އެމްޑީޕީގައި ހިޔާލު ތަފާތުވުންތަކަށް ޖާގަ އޮންނާނެ – ރައީސް ޞާލިޙް
ބައެއް ކަންތައް ތަކަކީ އެންމެންނަށް އެއްބަސްވެވޭ ކަންތައްތަކަށް ވާއިރު، އަނެއްބައި ކަންތައްތަކަކީ، އެއްބަސް ނުވެވޭ ކަންތައް ތަކަށް ވެދާނެ
އެމްޑީޕީގެ 4 ވަނަ ކޮންގްރެސްގައި ރައީސް ޞާލިޙް (ކ) އަދި ރައީސް ނަޝީދު (ވ)
އެމްޑީޕީގައި ޚިޔާލު ތަފާތުވުންތަކަށް ޖާގަ އޮންނާނެ ކަމަށް އެ ޕާޓީގެ އެންމެ އިސް ލީޑަރު، ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމްޑީޕީގެ 4 ވަނަ ކޮންގްރެސް ފެށުމުގެ ރަސްމިއްޔާތުގައި ހުކުރު ދުވަހުގެރޭ ވާހަކަފުޅު ދައްވަމުންނެވެ. ރައީސް ޞާލިޙް ވިދާޅުވީ އެމްޑީޕީގައި ހިޔާލު ތަފާތުވުންތަކަށް ޖާގަ އޮންނާނެ ކަމަށާއި، ތަފާތު ހިޔާލުތަކަށްވެސް ޖާގަ އޮންނާނެ ކަމަށެވެ. ބައެއް ކަންތައް ތަކަކީ އެންމެންނަށް އެއްބަސްވެވޭ ކަންތައްތަކަށް ވާއިރު، އަނެއްބައި ކަންތައްތަކަކީ، އެއްބަސް ނުވެވޭ ކަންތައް ތަކަށް ވެދާނެ ކަމަށެވެ.
ނަމަވެސް އޮތް ހަމައެކަނި ގޮތަކީ، ޚިޔާލު ތަފާތުވުންތަކާ، ތަފާތު ޚިޔާލުތަކާއެކުގައި ކުރިޔަށް ދިއުން ކަމަށް ރައީސް ވިދާޅުވިއެވެ.
ރައީސް ވިދާޅުވީ ލިބުނު ތަޖުރިބާތަކާ، ކުރެވިފައި ހުރި ކަންކަމާއި، ނުކުރެވި، ކޮންމެހެން ނިންމަން ޖެހޭ ކަންކަމުގެ މައްޗަށް މިއަދު ވިސްނަންޖެހޭ ކަމަށެވެ. މިވަގުތު ކުރަންޖެހޭ އެންމެ މުހިންމު އަދި އަވަސް މަސައްކަތަކީ އެމްޑީޕީ އެމަގުން ދިއުމަށް ކުރަންޖެހޭ ކަންކަން ކުރުން ކަމަށް ރައީސް ވިދާޅުވިއެވެ. ރައީސް ވިދާޅުވީ ނިންމަން ޖެހޭ ނިންމުންތަކާއި، އެކަށައަޅަންޖެހޭ ސިޔާސަތުތަކާއި، ރާވަންޖެހޭ ރޭވުންތައް ކުރިޔަށް ރާވާ އިންތިޒާމް ކުރުން ކަމަށެވެ.
ރައީސް ވިދާޅުވީ ސިޔާސަތުތައް ކަނޑައަޅާއިރު، އެކުދިންގެ ވިސްނުމާއި ފިކުރާއި އެއްކީލި ވާން ޖެހޭ ކަމަށެވެ. ގައުމިއްޔަތުގެ ހުރިހާ ބަހާއެއް އެޖީލަށް ވާރުތަވާނެ ގޮތް އަޅުގަނޑުމެން ހަދަން ޖެހޭ ކަމަށެވެ. އަދި މޫސުމީ ބަދަލުތަކުން ކުރިމަތިވާ ގޮންޖެހުންތަކާއި ނުރައްކަލުން އެކުދިންނަށް މި ރާއްޖެ ސަލާމަތްކޮށްދޭން ޖެހޭ ކަމަށާއި، އެއީ ކުރިމަގުގައި މިޤައުމު ހިންގަން ތިބި ލީޑަރުން ކަމަށް ރައީސް ވިދާޅުވިއެވެ.
