ޕްރައިމަރީއަކާ ނުލައި ރައީސްއަށް ޓިކެޓް ދޭ ޚިޔާލެއް ނުގެންގުޅޭ - އިބްރާހިމް ވަހީދު

އެއްވެސް ޕްރައިމަރީއަކާ ނުލައި ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހުއަށް އެމްޑީޕީގެ ޓިކެޓް ދޭން އޫޅޭކަމަށް ދެކެވޭ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށާއި އެފަދަ ޚިޔާލެއް ނުގެންގުޅޭ ކަމަށް އެމްޑީޕީ ކޮންގްރެސް ކޮމިޓީގެ މުގައްރިރު އަދި އެ ޕާޓީގެ މަތި އުތުރު ޕްރޮވިންސުގެ ރައީސް އިބްރާހިމް ވަހީދު (އިބުރޭ) ވިދާޅުވެއްޖެއެވެ.

"ރާއްޖެ ޓީވީ" ގެ ފަލަސުރުޚީ ގައި ވާހަކަދައްކަވަމުން އިބްރާހިމް ވަހީދު ވިދާޅުވީ އެ ޕާޓީގެ އައު ޗެއަރޕާސަން އިންތިޚާބުގެ ދުވަސްވަރު ވެސް، އެ މަގާމަށް މިހާރުގެ އިކޮނޮމިކް މިިނިސްޓަރު ފައްޔާޒު އިސްމާއިލް އައްޔަންކުރުމަށް މަސައްކަތް ކުރަނީ ޕްރައިމަރީއަކާ ނުލައި ރައީސްއަށް އެމްޑީޕީގެ ރިޔާސީ ޓިކެޓް ދިނުމުގެ ބޭނުމުގައި ކަމަށް ތުހުމަތުތަކެއް ކުރި ކަމަށެވެ. ނަމަވެސް ފައްޔާޒުގެ ކެމްޕޭން ޓީމުގެ މެމްބަރެއްގެ ހައިސިއްޔަތުން އެފަދަ އެއްވެސް ޚިޔާލެއް ނުގެންގުޅޭ ކަމަށާއި އަދިވެސް އެފަދަ ޚިޔާލެއް ނުގެންގުޅޭ ކަމަށް އޭނާ ވިދާޅުވިއެވެ.

އިބްރާހިމް ވަހީދު ވިދާޅުވީ އެމްޑީޕީގެ އަސާސީ ގަވާއިދުގައި ބުނެފައިވާ ގޮތުގައި އެ ޕާޓީގެ ރިޔާސީ ޓިކެޓް ދެވޭނީ ޕްރައިމަރީއެއް ބޭއްވުމަށްފަހުއެވެ. އެ ނޫން ގޮތަކަށް ޓިކެޓް ދޭނަމަ އަސާސީ ގަވާއިދަށް އިސްލާހު ގެންނަން ޖެހޭނެ ކަމަށާއި ކުރިއަށް އޮތް އެ ޕާޓީގެ ކޮންގްރެސްގައި ވެސް އެފަދަ އިސްލާހެއްް ހުށަހަޅާފައިނުވާ ކަމަށް އޭނާ ވިދާޅުވިއެވެ. އެހެންކަމުން ޕްރައިމަރީއެއް ބާއްވާނެ ކަމަށާއި އެކަން ވަރަށަ އަވަހަށް އިއުލާން ކުރާނެ ކަމަށް އުއްމީދު ކުރައްވާ ކަމަށް އިބްރާހިމް ވަހީދު ވިދާޅުވިއެވެ.

މިފަހަރުގެ ކޮންގްރެސްގައި ރިޔާސީ އިންތިޚާބުގެ ޕްރައިމަރީއާ ގުޅުން ހުރި ކަންކަން ކުރިއަށްދާނެ ކަމަށް ގިނަ ބަޔަކު އުއްމީދު ކުރި ނަމަވެސް އެފަދަ ކަމެއް ކޮންގްރެސްގައި ތާވަލު ކޮށްފައި ނެތް ކަމަށާއި އެފަދަ ކަމެއް ކޮންގްރެސްގައި ނުހިނގާނެ ކަމަށް ވެސް އިބްރާހިމް ވިދާޅުވިއެވެ.

ކޮންގްރެސްގައި އެމްޑީޕީގެ ރިޔާސީ ޕްރައިމަރީއާ ގުޅޭ ކަންތައްތައް ތާވަލުކޮށްފައި ނެތް ނަމަވެސް މިއަހަރު ތެރޭގައި އެ ޕާޓީގެ ކެންޑިޑޭޓެއް ކަނޑައެޅުމަށް ކުރަން ޖެހޭ ކަންކަން ފެށިގެންދާނެ ކަމަށް އިބްރާހިމް ވަހީދު ވިދާޅުވިއެވެ. އެގޮތުން، ޕްރައިމަރީއެއް ބާއްވާ ތާރީހު އެމްޑީޕީ ކޮންގްރެސްގައި މިފަހަރު ތާވަލު ކޮށްފައިވާ ވެރިކަމުގެ ނިޒާމާ ގުޅޭ މަޝްވަރާތަކަށްފަހު އިއުލާނު ކުރެވިގެންދާނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ.

އެމްޑީޕީގެ ހަތަރުވަނަ ކޮންގްރެސް އޮންނާނީ މި މަހުގެ 19-21 އަށް ސޯޝަލް ސެންޓަރުގައެވެ. މިއީ މިހާތަނަށް އެންމެ ގިނަ ބަޔަކު ބައިވެރިވާނެ ކޮންގްރެސްއަށް ވެގެންދާނެ ކަމަށް އެމްޑީޕީން ބުނެއެވެ. އެގޮތުން މިހާރުވެސް 1447 ޑެލިގޭޓުން ބައިވެރިވާން ޖެހޭ ކަމަށް އެ ޕާޓީން ބުނެއެވެ.

ކޮންގްރެސްގައި ބައިވެރިވުމުގެ ފުރުސަތު ލިބެނީ އެމްޑީޕީގެ އިންތިޚާބީ މަގާމުތަކުގައި ތިބި މެމްބަރުންނަށެެވެ. އޭގެ އިތުރުން ދައުލަތުގެ ވަޒީރުންނާއި ރާއްޖޭގެ އެހެނިހެން ސިޔާސީ ޕާޓީތަކަށް ވެސް މި ކޮންގްރެސްގެ ދައުވަތުދޭން ވަނީ ނިންމާފައެވެ.

އެމްޑީޕީގެ ހަތަރު ވަނަ ކޮންގްރެސްގައި މައިގަނޑު ތިން ކަމެއް ނިންމަން ވަނީ ތާވަލުކޮށްފައެވެ. އެއީ އެ ޕާޓީގެ ގަވާއިދަށް ގެންނަ ބަދަލުތައް ފާސްކުރުމާއި ޤާނޫނު އަސާސީއަށް ގެންނަން ފެންނަ ބަދަލުތަކާ ގުޅޭގޮތުން މަޝްވަރާ ކުރުމާއި ވެރިކަމުގެ ނިޒާމަށް ގެންނަ ފެންނަ ބަދަލުތަކާ ގުޅޭ ގޮތުން ކޮންގްރެސްއަށް ހުށަހަޅައި މަޝްވަރާ ކުރުމެވެ. ވެރިކަމުގެ ނިޒާމަށް ގެންނަ ބަދަލާ ގުޅޭ ބަހުސް އަކީ އެމްޑީޕީގެ ރައީސް، ރައީސް މުޙައްމަދު ނަޝީދު ހުށަހަޅުއްވާފައިވާ އިސްލާހެކެވެ.