ފެނަކައިގެ ކުރީގެ އެމްޑީ ސައީދު އަށް އިންސާފު ހޯދައި ދިނުމަށް ގޮވާލައި ވާދޫގައި އެއްވުމެއް ބާއްވައިފި
މި ހަރަކާތަކީ ވަދޫގެ ރައްޔިތުން ދެކެ ލޯބިވާ، ރައްޔިތުންނަށްޓަކައި އެތައް ގުރުބާނީ އެއް ވެފައިވާ ފަރާތެއް ކަމުން އެފަރާތައް އިންސާފު ހޯދައި ދިނުމަށް ގޮވާލައި ބޭއްވި އެއްވުމެއް
ފެނަކައިގެ ކުރީގެ އެމްޑީ ސައީދު އަށް ރައީސް މުޢިއްޒުގެ ސަރުކާރުން ކޮށްފައިވަނީ ސިޔާސީ ހުކުމެއް ކަމަށް ބުނެ ސައީދު އަށް އިންސާފު ހޯދައިދުމުނަށް ގޮވާލައި ގދ. ވާދޫގައި ބޭއްވި އެއްވުމުގެ ތެރެއިން
ފެނަކައިގެ ކުރީގެ މެނޭޖިންގ ޑިރެކްޓަރު އަހުމަދު ސައީދު އަށް ރައީސް މުޢިއްޒުގެ ސަރުކާރުން ކޮށްފައިވަނީ ސިޔާސީ ހުކުމެއް ކަމަށް ބުނެ ސައީދު އަށް އިންސާފު ހޯދައި ދިނުމަށް ގޮވާލައި ގދ ވާދޫގައި އެއްވުމެއް ބާއްވައިފި އެވެ.
ފެނަކައިގެ ކުރީގެ އެމްޑީ ސައީދުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ހިފުމުގެ ކުށް ސާބިތުވާ ކަމަށް ކްރިމިނަލް ކޯޓުން ހުކުމް ކުރީ ސެޕްޓެމްބަރު 28 ވަނަ ދުވަހު އެވެ. ކުށް ސާބިތުވުމާ ގުޅިގެން ގާޒީ ވަނީ ސައީދު އަށް 4 އަހަރުގެ ޖަލު ހުކުމެއް އިއްވާފައެވެ. އެހެން ނަމަވެސް ދައުލަތުން އެދުނީ 1 އަހަރާ 7 މަހުގެ ހުކުމެއް އިއްވައި ދިނުމަށެވެ.
ސައީދު އަށް އިންސާފު ހޯދައިދިނުމަށް ގޮވާލައި ގދ ވާދޫގައި ބޭއްވި އެއްވުމާއި ގުޅިގެން ރާއްޖެ އެމްވީ އަށް މައުލޫމާތު ހިއްސާކުރި އެރަށު މީހަކު ބުނީ، މިއީ ސިޔާސީ ހަރަކާތެއް ނޫން ކަމަށާ އަދި ސަރުކާރާއި ދެކޮޅުވެގެން ބާއްވާ އެއްވުމެއް ވެސް ނޫން ކަމަށެވެ. އޭނާ ބުނީ މި ހަރަކާތަކީ ވާދޫގެ ރައްޔިތުން ދެކެ ލޯބިވާ، ރައްޔިތުންނަށްޓަކައި އެތައް ގުރުބާނީއެއް ވެފައިވާ ފަރާތެއް ކަމުން އެފަރާތައް އިންސާފު ހޯދައި ދިނުމަށް ގޮވާލައި ބާއްވާ އެއްވުމެއް ކަމަށެވެ. އަދި އެ ހުކުމަކީ ބޭއިންސާފުން ކޮށްފައިވާ ހުކުމެއް ކަމަށާއި ސައީދު އަށް އިންސާފު ލިބެންޖެހޭ ކަމަށް އޭނާ ބުންޏެވެ.
މި ހަރަކާތުގައި ތަފާތު ޝުއޫރުތައް ފާޅުކޮށްފައިވެ އެވެ. އެގޮތުން އަނިޔާވެރިކަން ކާމިޔާބެއް ނުވާނެ އިންޝާﷲ، "އިންސާފު ލަސްވުމަކީ އިންސާފު ނުލިބުން އަދި ސައީދަށް އިންސާފު ލިބެންޖެހޭ، އިންސާފެއް ނެތް ނަމަ ސުލްހަވެސް ނޯންނާނެ" ފަދަ އެކި ޝުއޫރު މި އެއްވުމުގައި ވަނީ ފާޅުކޮށްފަ އެވެ.
