ބަރުލަމާނީ ޤަރާރު ހުށަނޭޅީ އިތުރަށް މަޝްވަރާ ކުރަން: ނަޝީދު
ކުރިއަތް އޮތް އިންތިޚާބު ކާމިޔާބު ކުރުމަށާއި ޚިޔާލުތައް އެއްގޮތް ކުރުމަށް އަވަސްވެގަންނާނަން
ކޮންގްރެސްގައި ބަރުލަމާނީ ގަރާރަށް ބަހުސްނުކޮށް ނިންމާލެއްވުމަށް ފަހު ދެ ރައީސުން އެކުގައި
ވެރިކަން ހިންގުން ބަރުލަމާނީ ނިޒާމަކަށް ބަދަލުކުރަން ހުށަހެޅުއްވި ޤަރާރުގެ ބަހުސް އާއްމު މެމްބަރުންނަށް ހުޅުވާނުލަން ނިންމެވީ އިތުރަށް މަޝްވަރާ ކުރައްވަން ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު ވިދާޅުވީ ޤަރާރު ހުށައެޅުމުގެ ކުރީގައި އަދި މިދިޔަ ދެތިން ދުވަހުގެ ތެރޭގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އާއިއެކު މަޝްވަރާ ކުރައްވާފައިވާ ކަމަށެވެ. ޤަސްތު ކުރައްވަނީ އަދި މަޝްވަރާތައް ކުރިއަށް ގެންދަން ކަމަށާއި ޤަރާރު އޮތް ގޮތަށް އިހަށް ބާއްވާ، ބަހުސް ނުކޮށް މަޑުޖައްސަވާލަން ކަމަށެވެ.
އެމްޑީޕީގެ ތެރޭގައި އެތައް ބަޔަކު އެދޭ ވަކި ޚާއްސަ ގޮތްތަކެއް ހުންނަ ކަމަށާއި އަދި އެހެން ބޭފުޅުން އެގޮތްތަކާއި އިންކާރު ކުރައްވާ ކަމަށް ވެސް ނަޝީދު ވިދާޅުވިއެވެ. ނަޝީދު ވިދާޅުވީ ރައީސް އާއި ޕާޓީގެ އެހެން ގުނަވަންތަކާއި މަޝްވަރާ ކޮށްގެން އެއްގޮތް ހަމަތަކާއި އުސޫލުތަކެއް ހޯދޭނެ ކަމަށެވެ.
ކުރިއަތް އޮތް އިންތިޚާބު ކާމިޔާބު ކުރުމަށާއި ޚިޔާލުތައް އެއްގޮތް ކުރުމަށް އަވަސްވެގަންނާނެ ކަމަށާއި ކަންކަން ހިނގަމުންދާ ގޮތް ދެ ފުށް ފެންނަ އިންތިޒާމެއްގެ ތެރޭގައި ފެނިގެންދާނެ ކަމަށް ވެސް ނަޝީދު ވިދާޅުވިއެވެ.
އެކުގައި އެއް ޚިޔާލެއްގަ ތިބެ, އިންތިޚާބު ކާމިޔާބު ކުރެވޭނެ ކަމަށް ނަޝީދު ވިދާޅުވިއެވެ.
