ޕާކިސްތާނުގެ ބަލޮޗިސްތާންގައި އަދިވެސް ފެންބޮޑުވެ އެތައްހާސް ބަޔަކު ހާލުގައި ޖެހިފައި
10 އޯގަސްޓު 2022 | ބުދަ 09:51ފެނާއި ކިސަޑުގެ ސަބަބުން 50ހާހެއްހާ ޖިފުޓި ހަލާކުވެ އެތައްހާސް ބަޔަކުވަނީ ވަންނާނެ ތަނެއް ނެތިފައި
ޕާކިސްތާނުގައި ފެންބޮޑުވުން
ޕާކިސްތާނުގެ ބަލޮޗިސްތާނަށް މިދިޔަ ޖޫން މަހުން ފެށިގެން ކުރަމުން އަންނަ ވިއްސާރައިގައި ބޮޑުވި ފެންގަނޑު އަދިވެސް ނުހިނދޭ ކަމަށް ޚަބަރު ލިބިއްޖެއެވެ.
ފެންބޮޑުވެ ދިމާވި އެކި ހާދިސާތަކުގައި މިހާތަނަށް 500 މީހުން ވަނީ މަރުވެފައެވެ. އަދި އަވަށްތަކުގައި އާދައިގެ ގޮތަކަށް އަޅާފައިވާ ފަންސާސް ހާހެއްހާ ގެ ނުވަތަ ޖިފުޓި މުޅިން ހަލާކުވެ އެތައްހާސް ބަޔަކުވަނީ ވަންނާނެ ހިޔާވަހި ކަމެއް ކާނެ އެއްޗެއް ނެތިފައެވެ.
ޕާކިސްތާންގެ މިހިސާބަށް މޫސުމީ ވިއްސާރަ ކުރަން ފެށީ ޖޫން މަހުގެ މެދެއްހާ ހިސާބުގައެވެ. އެގައުމުގެ ޑިޒާސްޓަރ މެނޭޖްމަންޓް އޮތޯރިޓީ އިން ބުނި ގޮތުގައި މި އަހަރު ވާރޭ ވެހުނު މިންވަރު އެހެން އަހަރުތަކުގައި ވެހޭ ވަރަށް ވުރެ 133 އިންސައްތަ އިތުރު ކަމަށެވެ.
އަނެއްކޮޅުން މޫސުމާބެހޭ ޑިޕާޓްމަންޓުން ބުދަ ދުވަހު ވަނީ އަނެއްކާވެސް ބޯ ވާރޭގެ ކޮޅިގަނޑެއް އަންނަން ތައްޔާރުވެފައިވާކަމަށް ބުނެފައެވެ. ކުރީފަހަރު ބޮޑުވި ފެންގަނޑު ކިރިޔާ ހިނދެން ފަށާފައިވަނިކޮށް އަނެއްކާވެސް އިތުރަށް ބޯވާރޭ ވެހިއްޖެ ނަމަ ގިނަ ބަޔަކު ވަރަށް ބޮޑަށް އިތުރަށް ހާލުގައި ޖެހޭނެއެވެ. މިހާރުވެސް ބަލޮޗިސްތާންގެ މަގުތަކުގައި ފެނާ ކިސަޑު ޖަމާވެފައި ވުމުގެ ސަބަބުން ދަތުރު ފަތުރު ކުރުމަށް ވަނީ ދަތިވެފައެވެ. އެހެންކަމުން އެހިސާބަށް އެހީގެ ތަކެތިވެސް ފޯރުކޮށް ދިނުމަށް ވަނީ ދަތިވެފައެވެ. ނަމަވެސް ސަރުކާރުން ވަނީ ފޭލިގެތަކެއް އަޅާ ކާބޯތަކެތި ފޯރުކޮށް ދިނުމުގެ މަސައްކަތް ފަށާފައެވެ.
ޕާކިސްތާންގެ ރަށް ފުށުގެ ގިނަ މީހުންނަކީ ދަނޑު ހައްދައިގެން ނުވަތަ ގެރިބަކަރިން ލިބޭ އެއްޗަކުން ދިރި އުޅޭ މީހުންނެވެ. އެހެންކަމުން ފެނުގެ ސަބަބުން ދަޑުތައް ހަލާކުވެ ގެރިބަކަރި މަރުވެފައި ވުމުން އެމީހުންގެ ހާލަތު ވަނީ ވަރަށް ގޯސްވެފައެވެ.
މިފަހަރު ކުރި ވިއްސާރައިގައި އަވަށްތަކުގެ އިތުރުން ވެރިރަށް ކަރާޗީއަށް ވެސް ވަނީ ވަރަށް ބޮޑަށް އަސަރުކޮށްފައެވެ. މިގޮތުން ކަރާޗީގެ މަގުތަކުގައިވެސް ވަނީ ފެންބޮޑުވެ ދަތުރު ފަތުރަށް ބުރޫ އަރާފައެވެ.
