ކޮންގްރެސްގައި ބައިވެރިވި ފެނަކައިގެ މުވައްޒަފުންނަށް ނުފޫޒު ފޯރުވާކަމަށް ބުނާ ވާހަކަ ދޮގުކޮށްފި

އެމްޑީޕީގެ ކޮންގްރެސްގައި ވަކި ގޮތަކަށް އަމަލުކުރަން އެެއްވެސް މުވައްޒަފަކަށް އަންގަވާފައި ނުވާނެ ކަމަށާއި، ކޮންގްރެސްގައި ބައިވެރިވާ މުވައްޒަފުންނަށް ނުފޫޒު ފޯރުވާ ކަމަށް ބުނެ ދައްކަމުން ދަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށް ފެނަކަ ކޯޕަރޭޝަނުން ބުނެފިއެވެ.

4 ވަނަ އެމްޑީޕީގެ ކޮންގްރެސްގެ ބައެއް ބައިވެރިންނާއި ބައްދަލުކުރައްވާ ހޮނިހިރު ދުވަހު ވާހަކަދައްކަވަމުން، ކޮންގްރެސްގައި ރައީސް ނަޝީދް އާއި ވާހަކަދައްކައިފި ނަމަ ފެނަކައިގައި ވަޒީފާ އަދާކުރާ މީހުން، ވަޒީފާއިން ކަނޑާލާނެ ކަމަށް ފެނަކައިގެ އިސްފަރާތުން ބުނެފާނެ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަނީ ވިދާޅުވެފައެވެ. އެ ބައްދަލުވުމުގައި ރައީސް ނަޝީދު ވަނީ ކޮންގްރެސްގައި އަމަލުކުރާ ގޮތުން އެއްވެސް މީހެއްގެ ވަޒީފާ ނުރައްކަލަށް ހުށަނޭޅޭނެ ކަމަށް ވެސް ވިދާޅުވެފައެވެ. އެހެންނަމަވެސް ރައީސް ނަޝީދު އެފަދަ ތުހުމަތުތަކެެއް ކުރެއްވި ސަބަބު އެމަނިކުފާނު ހާމަކުރައްވާފައެއް ނުވެއެވެ.

ރައީސް ނަޝީދުގެ އެ ވާހަކަތަކާއި ގުޅިގެން ފެނަކައިގެ މެނޭޖިން ޑިރެކްޓަރ އަހުމަދު ސައީދު "ރާއްޖެ އެމްވީ" އަށް ވިދާޅުވީ އެއްވެސް މުވައްޒަފަކަށް ވަކި ސިޔާސީ ބޭފުޅަކާއި ވާހަކަ ނުދެއްކުމަށް ނުވަތަ ވަކި ގޮތަކަށް އަމަލުކުރުމަށް އެއްވެސް މުވައްޒަފަކަށް އަންގަވާފައި ނުވާނެ ކަމަށެވެ. އަދި ރައީސް ނަޝީދު ސައީދުގެ ނަން ބޭނުން ކުރައްވާ، މިސާލު ނަންގަވައިގެން އެ ވާހަކަ ދެއްކެވީ ސައީދު އަށް ރައީސް ނަޝީދުކުރައްވާ އިތުބާރު ބޮޑުވުމުން ކަމަށާއި، ސައީދު އަކީ އެއްވެސް މުވައްޒަފަކަށް ނުފޫޒު ފޯރުވާނެ މީހެއް ނޫން ކަން ރައީސް ނަޝީދު އަށް ޔަގީންކުރެއްވޭނެ ކަމަށް ވެސް ސައީދު ވަނީ ވިދާޅުވެފައެވެ.

ސައީދު ވަނީ ފެނަކައިގެ އެއްވެސް މުވައްޒަފަކަށް ސިޔާސީ ފިކުރުގެ ސަބަބުން ދަތިކުރުމުގެ އެއްވެސް ފިޔަވަޅެއް މި ސަރުކާރުން އަޅާފައި ނުވާނެ ކަމަށް ވިދާޅުވެފައެވެ. އަދި ސިޔާސީ ފިކުރު ހުންނަ ގޮތަކުން އެއްވެސް މީހަކު މަޤާމުން ވަކި ނުކުރާނެ ކަމުގެ ޔަގީންކަން ދެއްވާ ކަމަށް ވެސް އޭނާ ވަނީ ވިދާޅުވެފައެވެ.