މަގޫދޫއަށް އިތުރުވެގެންދާ ބިމާއިއެކު ލޯކަލް ޓޫރިޒަމް ފުޅާވެ ބޯހިޔާވަހިކަމުގެ މައްސަލައަށް ހައްލު އަންނާނެ: ކައުންސިލް ރައީސް

ފ. މަގޫދޫ ބިން ހިއްކާ ގޮނޑުދޮށް ހިމާޔަތްކުރުމުގެ މަޝްރޫޢުގެ ދަށުން، 17 ހެކްޓަރުގެ ސަރަޙައްދެއްގެ ބިން ހިއްކުމަށް ހަމަޖެހިފައިވާއިރު އިތުރުވެގެންދާ ބިމާއެކު ރަށަށް މިހާރު ދިމާވެފައިވާ ގިނަ މައްސަލަތަކަކަށް ހައްލު އަންނާނެކަމަށް ކައުންސިލުގެ ރައީސް އަބްދުﷲ ވަހީދު ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އަބްދުﷲ ވަހީދު ވިދާޅުވީ ރަށަށް އިތުރުވާ ބިން ބޭނުންކުރާނެ ގޮތް މިހާރު ތަރުތީބުކުރެވިފައިވާކަމަށެވެ. މަގޫދޫ އަކީ މިހާރުވެސް ގެސްޓް ހައުސް ވިޔަފާރި ކުރިޔަށްދާ ރަށަކަށްވާއިރު ރަށުގައި ޖާގަ ނެތުމުގެ ސަބަބުން އެކަން އިތުރަށް ކުރިއެރުވުމަށް ދަތިތަކެއް ހުރިކަމަށް އަބްދުﷲ ވަހީދު ވިދާޅުވިއެވެ. ނަމަވެސް ރަށުގެ ބިން ހިއްކުމާއެކު އެކަމަށް ހައްލު އަންނާނެކަމަށް ކައުންސިލުގެ ރައީސް ވިދާޅުވިއެވެ.

މީގެއިތުރުން ބޯހިޔާވަހިކަމުގެ ދަތިކަން ހައްލުވެގެންދާނެކަމަށް އަބްދުﷲ ވަހީދު ވިދާޅުވިއެވެ. އެންމެ ފަހުން މީގެ ހަތަރުވަރަކަށް އަހަރު ކުރިން ގޯއްޗަށް ހުޅުވާލިއިރު ޝަރުތުހަމަވާ 275 ފަރާތް ތިބިކަމަށާއި އޭގެތެރެއިން ގޯތި ލިބުނީ 55 ފަރާތަށްކަމަށް އަބްދުﷲ ވަހީދު ވިދާޅުވިއެވެ. އެހެންކަމުން މިހާރު އިތުރުވެގެންދާ ބިމާއެކު އެކަމަށް ހައްލު އަންނާނެކަމަށް ވިދާޅުވިއެވެ.

ބިން ހިއްކުމުގެ މަޝްރޫޢު ނިމުމާއެކު އެންމެ ފުރަތަމަ ކުރާނެކަމަކީ ގޯތި ދޫކުރުންކަމަށް އަބްދުﷲ ވަހީދު ވިދާޅުވިއެވެ. މީގެއިތުރުން އިތުރުވެގެންދާ ބިމާއެކު ރަށުގައި އިގްތިޞާދީ މަސައްކަތްތައް އިތުރަށް ފުޅާވެގެންދާނެކަމަށް އަބްދުﷲ ވަހީދު ވިދާޅުވިއެވެ.

މީގެއިތުރުން އެއާޕޯޓެއް އެޅިގެންދިޔުމަކީ މަގޫދޫގެ ރައްޔިތުންގެ އިތުރުން ފ އަތޮޅުގެ ރައްޔިތުންވެސް ނުހަނު ބޭނުންވެފައިވާކަމެއްކަމަށާއި އެކަން ފުރިހަމަވެގެންދާ ދިޔުމަކީ ލިބޭ އުފަލެއްކަމަށް އަބްދުﷲ ވަހީދު ވިދާޅުވިއެވެ.

މިހާރުވެސް އެއާޕޯޓް އެޅުމަށް ބިން ހިއްކުމުގެ މަސައްކަތް ކުރަމުންދާކަމަށާއި އަންނަ އަހަރުގެ އޮކްޓޯބަރ ހިސާބުގައި އެއާޕޯޓް ހުޅުވިގެންދާނެކަމަށް ސަރުކާރުން ބުނެފައިވާކަމަށް އަބްދުﷲ ވަހީދު ވިދާޅުވިއެވެ.

ބިން ހިއްކާ ގޮނޑުދޮށް ހިމާޔަތްކުރުމުގެ މަޝްރޫޢުގެ ދަށުން، 17 ހެކްޓަރުގެ ސަރަޙައްދެއްގެ ބިން ހިއްކުމާއި، އެއަރޕޯޓް ޤާއިމުކުރުމަށްޓަކައި 30.8 ހެކްޓަރުގެ ސަރަޙައްދެއްގެ ބިން ޖުމްލަ 47.8 ހެކްޓަރުގެ ބިން ހިއްކާނެއެވެ. މީގެއިތުރުން 3339 މީޓަރުގެ ސަރަޙައްދެއްގައި ރިވެޓްމަންޓް ޖެހުމާއި، 90 މީޓަރުގެ ސަރަޙައްދެއްގައި ގްރޮއިން ޖެހުމުގެ މަސައްކަތް ކުރެވިގެންދާނެއެވެ. މި މަޝްރޫއަކީ 206.88 މިލިއަން ރުފިޔާގެ މަޝްރޫޢެކެވެ.