ކޮލަމްބިއާގެ އައު ރައީސް ގުސްޓާވޯ ހުވާ ކުރައްވައިފި

ކޮލަމްބީއާގެ އައު ރައީސްއަކަށް ހޮވިވަޑައިގެންނެވި ގުސްޓާވޯ ޕެޓްރޯ މަގާމުގެ ހުވާ ކުރައްވައިފިއެވެ.

ގުސްޓާވޯ އަކީ އެ ޤައުމުގެ ފުރަަތަމަ ލެފްޓިސްޓް ރައީސް އެވެ. އެމަނިކުފާނު ވެރިކަމުގެ ހުވާ ކުރެއްވީ އާދީއްތަ ދުވަހުގެ މެންދުރުގެ ވަގުތެއްގައި ކޮލަމްބިއާގެ ވެރިރަށް ބޯގަޓާގައި ބޭއްވި ރަސްމިއްޔާތެއްގައެވެ.

ކޮލަމްބިއާގެ ރައްޔިތުން ގުސްޓާވޯ ވެރިކަމަށް ގެނައީ އެ ޤައުމުގެ މިހާރުގެ ހާލަތުން އަރައިގަނެވޭނެ ކަމުގެ އުއްމީދުގައެވެ. އެގޮތުން، އިޖުތިމާއީ ގޮތުންނާއި އިގްތިސާދީ ގޮތުން ޤައުމު ކުރިއަރުވައި ރައްޔިތުންގެ މެދުގައި އޮތް ފަރަގު ނައްތާލައި ކުށްތައް މަދު ކުރުމަށް އެމަނިކުފާނު މަސައްކަތް ކުރައްވާނެ ކަމަށް ވަނީ ވައުދުވެވަޑައިގެންފައެވެ.

އެމަނިކުފާނު ވެރިކަމާ ހަވާލުވެވަޑައިގެން އެންމެ ފުރަތަމަ ކަމަކަށް ކުރައްވާނީ އެ ޤައުމުގައިއޮތް ބަނޑުހައިހޫނު ކަމާ ދެކޮޅަށް މަސައްކަތް ކުރެއްވުން ކަމަށް ގުސްޓާވޯ ވަނީ ވިދާޅުވެފައެވެ. އެ ޤައުުމުގައި ދިރިއުޅޭ 50 މިލިއަނަށް ވުރެ ގިނަމީހުންނަކީ ފަގީރުންނެވެ. މިއީ ގާތްގަނޑަކަށް އެ ޤައުމުގެ އާބާދީގެ އެއްބަޔާ ގާތް ކުރާ އަދަދެއް ކަމަށް ރޮއިޓަރސްގައި ވަނީ ރިޕޯޓް ކޮށްފައެެވެ.

ގުސްޓާވޯވަނީ ވެރިކަމަށް ވަޑައިގެންނެވުމުގެ ކުރިން އެ ޤައުމުގެ ޤާނޫނު ހަދާ މަޖިލީހުގެ މެމްބަރުކަމާއި ވެރިރަށް ބޯގަޓާގެ މޭޔަރުގެ މަގާމުވެސް ފުރުއްވާފައެވެ.

ގުސްޓާވޯގެ ނައިބުގެ ގޮތުގައި ހުވާ ކުރެއްވީ ފްރާންސިއާ މަރކުއެޒް އެވެ. ކޮލަމްބިއާގެ ހައުސް ސްޕީކަރގެ މަގާމު ފުރުއްވާފައިވާ މަރކުއެޒް އަކީ އެ ޤައުމުގެ ފުރަތަމަ އެފްރޯ-ކޮލަމްބިއަން އަންހެން ނައިބުރައީސްއެވެ.