އެފްއޭކަޕްގެ ޗެމްޕިއަންކަން މާޒިޔާ ހޯދައިފި
21 އޯގަސްޓު 2022 | އާދީއްތަ 18:57މިއީ މާޒިޔާއިން މުބާރާތް ކާމިޔާބުކުރި ތިންވަނަ ފަހަރު
ފައިނަލް މެޗުގެ ފުރަތަމަ ލަނޑު ޖެހުމަށްފަހު ނާއިޒު
ކްލަބް ވެލެންސިޔާ ބަލިކޮށް, އެފްއޭކަޕްގެ ޗެމްޕިއަންކަން މާޒިޔާ ހޯދައިފިއެވެ.
މާޒިޔާ އެފްއޭކަޕްގެ ޗެމްޕިއަންކަން ހޯދީ ފައިނަލްގައި 2-0 ން ވެލެންސިޔާ ބަލިކޮށްގެންނެވެ. ފުޓުބޯޅަ މެޗުގެ 14 ވަނަ މިނެޓުގައި މާޒިޔާއަށް ކުރި ހޯދައިދިނީ ނާއިޒު ހަސަން (ދާދު) އެވެ. ފުރަތަމަ ހާފް ނިމުމުގެ ކުރިން ދެވަނަ ލަނޑު ޖެހީ ހަމްޒާ މުޙައްމަދު (ހަމްޕު) އެވެ. ސައްތައިން ސައްތަ ދިވެހި ކުޅުންތެރިންނާއެކު މާޒިޔާ މުބާރާތް ކާމިޔާބުކުރީ އެސިސްޓެންޓް ކޯޗު އަހުމަދު ސުޒޭރުގެ އިރުޝާދުގެ ދަށުންނެވެ. މިއީ ޕްރެޒިޑެންޓްކަޕް ފައިނަލާއި, ފައިނަލްގެ ކުރިން ވެލެންސިޔާ އަތުން މާޒިޔާ ވީބަލި ހަނދާން ނައްތާލަން ރަނގަޅު ކާމިޔާބީއެކެވެ.
މާޒިޔާއިން ވަނީ އެފްއޭކަޕްގެ ކުރިން ލީގު ވިދިވިދިގެން ތިންވަނަ ފަހަރަށް ހޯދާފައެވެ. މިއީ މާޒިޔާއިން އެފްއޭކަޕް ކާމިޔާބުކުރި ތިންވަނަ ފަހަރެވެ. މީގެކުރިން މާޒިޔާއިން މުބާރާތް ކާމިޔާބުކުރީ 2012 ވަނަ އަހަރާއި, 2014 ވަނަ އަހަރެވެ. އެފްއޭކަޕްގެ ތިންވަނަ ޓީމަކީ މިފަހަރު ގްރީން ސްޓްރީޓްސްއެވެ.
