްޖޭ ގަޑިން މިރޭ 12 ޖަހާއިރުއެވެ.