ޤައުމު ބިނާ ކުރުމުގައި މުދައްރިސުން އަދާކުރާ ދައުރު މިސަރުކާރުން ބަލައިގަނޭ: މިނިސްޓަރު

ޤައުމު ބިނާ ކުރުމުގައި މުދައްރިސުން އަދާކުރާ ދައުރު މި ސަރުކާރުން ބަލައިގަންނަކަމަށް އެޑިއުކޭޝަން މިނިސްޓަރު ޑރ އާއިޝަތު އަލީ ވިދާޅުވެއްޖެއެވެ.

ދިރާސީ އައު އަހަރު ފެށުމުގެ ގޮތުން އަމީނިއްޔާ ސުކޫލުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ކޮންމެ ދަރިވަރަކުވެސް ކާމިޔާބު މީހަކަށް ވާން ބޭނުންވާނެ ކަމަށެވެ. މިނިސްޓަރު ވިދާޅުވީ، އެކި ކުދިން ޚާއްސަވާނީ އެކި ދާއިރާތަކުން ކަމަށެވެ. އެކަމުގެ މިސާލެއްވެސް މިނިސްޓަރު ވަނީ ވާހަކައެއްގެ ޒަރިއްޔާއިން ހިއްސާ ކުރައްވާފައެވެ.

މިނިސްޓަރު ވިދާޅުވީ، ހުރިހާ ކުދިން ހުރިހާ މާއްދާއަކުން މޮޅުވުމަކީ ނާދިރުކަމެއް ކަމަށެވެ. ކޮންމެ ކުއްޖެއްގެ ޤާބިލިއްޔަތުކަމާއި ހުނަރުވެސް ތަފާތުވާނެކަން މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ، ކާމިޔާބީއަށް ވާސިލުވުމަށް ކޮންމެ ކުއްޖަކުވެސް އެކުއްޖެއްގެ ހުނަރާއި ޤާބިލިއްޔަތު އަމިއްލައަށް ދެނެގަންނަން ޖެހޭ ކަމަށެވެ. ކާމިޔާބީގެ ސިއްރަކީ އެގޮތުގެ މަތިން ކެނޑިނޭޅި ކުރާ މަސައްކަތްކަން މިނިސްޓަރު ފާހަގަކުރެއްވިއެވެ.

ޤައުމު ބިނާ ކުރުމުގައި މުދައްރިސުން އަދާކުރާ ދައުރު މި ސަރުކާރުން ބަލައިގަންނަކަންވެސް މިނިސްޓަރުގެ ވާހަކަފުޅުގައި ފާހަގަ ކުރެއްވިއެވެ. އެގޮތުން މުދައްރިސުންގެ މުސާރަ ބޮޑުކޮށްދިނުމަކީވެސް އެކަމުގެ ހެއްކެއްކަމަށް މިނިސްޓަރު ވިދާޅުވިއެވެ.

މި ރަސްމިއްޔާތުގައި އަމީނިއްޔާ ސުކޫލުގެ ދަރިވަރުން ވަނީ ދުވަހާއި ގުޅޭ ޚާއްސަ ދުއާއެއްގައި ބައިވެރިވެފައެވެ.