ބްރައިޓަންގެ އަތްދަށުވެ ޔުނައިޓެޑަށް ލީގުގެ ފެށުން ގޯސް
7 އޯގަސްޓު 2022 | އާދީއްތަ 16:54ބްރައިޓަން އަތުން ޔުނައިޓެޑް ބަލިވީ 2-1ން
މެންޗެސްޓަރ ޔުނައިޓެޑާއި ބްރައިޓަން ބައްދަލުކުރި މެޗުގެތެރެއިން
ބްރައިޓަންގެ އަތްދަށުވެ މެންޗެސްޓަރ ޔުނައިޓެޑަށް އިނގިރޭސި ޕްރިމިއަރ ލީގުގެ ފެށުން ގޯސްވެއްޖެއެވެ.
ޔުނައިޓެޑްގެ އޯލްޑް ޓްރެފޯޑް ސްޓޭޑިއަމްގައި މިރޭ ކުޅުނު މެޗުން ބްރައިޓަން ކުރިހޯދީ 2-1ގެ ނަތީޖާއަކުންނެވެ. ބްރައިޓަންއިން ވަނީ މެޗުގެ ފުރަތަމަ ހާފުގައި ދެލަނޑު ޖަހާފައެވެ. ބްރައިޓަންގެ ދެލަނޑުވެސް އެޓީމަށް ކާމިޔާބުކޮށްދިނީ ޕަސްކާލް ގްރޯސްއެވެ. މެޗުގެ ފުރަތަމަ ހާފުގައި ބްރައިޓަންއިން ދެލަނޑުގެ ލީޑެއް ނެގުމުން އެރިކް ޓެންހާގަށް ވަނީ ނަތީޖާ އަނބުރާލުމުގައި ނާކާމިޔާބުވެފައެވެ.
މެޗުގެ ފުރަތަމަ ހާފު ޔުނައިޓެޑުން ކުޅުނު ޓީމުގެ ތަރި ކްރިސްޓިއާނޯ ރޮނާލްޑޯ ބެންޗުގައި ބައިންދައިގެންނެވެ. ނަމަވެސް ދެވަނަ ހާފުގައި ޓެން ހާގް ވަނީ ރޮނާލްޑޯއަށް ފުރުސަތު ދީފައެވެ. އަދި ފުރަތަމަ ހާފުގައި ސެންޓަރ ފޯވާޑަށް ކުޅުނު ކްރިސްޓެން އެރިކްސަން މެދުތެރެއަށް ބަދަލުކޮށް ރޮނާލްޑޯއަށް އެޓޭކިންގ ރޯލު ދިނެވެ. ނަމަވެސް ރޮނާލްޑޯއަށް މި މެޗުގައި ނަތީޖާ އަނބުރާލެވޭގޮތް ނުވިއެވެ.
ޔުނައިޓެޑްގެ ހަމައެކަނި ލަނޑަކީ ބްރައިޓަންގެ އެލެކްސިސް މެކަލިސްޓާ އަތުން ބައިކޮޅަށް ވަން ލަނޑެކެވެ. އޭގެ ފަހުން ޔުނައިޓެޑްގެ މާކަސް ރަޝްފޯޑާއި މާޓިނޭޒްއަށް ލަނޑު ޖަހަން ފުރުސަތު ލިބުނުނަމަވެސް ފުރުސަތުގެ ބޭނުން ނުހިފުނެވެ.
