ހަމަޖެހުމެއްނެތް މުޖުތަމައެއް ކުރިއަރާނެ ގޮތެއް ނޯންނާނެ: ހޯމް މިނިސްޓަރ
10 އޯގަސްޓު 2022 | ބުދަ 11:44ރައްޔިތުންގެ ކުރިއެރުމާއި ތަރައްގީ ބިނާވެފައި އޮންނަނީ އެބައެއްގެ މެދުގައި އޮންނަ އަމަންއަމާންކަމާއި ހަމަޖެހުމަށް
މިނިސްޓަރ އޮފް ހޯމް އެފެއަރޒް އައްޝައިޚް އިމްރާން އަބްދުﷲ
ހަމަޖެހުމެއް ނެތް މުޖުތަމައެއް ކުރިއަރާނެ ގޮތެއް ނޯންނާނެކަމަށް ހޯމް މިނިސްޓަރ, އައްޝައިޚް އިމްރާން އަބްދުﷲ ވިދާޅުވެއްޖެއެވެ.
އަތޮޅު ތެރޭގައި ފުލުހުންގެ ޚިދުމަތް ތަރައްގީކުރުމަށް ރާއްޖޭގެ ތާރީޚުގައި ހިންގޭ އެންމެ ބިޔަ މަޝްރޫއުގެ ބިންގާ އެޅުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ރައްޔިތުންގެ ކުރިއެރުމާއި ތަރައްގީ ބިނާވެފައި އޮންނަނީ އެބައެއްގެ މެދުގައި އޮންނަ އަމަންއަމާންކަމާއި ހަމަޖެހުމާއި ސުލްހަވެރިކަމުގެ މައްޗަށް ކަމަށެވެ. ފުލުހުންގެ މަސައްކަތް އިތުރަށް ހަރުދަނާކޮށް ފުޅާކޮށް، ފުލުހުންނާމެދު ދިވެހިންގެ ތަސައްވަރު ރަނގަޅުކޮށް، ފުލުހުންނަކީ ދިވެހިން އިހުތިރާމްކުރާ، އިތުބާރުކުރާ ބަޔަކަށް ހެދުމަށް ގިނަގުނަ މަސައްކަތްތައް ކުރަންޖެހޭކަންވެސް އެމަނިކުފާނު ފާހަގަކުރެއްވިއެވެ.
ކ. ތުލުސްދޫގައި އޮތް މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވިދާޅުވީ، ރައީސް އިބްރާހީމް މުހައްމަދު ސޯލިހުގެ ސަރުކާރުން މަސައްކަތް ފެށުމާއެކު، އަތޮޅުތެރޭގެ ރައްޔިތުންނަށް ފުލުހުންގެ ޚިދުމަތް ގާތުން ފުރިހަމަކޮށްދިނުމުގެ އިހުސާސް ވަރަށް ބޮޑަށް ކުރެވުނު ކަމަށެވެ.
މިނިސްޓަރ ވިދާޅުވީ، މިއީ ދިވެހި ރައްޔިތުންގެ ސަލާމަތާއި ރައްކާތެރިކަމަށްޓަކައި ރައީސުލްޖުމްހޫރިއްޔާއާއި އިކޮނޮމިކް މިނިސްޓަރާއި އިންޑިއާ ސަރުކާރާއި އެނޫންވެސް ގިނަ ފަރާތްތަކެއް ގުޅިގެން ކުރެވުނު ކާމިޔާބު މަސއްކަތެއްގެ ނަތީޖާ ކަމަށާއި، އެހެންކަމުން، މި ބިޔަ މަޝްރޫއަށް އެހިތެރިވެދެއްވި ހުރިހާ ފަރާތްކަށް މިނިސްޓަރ ވަނީ ޝުކުރު ދަންނަވާފައެވެ.
މިނިސްޓަރ ވިދާޅުވީ، ފުލުހުންގެ ޚިދުމަށް ހަރުދަނާކޮށް ފުޅާކޮށް ކުރުމަކީ ދައުލަތާއި ސަރުކާރުން ރައްޔިތުންނަށް ފޯރުކޮށްދޭންޖެހޭ އެންމެ މުހިންމު އެއް ޚިދުމަތް ކަމަށެވެ.
ބިންގާއެޅިގެންދިޔަ، ފުލުހުންގެ އުމްރާނީ ތަރައްގީގެ މަޝްރޫއުގައި ހިމެނެނީ، ދޫނިދޫގައި ކަސްޓޯޑިއަލް ފެސިލިޓީއެއް ގާއިމުކުރުމާއި، ވިލިމާލޭގައި 400 މީހުންގެ ޖާގައިގެ އެކޮމޮޑޭޝަން އިމާރާތެއް އެޅުމާއި، ދ. ވާނީގައި ހުންނަ ފުލުހުންގެ ތަމްރީނު މަރުކަޒުގައި 100 މީހުންގެ އެކޮމޮޑޭޝަން އިމާރާތެއް އެޅުމެވެ.
މީގެ އިތުރުން ގއ. ވިލިގިއްޔާއި ހއ. ދިއްދޫގައި ހުންނަ ޕޮލިސް ސްޓޭޝަންގައި އެކޮމޮޑޭޝަން އިމާރާތް ގާއިމުކުރުމާއި، ހދ. ކުޅުދުއްފުއްޓާއި ހައްދުންމަތީ ގަމުގައި ހުންނަ ޕޮލިސް ސްޓޭޝަން، ރީޖަނަލް ހެޑްކުއާޓަރަށް ބަދަލުކޮށް އެސަރަހައްދުތަކުގައި އިތުރު 5 ސެލްއެއް ގާއިމްކުރުންވެސް ހިމެނެއެވެ.
މީގެ އިތުރުން ހުޅުމާލެ ފޭސް 2ގެ ޕޮލިސް ސްޓޭޝަން އެޅުމާއި، މާލޭގެ ގަލޮޅު ޕޮލިސް ސްޓޭޝަން އެޅުމުގެ އިތުރުން، އަތޮޅު ފެންވަރުގެ އިތުރު 8 ޕޮލިސް ސްޓޭޝަން ގާއިމުކުރުންވެސް މި މަޝްރޫގެ ތެރޭގައި ހިމެނެއެވެ. މީގެ އިތުރުން ރަށު ފެންވަރުގެ 23 ޕޮލިސް ސްޓޭޝަނާއި 21 ޕޮލިސް ޕޯސްޓެއްވެސް މި ޕްރޮޖެކްޓްގެ ތެރެއިން ގާއިމުކުރެވޭނެއެވެ.
730 ދުވަހުގެ ތެރޭގައި ނިންމުމަށް ހަމަޖެހިފައިވާ މި މަޝްރޫއުގެ ޖުމްލަ އަގަކީ 48،176،529 (ސާޅީސް އަށް މިލިއަން އެއްލައްކަ ހަތްދިހަ ހަ ހާސް ފަސް ސަތޭކަ ނަވާވީސް) ޔޫއެސް ޑޮލަރެވެ.
