ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގައި 24 ސްކޫލަކުން ބައިވެރިވެއްޖެ
މި މުބާރާތް އޮންނާނީ ސެޕްޓެމްބަރު 11ން 15ގެ ނިޔަލަށް
23 ވަނަ އިންޓަރސްކޫލް އެތުލެޓިކްސް ޗެމްޕިއަންޝިޕް
މިއަންނަ މަހު ކުރިއަށް ގެންދިއުމަށް ހަމަޖެހިފައިވާ ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގައި 24 ސްކޫލަކުން ބައިވެރިވެއްޖެއެވެ.
މުބާރާތުގައި ބައިވެރިވުމުގެ ފުރުސަތު ހުޅުވާލާފައިވަނީ މިއަދުގެ 14:00ގެ ނިޔަލަށެވެ. މުބާރާތް އިންތިޒާމްކުރާ ރައުހަތު ސްޕޯޓްސް ކްލަބުން ބުނީ، މި މުބާރާތަށް ހީނުކުރާވަރުގެ ބޮޑު ތަރުހީބެއް ލިބިފައިވާކަމަށެވެ.
މުޅި ރާއްޖޭގެ ހުރިހާ ސްކޫލަކަށް ހުޅުވާލައިގެން ކުރިއަށް ގެންދިއުމަށް ހަމަޖެހިފައިވާ މި މުބާރާތް އޮންނާނީ ސެޕްޓެމްބަރު 11ން 15ގެ ނިޔަލަށެވެ. ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގެ ނަމުގައި މުބާރާތް ހިންގިނަމަވެސް، މުބާރާތުގައި ބައިވެރިވުމުގެ ފުރުސަތު ރާއްޖޭގެ ހުރިހާ ސްކޫލުތަކަށް ވަނީ ހުޅުވާލާފައެވެ.
މި މުބާރާތުގައި ފަސް އުމުރުފުރާއަކުން އަންހެން ޑިވިޝަނާއި ފިރިހެން ޑިވިޝަންގެ އެތުލީޓުން ވާދަކުރާނެއެވެ. އެއީ 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށް، އަދި 19 އަހަރުން ދަށުގެ އުމުރުފުރާއެވެ.
މި މުބާރާތް ރާވައި ހިންގުމަށް ކައުންސިލުން ހަވާލުކޮށްފައިވަނީ ރައުހަތު ސްޕޯޓްސް ކްލަބާއެވެ. މުބާރާތް އޮންނަނީ ގދ. ތިނަދޫގައެވެ. މުބާރާތުގެ މީޑިއާ ޕާޓްނަރަކީ ރާއްޖެޓީވީއެވެ.