ފެނަކައިގެ ކުރީގެ އެމްޑީ ސައީދު އަށް ބޭއިންސާފުން ކޮށްފައިވާ ހުކުމާމެދު ކަންބޮޑުވުން ފާޅުކޮށް، އިންސާފުވެރި ޝަރީއަތެއް ގާއިމުކުރުމަށް ގޮވާލާ އަޑު އުފުލުމުގެ ގޮތުން ވާދޫގައި ބޭއްވި މި ހަރަކާތުގައި ދޮގު ޝަރީޢަތް ހުއްޓާލުމަށާއި، އަދަބު ބޮޑު ކުރުމަކީ ވެސް ބޭ އިންސާފު ކަމަށް ބުނެފައި ވެއެވެ.
ގިނަ އަދަދަކަށް މީހުން މި ހަރަކާތުގައި ބައިވެރިވެފައިވާއިރު އެ އެއްވުމުގެ ބައިވެރިން ވަނީ ސައީދު މިނިވަން ކުރުމަށް ގޮވާލާފައެވެ.
ސައީދުގެ މައްޗަށް ކޮށްފައިވަނީ، ގާނޫނު ނަންބަރު 9/2014 (ދިވެހި ރާއްޖޭގެ ގާނޫނުލް އުގޫބާތު) ގެ 513 ވަަނަ މާއްދާގެ (ށ) އާ ހަވާލާދީ އެ މާއްދާގެ (ނ) ގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާއެވެ.
ސެޓްލްމަންޓް ހެދި އެއްބަސްވުމަކީ ސައީދު މަގާމާ ހަވާލު ވުމުގެ ކުރިން، ޖެނުއަރީ 30، 2018 ގައި ހެދި އެއްބަސްވުމެކެވެ. އެއްބަސްވުމުގެ މަގްސަދެއް ކަމަށް ވަނީ ފެނަކައިގެ އިމޭޖު ރީތިކޮށް، ޕަބްލިކް ރިލޭޝަންސް މަސައްކަތް ކުރުމެވެ.
ސެޓްލްމަންޓް އެއްބަސްވުމަކާއި ރިޓެއިނާ އެއްބަސްވުމަކަށް ދާން ޖެހުނު ސަބަބު ސާފުކޮށްދެމުން ކޯޓުގައި ސައީދު ބުނެފައި ވަނީ، އެއްބަސްވުންތަކުގައި ސޮއިކޮށްފައި ވާނީ ގާނޫނީ ލަފާގެ މަތިން ކަމަށާއި، ބްލޭޒަން އަށް އެއްބަސްވުމާ އެއްގޮތަށް އަމަލު ނުކުރެވުނީ ފެނަކަ އިން ދޭން ޖެހޭ އެއްބާރުލުން ނުދީގެން ކަމަށް ގަބޫލުކުރެވޭތީ ކަމަށެވެ. އަދި އެއްބަސްވުން އުވާލައިގެން ބްލޭޒަން އިން ކޯޓަށް ގޮސްފި ހާލަތެއްގައި އެ ކުންފުންޏަށް ބޮޑު ބަދަލެއް ދޭން ޖެހިދާނެތީ، ފެނަކަ އަށް ލިބިދާނެ ބޮޑު ގެއްލުމަކުން ސަލާމަތް ކުރުމަށް ކަމަށެވެ.
މި މައްސަލައިގައި ސައީދު ވަނީ ދިފާއި ހެކިންގެ ގޮތުގައި އޭނާ އަށް ގާނޫނީ ލަފާ ދިން ފެނަކައިގެ އޭރުގެ ލީގަލް ހެޑު އަހުމަދު އާރިފާއި އެ ޑިޕާޓުމަންޓުގައި މަސައްކަތް ކުރި އަމްޖަދު އަހުމަދު ހުށަހަޅާފަ އެވެ. މި ދެ މީހުން ވެސް ވަނީ އެ ގޮތަށް ލަފާ ދިން ކަމަށް ކޯޓުގައި ބުނެފަ އެވެ.
