92،000 އަށް ވުރެ ގިނަ ދަރިވަރުންނާއެކު ދިރާސީ އާ އަހަރުގެ ކިޔެވުން ފަށައިފި
7 އޯގަސްޓު 2022 | އާދީއްތަ 03:38ދިރާރީ އާ އަހަރު ފެށުނު އިރު 7699 ޓީޗަރުން އެބަ ތިބި
ސްކޫލް އެސަމްބްލީގައި ދަރިވަރުން ބައިވެރިވަނީ
ދޮޅު މަސް ދުވަހުގެ ބަންދަކަށް ފަހު 93278 ދަރިވަރުންނާ އެކު ދިރާސީ އަހަރުގެ ކިޔެވުން ފަށައިފިއެވެ.
ރާއްޖޭގެ 217 ސްކޫލެއްގައި އާދިއްތަ ދުވަހު ކިޔެވުން ފަށާފައިވާއިރު ސްކޫލްތަކުން ވަނީ ދަރިވަރުންނަށް ވަރަށް ހޫނު މަރުޚަބާއެއް ކިޔާފައެވެ. ބައެއް ސްކޫލްތަކުގައި ކުދިންނަށް މަރުޚަބާ ކިޔުމަށް ރަތް ދޫލަވެސް ވަނީ އަޅާފައެވެ. މީގެ އިތުރުން ސްކޫލް ގޯތި ތެރެއާއި ކުލާސްރޫމްތަކުގައި ދަރިވަރުންނާއި ގުޅުން ހުރި މެސެޖުތައް ލިޔެފައިވާ ބޯޑުތަކާއި ޕޯސްޓަރުތައް ހަރުކޮށްފައި ވާއިރު، ކުދިން ގަޔާވާނެ ފަދަ ގޮތަކަށް ކުލާސްރޫމްތައް ވަނީ ޒީނަތްތެރިކޮށްފައެވެ.
މި އަހަރު ޕްރައިވެޓް ސްކޫލްތައް ހިމެނޭހެން، މިއަހަރު އަލަށް ސްކޫލަށް ވަން ދަރިވަރުންގެ އަދަދަކީ 7700އެވެ. ދިރާސީ އާ އަހަރުގެ ކިޔެވުން ފެށި އިރު ރާއްޖޭގެ ސްކޫލްތަކުގައި އުނގަންނައިދޭ ޖުމްލަ 8,364 ޓީޗަރުން އެބަތިއްްބެވެ. އޭގެ ތެރޭގައި ހިމެނެނީ ބިދޭސީ 1،693 ޓީޗަރުންނާއި، 6،006 ދިވެހި ޓީޗަރުންގެ އިތުރުން ވަގުތީ ޓީޗަރުންގެ ގޮތުގައި އުނގަންނައިދޭ 665 ޓީޗަރުންނެވެ. ސްކޫލް ފެށުނު އިރު ހުރިހާ ސްކޫލެއްގައި ވެސް ޓީޗަރުން ހަމަވާނެ ކަމަށާއި ދަރިވަރުންނަށް ބޭނުންވާ ފޮތްތައް ހަމަވާނެ ކަމަށް ތައުލީމީ ވުޒާރާއިން ވަނީ ބުނެފައެވެ.
ސްކޫލްތަކުގެ ބޮޑު ޗުއްޓީ ފެށުމުގެ ކުރިން ސްކޫލްތަކަށް ޓީޗަރުން ހަމަކުރުމުގެ މަސައްކަތް އެ މިނިސްޓްރީއިން ވަނީ ފަށާފައެވެ. އެގޮތުން މުދައްރިސުން ބޭނުންވެގެން އެދިފައިވާ ސްކޫލްތަކަށް މިދިޔަ މިދިޔަ މަހުގެ ތިނަކުން ފެށިގެން މުދައްރިސުން ގެނެސްފައިވާކަމަށް އެޑިއުކޭޝަން މިނިސްޓްރީ އިން ވަނީ ބުނެފައެވެ. މީގެ އިތުރުން ރާއްޖެއަށް ގެންނަ ބިދޭސީ ޓީޗަރުންގެ މަސައްކަތް، އެހެން އަހަރުތަކާ ހިލާފަށް މި އަހަރު ވަރަށް އަވަހަށް ނިމިފައިވާ ކަަމަށް އެ މިނިސްޓްރީއިން ބުނެއެވެ.
މި އަހަރުގެ ފުރަތަމަ ޓާރމްގެ ކިޔެވުން ނިމޭނީ ޑިސެންބަރު މަހުގެ 22ވަނަ ދުވަހުއެވެ. އަދި ދެވަނަ ޓަރމްގެ ކިޔެވުން ފަށާނީ އަންނަ އަހަރުގެ ޖެނުއަރީ މަހުގެ 8 ވަނަ ދުވަހުއެވެ. ދެވަނަ ޓާމްގެ ކިޔެވުން ނިމޭނީ ޖޫންމަހުގެ 22ވަނަ ދުވަހުއެވެ.
