ފްލެޓް ހަވާލުކުރި ފުރަތަމަ ކުންފުންޏަކަށް ސްޓެލްކޯ

ހިޔާ މަޝްރޫޢުގެ ދަށުން ސްޓޭޓް އިލެކްޓްރިކް ކޮޮމްޕެނީ (ސްޓެލްކޯ)އިން ތަރައްޤީކޮށްފައިވާ ފްލެޓްތައް މުވައްޒަފުންނާ ހަވާލުކޮށްފިއެވެ.

ސްޓެލްކޯ އަކީ ހިޔާ މަޝްރޫޢުގެ ދަށުން ކުންފުނިތަކަށް ޚާއްސަ ފްލެޓްތަކުގެ ތެރެއިން އެންމެ އަވަހަށް ފްލެޓް ހަވާލުކުރި ކުންފުނިކަން ފާހަގަކޮށްލެވެއެވެ. ބުރާސްފަތި ދުވަހު ބޭއްވި ރަސްމިއްޔާތެއްގައި މި ފްލެޓްތައް ތަރައްޤީކުރުމަށް ހަވާލުކޮށްފައިވާ ޗައިނާގެ ކުންފުނިންވަނީ އެތަނުގެ މަސައްކަތް ނިންމާ ރަމްޒީ ތަޅުދަނޑި ސްޓެލްކޯއާއި ހަވާލުކޮށްފައެވެ. އެ ރަސްމިއްޔާތުގައި ސްޓެލްކޯއިންވަނީ ފްލެޓް ލިބުނު މުވައްޒަފުންނާއި ތަޅުދަނޑި ހަވާލުކޮށްފައެވެ.

މި މަޝްރޫޢު ފުރިހަމަކުރުމަށް ޖުމްލަ 692 މިލިއަން ރުފިޔާ ވަނީ ހޭދަކޮށްފައެވެ. އެހެންނަމަވެސް ފްލެޓްގެ އަގުގެ ގޮތުގައި މުވައްޒަފުންގެ އަތުން ނެގުމަށް ހަމަޖެހިފައިވަނީ 623 މިލިއަން ރުފިޔާއެވެ.ބާކީ 69މިލިއަން ރުފިޔާ ދައްކާނީ ސްޓެލްކޯއިން ކަމަށް އެ ކުންފުނިން މައުލޫމާތުދީފައިވެއެވެ. މީގެ އިތުރުން ފްލެޓްތަކުގެ ކުލި ކުންފުންފުނި މެދުވެރިކޮށް ދެއްކުމަށް ވެސް ސްޓެލްކޯ އިން ވަނީ ނިންމާފައެވެ. ސްޓެލްކޯ އިން ބުނިގޮތުގައި މިގޮތަށް ހަމަޖައްސާފައިވަނީ ބޭންކުތަކުން ލޯނު ނަގައިގެން ފްލެޓްތަކަށް ފައިސާދެއްކުމަކީ ޚަރަދު ބޮޑު ބުރަ ކަމަކަށް ވުމުންނެވެ.

ސްޓެލްކޯގެ ފްލެޓްތަކަށް ފައިސާ ދައްކަނީ 18 އަހަރަށް ބަހާލައިގެންނެވެ. އޭގެ ކުރިން ދައްކަން ޖެހޭ ޑައުންޕޭމަންޓް މިހާރު ދަނީ ދައްކަމުންނެވެ.މި މަޝްރޫޢުގެ ދަށުން ސްޓެލްކޯއިންވަނީ 2 ޓަވަރު ތަރައްޤީކޮށްފައެވެ. މި ދެ ޓަވަރުގައި ޖުމުލަ 360 ކޮޓަރި ހުރި އިރު އޭގެ ތެރޭގައި ހިމެނެނީ1 ކޮޓަރީގެ 72 އެޕާޓްމަންޓާއި، 2 ކޮޓަރިއާއި މެއިޑް ރޫމް ހިމެނޭ 288 އެޕާޓްމަންޓެވެ. 1 ކޮޓަރީގެ އެޕާޓްމަންޓަކަށް މަހު ކުލީގެ ގޮތުގައި 5622 ރުފިޔާ ދައްކަން ޖެހެއެވެ. އަދި 2 ކޮޓަރިއާއި މެއިޑް ރޫމް ހިމެނޭ ފްލެޓްތަކަށް ދައްކަންޖެހޭ މިންވަރު އުޅެނީ 10،356 ރުފިޔާއާއި 10،652 ރުފިޔާއާއި ދެމެދުގައެވެ. މީގެ އިތުރުން ފްލެޓްތަކުގެ މެއިންޓެނަންސް ފީގެ ގޮތުގައި އިތުރު 1000 ރުފިޔާ ދައްކަން ޖެހެއެވެ.

މިހާތަނަށް 306 މީހުންވަނީ ފްލެޓުގެ އެއްބަސްވުމުގައި ސޮއިކޮށްފައެވެ. އަދި އެ އެއްބަސްވުމުގައި ސޮއިނުކުރާ 52 މީހުންނާއި އެކު އަންނަ ސެޕްޓެމްބަރު މަސް ނިމުމުގެ ކުރިން ސޮއިކުރާނެއެވެ. ހިޔާ މަޝްރޫޢުގެ ދަށުން ޖުމްލަ 4 ކުންފުންޏަކުން އަންނަނީ ޓަވަރުތައް ތަރައްޤީކުރަމުންނެވެ.