އަންނަ އަހަރުގެ އެކްސްޕޯއަށް އެމްޓީސީސީން ކުރާ އުންމީދު ބޮޑު: އާޒިމް
މިއީ 7 ވަނަ މެރިން އެކްސްޕޯ
އެމްޓީސީސީގެ ސީއީއޯ އާދަމް އާޒިމް
އަންނަ އަހަރުގެ މެރިން އެކްސްޕޯއަށް އެމްޓީސީސީން ދުރާލައި ތައްޔާރުވާނެކަމަށާއި، އަންނަ އަހަރު ކުރީގެ އަހަރުތަކަށްވުރެ ފުޅާ ދާއިރާއެއްގައި މެރިން އެކްސްޕޯގައި އެމްޓީސީސީގެ ބައިވެރިވުން ފެނިގެންދާނެކަަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ އެމްވީއަށް މައުލޫމާތުދެއްވަމުން އާޒިމް ވަނީ، އަންނަ އަހަރު އެކްސްޕޯގައި ބައިވެރިވާނީ އެމްޓީސީސީގެ ހުރިހާ ޚިދުމަތެއް ފެނިގެންދާނެގޮތަށް ކަމަށް ވިދާޅުވެފައެވެ. އަދި މިހާރު ޖާގަ ލިބިފައިވާގޮތުން އެންމެ ފުރިހަމައަށް އެމްޓީސީސީގެ ޕްރޮޑަކްޓްތައް ނުފެންނަކަަމަށް އޭނާ ވިދާޅުވިއެވެ.
އެމްޓީސީސީގެ ސްޓޯލަށް ހީނުކުރާ ވަރުގެ ބޮޑު ތަރުހީބެއް ލިިބިފައިވާކަމަށާއި، ސްޓޯލަށް ޒިޔާރަތްކުރި މީހުންގެ ތެރެއިން 50 އިންސައްތަ މީހުން ޕްރޮޑަކްޓްތައް ގަންނަން ނިންމާފައިވާކަމަށް އޭނާ ވިދާޅުވިއެވެ. މިއީ އެމްޓީސީސީ މެރިން އެކްސްޕޯއިން، މެއިން ސްޕޮންސަރގެ ގޮތުގައި ހަރަކާތްތެރިވާ 7 ވަނަ އަހަރު ކަަމަށް ވާއިރު، އެއީ މި އިވެންޓް ކުރިއަށް ގެންދިއުމަށާއި، ރާއްޖޭގެ ބޯޓިންގ ދާއިރާއަށް ލިބޭ ބޮޑު ކުރިއެރުމެއްކަން އޭނާ ވަނީ ފާހަގަކުރައްވާފައެވެ.
މިއީ މެރިން އެކްސްޕޯ ބާއްވާ 7 ވަނަ ފަހަރުކަން ފާހަގަކޮށްލެވެއެވެ. މެރިން އެކްސްޕޯއާ ގުޅޭގޮތުން ނޫސްވެރިންނާ ވާހަކަފުޅުދައްކަވަމުން މޯލްޑިވްސް ބޯޑިންގ އެސޯސިއޭޝަންގެ ރައީސް އިސްމާއިލް ހަމީދު ވަނީ، މި އެކްސްޕޯއަކީ ކުރިއަށް އޮތްތަނުގައި މިހާރަށްވުރެވެސް ފުޅާކޮށް ކުރިއަށްގެންދާ އިވެންޓަކަށް ހެދުމަށް އުންމީދުކުރައްވާކަން ފާހަގަކުރައްވާފައެވެ. މި އެކްސްޕޯއަކީ މެރިން އިންޑަސްޓްރީގެ "މާކެޓް ޕްލޭސް"ގެ ގޮތުގައި އޭނާ ވަނީ ސިފަކުރައްވާފައެވެ.
