"ފެނަކައިން އައްޑޫ ރައްޔިތުންނަށް ދޭ ހިދުމަތް އަނިޔާ އަކަށް ބަދަލުވެއްޖެ"

އައްޑޫ ސިޓީގެ ގުޅިފައިވާ ރަށްތަކުން ގަޑި އަކުން ގަޑި އަކުން ކަރަންޓް ކަނޑަން ފަށާފައިވާ މައްސަލާގައި ކަންބޮޑުވުން ފާޅުކުރަމުން، ފެނަކައިން އައްޑޫ ރައްޔިތުންނަށް ދޭ ހިދުމަތް އަނިޔާ އަކަށް ބަދަލުވެއްޖެ ކަމަށް އެސިޓީ ގެ މޭޔަރ އަލީ ނިޒާރު ވިދާޅުވެއްޖެ އެވެ.

ފެނަކައިގެ އިންޖީނަކަށް ދިމާވި ޓެކްނިކަލް މައްސަލައަކާއި ގުޅިގެން ފާއިތުވި ދެ ދުވަހު އެސިޓީގެ ގުޅިފައިވާ ރަށްތަކުން ކަރަންޓްގެ ޚިދުމަތް މެދު ކަނޑަމުންދާ މައްސަލަ އާއި ގުޅިގެން މޭޔަރ ނިޒާރު ފޭސްބުކްގައި ކުރެއްވި ޕޯސްޓެއް ގައި ވިދާޅުވެފައި ވަނީ، ސަރުކާރުން މިމައްސަލަ ހައްލު ހޯދުމުގެ ނަމުގައި ކުރަމުންދާ މަސައްކަތްތަކަކީ އޮޅުވާލުންތަކެއް ކަމަށާއި، ސަރުކާރުން އައްޑޫގައި ފަށާ "މިނީ ޕްރޮޖެކްޓް" ތައް ފައްޓަވާ ދެއްވުމަށް ރައީސް ޑރ. މުހައްމަދު މުއިއްޒު އައްޑޫ އަށް ކުރައްވާ ދަތުރާއި ގުޅުވައި ނޫސަތަރި އޮޅާލައިގެން ކުޑަ މުޅޯށި ތަކުގައި ގެންނަ ޖަނަރޭަޓަރުތަކުން އައްޑޫގެ ކަރަންޓް މައްސަލަ ހައްލެއް ނުކުރެވޭނެ ކަމަށެެވެ.

Advertisement

ފެނަކަ އިން އައްޑޫ ގައި ދޭ ހިދުމަތްތަކަކީ ކުރެވޭ އަނިޔާތަކަށް ވަނީ ބަދަލުވެފަ ކަމަށް ވިދާޅުވަމުން، މަރާމާތުގެ ނަމުގައި އައްޑޫ ގައި އަލަށް ހެދި މަގުތަށް ދަނީ ވީރާނާ ކުރަމުން ކަމަށް ނިޒާރު ވަނީ ވިދާޅުވެފަ އެވެ.

އަދި މިސަރުކާރު އައި ފަހުން އައްޑޫގެ ރައްޔިތުންނަށް އަލަށްދެވޭ ހިދުމަތެއްނެތް ކަމަށާއި އެދިފައިވާ ހިދުމަތްތަކަށް އެޓެންޑް ނުވެވި އެތަކެއް ސަތޭކަ ހިދުމަތުގެ ކިއުގައި އެބައޮތް ވިދާޅުވި އެވެ.

އެންމެ ފަހުން އައްޑޫގައި ހިގާދިޔަ ދެމަފިރިންގެ ހިތާމަވެރި މަރުގެ ހާދިސާއާގައި ފެނަކައިގެ އިހްމާލް ހިމެނޭކަމަށް ރައްޔިތުން ތުހުމަތުކުރޭ. މަރުހޫމް އިބްރާހިމް ދީދީ 2 މަސްވަންދެން ގެއަށް ކަރަންޓް ގުޅާދިނުމަށް ކުރި އާދޭސް އަޑު ނޭހުމުން ކުޑަ ޖަނަރޭޓަރއެއް ގޭތެރޭ ބަހައްޓައިގެން ގެއަށް ކަރަންޓްދީގެން ވައި ވިހަނުވާނެ އެއްވެސް ގޮތެއް ނޮއޮންނާނެ. މީ ސިޔާސީ ވާހަކައެއް ނޫން. މިއީ އަޅުގަޑުމެން ވައްޓާލެވިފައިވާ ހާލަތު.

އައްޑޫ ސިޓީގެ މޭޔަރ އަލީ ނިޒާރު

އައްޑޫ ރައްޔިތުންގެ މި އުދާސްތަކަށް ހައްލެ ހޯއްދަވައި ނުދެއްވައި ރައީސް މުއިއްޒު، ނޮވެމްބަރު މަހުގެ 4 ވަނަ ދުވަހު އައްޑޫ ސިޓީއަށް ވަޑައިގަންނަވާ ސަބަބެއް ވިސްނުމަކަށް ނުގެނެވޭ ކަމަށް ނިޒާރު ވަނީ ވިދާޅުވެފަ އެވެ.