މިސަރުކާރުން ކުޅުދުއްފުށީގެ ސިއްޙީ ޚިދުމަތަށް ބޮޑެތި ކުރިއެރުންތަކެއް ހޯދައިދީފައިވޭ: ކުޅުދުއްފުށީ ސިޓީ ކައުންސިލު
ކުޅުދުއްފުށީގައި ޓާރޝަރީ ހޮސްޕިޓަލެއް އެޅުމުގެ މަސައްކަތް އަވަސްކުރަން ބޭނުންވޭ
ނައިބު ރައީސް ފައިސަލް ނަސީމު ކުޅުދުއްފުށި ސިޓީ ކައުންސިލާ ބައްދަލުކުރެއްވުން
މިސަރުކާރުން ކުޅުދުއްފުށީގެ ސިއްޙީ ޚިދުމަތަށް ބޮޑެތި ކުރިއެރުންތަކެއް ހޯދައިދީފައިވާކަމުގަައި ކުޅުދުއްފުށީ ސިޓީކައުންސިލުން ބުނެފިއެވެ.
ކުޅުދުއްފުށީ ސިޓީކައުންސިލުން މިކަން ފާހަގަކޮށްފައި ވަނީ، ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި އެކު ހޮނިހިރު ދުވަހުގެ ހަވީރު ސިޓީކައުންސިލް އިދާރާގައި ބޭއްވި ބައްދަލުކުރެއްވުމުގައެވެ.
މިބަައްދަލު ކުރެއްވުމުގައި ސިޓީކައުންސިލްގެ މެމްބަރުން ވިދާޅުވީ، ކުޅުދުއްފުށީގެ ސިއްޙީހާލަތު ރަނގަޅު ކުރުމަށް މިސަރުކާރުން ގިނަ މަސައްކަތްތަކެއް ކުރައްވާފައިވާކަން ފާހަގަކުރައްވާ ކަމަށެވެ. މިއާއިއެކު ކުޅުދުއްފުށީގައި ޓާރޝަރީ ހޮސްޕިޓަލެއް އެޅުމުގެ މަސައްކަތް އަވަސްކުރަން ބޭނުންވާކަމަށް މެމްބަރުން ވިދާޅުވިއެވެ. ސަރުކާރުން ހާމަކުރައްވާފައިވާ ގޮތުގައި ކުޅުދުއްފުށީގައި ޤާއިމްކުރާ ޓާރޝަރީ ހޮސްޕިޓަލްގެ މަސައްކަތަށް ބޭނުންވާ ފަންޑު ހަމަޖެހި މިހާރު އެމަޝްރޫޢު އޮތީ ޑިޒައިން ކުރުމުގެ މަރުޙަލާގައެވެ.
މިބައްދަލު ކުރެއްވުމުގައި ކުޅުދުއްފުށީ ސިޓީކައުންސިލްގެ މެމްބަރުން އިތުރަށް ފާހަގަކުރެއްވި ކަންތައްތަކުގެ ތެރޭގައި، ކުޅުދުއްފުށީ އެއާޕޯޓު ހިމެނޭ ސަރަޙައްދުގައި ރިވެޓްމަންޓްޖެހުމާއި ލައިޓް ޖެހުމުގެ މަސައްކަތް އަވަހަށް ނިންމައި ރޭގަނޑު އެ އެއާޕޯޓަށް ދަތުރު ކުރެވޭ ގޮތް ހެދުން ހިމެނެއެވެ. އަދި ކުޅުދުއްފުށީ ފެމިލީ އެންޑް ޗިލްޑްރަންސް ސާވިސް ސެންޓަރަށް ކުރިމަތިވެފައިވާ މުވައްޒަފުންގެ ދަތިކަން ހައްލުކުރުމާއި، ޑިޓޮކްސް ޚިދުމަތްދެވޭނެ އިންތިޒާމް އާއި ޓިވެޓް ސެންޓަރެއް ޤާއިމުކުރުމާ ގުޅޭ ވާހަކަތައް ކައުންސިލް މެމްބަރުން ފާހަގަ ކުރެއްވިއެވެ.
މިބައްދަލުވުމުގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި ވިދާޅުވީ، ކުޅުދުއްފުށީގެ ތަރައްޤީއަށް ކުރެވޭ މަސައްކަތްތަކަށް ސަރުކާރުން ޚާއްސަ އިސްކަމެއް ދެއްވާ ކަމަށާއި މަޝްރޫޢުތައް އަވަސްކޮށްދިނުމަށާއި މިހާރު ހުރި ދަތިތަކަށް ހައްލު ހޯއްދަވައި ދެއްވުމަށް މަސައްކަތް ކުރައްވާނެ ކަމަށެވެ. އަދި ކުޅުދުއްފުށީ ސިޓީކައުންސިލް އާއި ސަރުކާރުގެ މިނިސްޓްރީތަކާއި ދެމެދު ރަނގަޅު ގުޅުމެއް އޮތްކަން ރައީސުލްޖުމްހޫރިއްޔާގެ ނައިބު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ނައިބު ކުޅުދުއްފުށީ ސިޓީ ކައުންސިލް އާއިއެކު ބޭއްވެވި ބައްދަލުކުރެއްވުމަށް ފަހުގައި ވަނީ ކުޅުދުއްފުށީ ސްކޫލްތަކުގެ އިސްވެރިންނާއިވެސް ބައްދަލުކުރައްވާފައެވެ.
މިބައްދަލުކުރެއްވުމުގައި ސްކޫލްތަކުގެ ޕްރިންސިޕަލުން ވަނީ މިއަހަރުގެ ދިރާސީ އަހަރު ފެށުނު އިރު މުދައްރިސުންނާއި، ފޮތްތައްވެސް ހަމަކުރެވި، ކުރީ އަހަރުތަކަށްވުރެ ކިޔަވައިދިނުމުގެ ކަންކަން އިތުރަށް ރަނގަޅުވެފައިވާކަން ފާހަގަކުރައްވާފައެވެ. އަދި ދިރާސީ އަހަރުގެ ކިޔެވުން ފެށުމުގައި އެއްވެސް ދަތިކަމެއް ކުރިމަތިނުވާކަން ޕްރިންސިޕަލުން ފާހަގަކުރެއްވިއެވެ. މިބައްދަލުކުރެއްވުމުގައި ޕްރިންސިޕަލުން ވަނީ ސްކޫލުތަކަށް ކުރިމަތިވާ ޖާގައިގެ ދަތިކަމާއި މުދައްރިސުންނާއި ވަޞީީލަތުގެ ގޮތުން ކުރިމަތިވާ ދަތިތައް ރައީސުލްޖުމްހޫރިއްޔާގެ ނައިބް އާއި ހިއްސާކުރައްވާފައެވެ.
މިބައްދަލުކުރެއްވުމުގައި ކުުޅުދުއްފުށީ އަފީފުއްދީން ސްކޫލް އާއި ހދ. އަތޮޅު އަތޮޅު ތަަޢުލީމީ މަރުކަޒާއި ޖަލާލުއްދީން ސްކޫލުގެ އިސްވެރިން ބައިވެރިވެ ވަޑައިގެންނެވިއެވެ.
