ކޮންމެ ސަރުކާރަކުން ފެށި މަޝްރޫއެއް ނަމަވެސް އެމަޝްރޫއަކަށް އިހުތިރާމްކޮށް، އަދުގެ ސަރުކާރުން އެ މަޝްރޫއުތައް ނިންމާނެ ކަމަށް، ރައީސުލްޖުމްހޫރިއްޔާގެ ނައިބު ހުސެއިން މުހައްމަދު ލަތީފް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އއ. އުކުޅަހުގެ ފުޓުބޯޅަ ދަނޑު ހުޅުއްވައިދެއްވުމަށްފަހު ދެއްކެވި ވާހަކަފުޅުގައެވެ.
އުކުޅަހުގައި ހުޅުވި މި ފުޓުބޯޅަ ދަނޑު، މިކަމުގެ ނަމޫނާއަކަށް ފުދޭކަން ފާހަގަކުރައްވައި ނައިބު ރައީސް ވިދާޅުވީ، މިގޮތަށް ނުނިމި ހުރި ހުރިހާ ދަނޑުތަކެއް މި ސަރުކާރުން ނިންމާނެ ކަމަށެވެ. އަދި ކޮންމެ ސަރުކާރަކުން ފެށި މަޝްރޫއެއް ނަމަވެސް އެމަޝްރޫއެއް ކުރިއަށް ގެންދާނެ ކަމަށް ނައިބު ރައީސް ވިދާޅުވިއެވެ.
ޒުވާނުންނަށް އިޝާރަތް ކުރައްވައި ނައިބު ރައީސް ވިދާޅުވީ ޒުވާނުންނަކީ މި ގައުމުގެ ހަކަތަ ކަމަށާއި، ޒުވާނުން ޒުވާނުންގެ ގޮތުގައި މިސަރުކާރުން ބަލައިގަންނާނެ ކަމަށެވެ. އަދި އެހަކަތައިގައި ވަރު ނެތްކަމުގައިވާނަމަ ދިވެހި ގައުމު ނުހިނގާނޭކަން ފާހަގަކުރައްވައި ނައިބު ރައީސް ވިދާޅުވީ ޒުވާނުންގެ އަޑު އަހައިގެން، ޒުވާނުންނަށް ހުރި ކަންކަން ފުރިހަމަ ކުރުމަށް މި ސަރުކާރުން އަހަންމިއްޔަތުކަންދޭނެ ކަމަށެވެ.
މީގެ އިތުރުން ފުޓްބޯޅަ ދަނޑު ހުޅުއްވައިދެއްވައި، ކުޅުނު މެޗުގައި ބޭނުންކުރި ބޯޅައިގައި ނައިބު ރައީސް ވަނީ ސޮއިކުރައްވާފައިވެއެވެ. ދަނޑު ހުޅުވުމުގެ މުނާސަބަތުގައި ކުޅުނު މެޗުގައި ވާދަކުރީ، ދިވެހިރާއްޖޭގެ ގައުމީ ޓީމުގެ ކުރީގެ ކުޅުންތެރިންގެ މައްޗަށް އެކުލަވާލާފައިވާ ލެޖެންޑުންގެ ޓީމަކާއި، އުކުޅަހު ޒުވާނުންގެ ޓީމެކެވެ.
ނައިބު ރައީސް މިމޭރުމުން ވާހަކަފުޅު ދެއްކެވި ނަމަވެސް ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ފަށާފައިވާ ގިނަ މަޝްރޫއުތައް ހުއްޓާލާފައިވާ ކަމަށް ބުނެ، ގިނަ އަދަދެއްގެ އާއްމު ރައްޔިތުން ދަނީ ކަންބޮޑުވުން ފާޅު ކުރަމުންނެވެ. އަދި ސިޔާސީ އިދިކޮޅު ޕާޓީތަކުގެ މެންބަރުންނާއި، އާއްމު ރައްޔިތުންގެ ބޮޑެތި ފާޑުކިޔުންތަކެއް ސަރުކާރަށް ވަނީ އަމާޒުވެފައެވެ.
