ފުލްހަމުން ފަހު ވަގުތު ބްރެންޓްފޯޑް ބަލިކޮށްފި
21 އޯގަސްޓު 2022 | އާދީއްތަ 02:29ފުލްހަމް މޮޅުވި ލަނޑު މިޓްރޮވިޗް ޖެހީ 90 ވަނަ މިނެޓުގައި މިޓްރޮވިޗް
ފުލްހަމުން ކުޅުނު މެޗުގެ ތެރެއިން
އިނގިރޭސި ޕްރިމިއަރ ލީގުގައި ބްރެންޓްފޯޑާ ދެކޮޅަށް ކުޅުނު މެޗު ފަހު ވަގުތު ފުލްހަމުން ކާމިޔާބުކޮށްފިއެވެ.
ފުލްހަމްގެ އަމިއްލަ ދަނޑުގައި ކުޅުނު މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ފުލްހަމް އިންނެވެ. ފުރަތަމަ މިނެޓުގައި ފުލްހަމަށް ލީޑު ނަގައިދިނީ ބޮބީ ރެއިޑްއެވެ. އޭގެ ފަހުން 19 ވަނަ މިނެޓުގައި ފުލްހަމުން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. އެއީ ޕެރެއިރާގެ އެހީތެރިކަމާއެކު ޕަލީނިއާ ޖަހައިދިން ލަނޑެކެވެ.
ދެ ލަނޑުގެ ލީޑެއްގައި އޮވެ ފުލްހަމުން ކުޅެމުން ދަނިކޮށް، ފުރަތަމަ ހާފު ނިމުމުގެ ކުރިން ބްރެންޓްފޯޑުން ވަނީ ލަނޑެއް ޖަހައި ނަތީޖާގެ ފަރަގު ކުޑަކޮށްފައެވެ. ފުރަތަމަ ހާފުގެ 44 ވަނަ މިނެޓުގައި ޖެންސެން ދިން ބޯޅައަކުން މި ލަނޑު ޖެހީ ނޮގާޑްއެވެ. ދެ ވަނަ ހާފު ފަށައިގެން ފުރަތަމަ ފަސް މިނެޓުގެ ތެރޭގައި ބްރެންޓްފޯޑުގެ އީވާން ޓޮނޭ ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. ނަމަވެސް ވިއޭއާރުން ނިންމީ އެ ލަނޑު ބަލައި ނުގަތުމަށެވެ.
އޭގެ ފަހުން މެޗުގެ 71 ވަނަ މިނެޓުގައި ޓޮނޭ ވަނީ އިތުރު ލަނޑެއް ޖަހައި ބްރެންޓްފޯޑަށް ނަތީޖާ ހަމަހަމަކޮށްދީފައެވެ. ފުލްހަމް މޮޅުވި ލަނޑު މިޓްރޮވިޗް ޖެހީ 90 ވަނަ މިނެޓުގައެވެ.
ތިން މެޗުން ލިބުނު ފަސް ޕޮއިންޓާއެކު ފުލްހަމް އޮތީ ތާވަލްގެ ހަތަރު ވަނަ މަގާމުގައެވެ. ބްރެންޓްފޯޑު އޮތީ ހަތަރު ޕޮއިންޓާއެކު ފަސް ވަނަ މަގާމުގައެވެ.
