އަސާސީ ގަވާއިދު ބުނާގޮތުން ރިޔާސީ ޓިކެޓް ލިބޭނީ ޕްރައިމަރީއަކުން: އެމްޑީޕީ
10 އޯގަސްޓު 2022 | ބުދަ 07:39ޕްރައިމަރީ އޮންނާނެ ތާރީހު އިއުލާން ކުރާނީ ޗެއަރޕާސަން
އެމްޑީޕީން ބޭއްވި ނޫސްވެރިންގެ ބައްދަލުވުން
އެމްޑީޕީގެ އަސާސީ ގަވާއިދު އަދި އޮތް ގޮތުން އެ ޕާޓީގެ ރިޔާސީ ޓިކެޓް ދެވޭނީ ޕްރައިމަރީއަށް ބޭއްވުމަށްފަހު ކަމަށް އެ ޕާޓީން ބުނެފިއެވެ.
އެމްޑީޕީގެ ހަތަރުވަނަ ކޮންގްރެސްއާ ގުޅޭގޮތުން މައުލޫމާތު ދިނުމަށް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޗެއަރޕާސަންގެ ނައިބުގެ މަގާމަށް އިންތީޚާބުވެފައިވާ އިބްރާހިމް ވަހީދު ވިދާޅުވީ ރިޔާސީ ޓިކެޓް ދޭގޮތް ބަދަލު ކުރާނަމަ އަސާސީ ގަވާއިދަށް އިސްލާހު ގެންނަން ޖެހޭނެ ކަމަށެވެ. ނަމަވެސް މިހާތަނަށް އެފަދަ އިސްލާހެއް ހުށަހަޅާފައި ނުވާ ކަމަށާއި އިސްލާހު ހުށަހެޅުމުގެ މުއްދަތުވެސް ހަމަވެފައިވާ ކަމަށް އޭނާ ވިދާޅުވިއެވެ.
އިބްރާހިމް ވަހީދު ވިދާޅުވީ އަސާސީ ގަވާއިދަށް ގެންނަން ހުށަހަޅާފައިވާ ބަދަލުތަކުގެ ތެރޭގައި މައިގަނޑުގޮތެއްގައި ހިމެނެނީ ހިންގުމުގައި ހުރި ދަތިތަކާ ގުޅޭ އިސްލާހުތައް ކަމަށެވެ. އަދި ޕާޓީގެ ރައީސްއާއި ޑެޕިއުޓީ ޗެއާޕާސަން ހޮވުމާ ގުޅޭ އިސްލާހުތަކެއް ހުށަހަޅާފައިވާ ކަމަށާއި ނައިބު ރައީސްއަކީ ޤައުމީ މަޖިލީހުގެ ރުހުމާއެކު އައްޔަންކޮށްފައިވާ ބޭފުޅަކަށް ހެދުން ފަދަ އިސްލާހުތައް ހުށަހަޅާފައިވާ ކަމަށް ވެސް އޭނާ ވިދާޅުވިއެވެ.
އެމްޑީޕީ އަސާސީ ގަވާއިދުގައި ބުނާ ގޮތުން އެމްޑީޕީގެ ޗެއަރޕާސަންގެ އިންތިޚާބު ފިޔަވައި އެހެން ހުރިހާ އިންތިޚާބެއް އިއުލާން ކުރާނީ އެ ޕާޓީގެ ޗެއާޕާސަންއެވެ. ރިޔާސީ ކެންޑިޑޭޓަކު ހޮވަން ބާއްވާ ޕްރައިމަރީ އިންތިޚާބު މާލަސްތަކެއް ނުވެ އިއުލާން ކުރާނެ ކަމަށް އުއްމީދު ކުރައްވާ ކަމަށް ވެސް އިބްރާހިމް ވަހީދު ވިދާޅުވިއެވެ.
އެމްޑީޕީގެ ފަރާތުން ރިޔާސީ އިންތިޚާބުގައި ވާދަ ކުރައްވާނެ ކެންޑިޑޭޓަކާ ގުޅޭގޮތުން ގިނަ ބަޔަކު ޚިޔާލު ފާޅުކުރަމުން އަންނައިރު ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހުއަށް ދެވަނަ ދައުރެއް ދޭން ޖެހޭ ކަމަށް ގިނަ ބަޔަކު ވަނީ ބުނެފައެވެ. ރައީސް ވަނީ ޕްރައިމަރީގައި ވާދަކުރައްވާނެ ކަމަށާއި އެޕާޓީގެ ޓިކެޓުގައި ވާދަކުރައްވަން ތައްޔާރަށް ހުންނެވި ކަމަށް ވެސް ވިދާޅުވެފައެވެ.
އެމްޑީޕީގެ ކޮންގްރެސް މި މަހުގެ 19 އިން 21 އަށް ބާއްވަން ވަނީ ތަވާލުކޮށްފައެވެ. މި ކޮންގްރެސްގައި އެ ޕާޓީގެ ހިންގާ ގަވާއިދަށް ބަދަލު ގެނައުމަށް ވަނީ އިސްލާހުތައް ހުށަހަޅައިފައެވެ. އަދި ޤާނޫނު އަސާސީއާއި ވެރިކަމުގެ ނިޒާމަށް ގެންނަން ބޭނުންވާ ބަދަލުތަކާ ގުޅޭގޮތުން ވެސް މަޝްވަރާ ކުރާނެއެވެ.
