ޕީއެސްޖީއަށް ކުޅެމުން އައި ނެދަލެންޑްސްގެ މިޑްފީލްޑަރ ވައިނަލްޑަމް ލޯނު އެއްބަސްވުމެއްގެ ދަށުން ރޯމާއަށް ބަދަލުވެއްޖެއެވެ.
ސީޒަންގެ ނިޔަލަށް ވައިނަލްޑަމް ރޯމާއަށް ބަދަލުވީ, ސީޒަން ނިމުމުން ދާއިމީ ކުރުމުގެ ފުރުސަތު ލިބޭގޮތަށެވެ. ނެދަލެންޑްސްގެ ކެޕްޓަން ވައިނަލްޑަމް ވަނީ ޕީއެސްޖީގައި ލީގު ހޯދާފައެވެ. ކުޅުނީ 37 މެޗެވެ. އޭނާ ޕީއެސްޖީއަށް ބަދަލުވީ ލިވަރޕޫލުންނެވެ. 31 އަހަރުގެ މިޑްފީލްޑަރަކީ އާސީޒަނަށް މޮރީނިއޯ ރޯމާއަށް ގެންދިޔަ ފަސްވަނަ ކުޅުންތެރިޔާއެވެ. މީގެކުރިން ރޯމާއަށް ސޮއިކުރި ކުޅުންތެރިންގެ ތެރޭގައި ޔުވެންޓަސްއިން ގެންދިޔަ ދިބާލާއާއި, މަޓިޗް ހިމެނެއެވެ. ރޯމާއަށް ސޮއިކުރުމަށްފަހު ވައިނަލްޑަމް ބުނީ އެކްލަބަށް ބަދަލުވެވުމުން ކުރެވެނީ އުފާވެރި އިހުސާސެއްކަމަށެވެ. ކްލަބަށް ބަދަލުވުމަށްޓަކައި މަޝްވަރާކުރި އެންމެންގެ ފަރާތުންވެސް ލިބުނީ ރަނގަޅު ފީޑްބެކެއްކަމަށެވެ.
ވައިނަލްޑަމް ބުނީ ސީޒަންގައި ރޯމާގެ ހުރިހާ ޓާގެޓްތަކަށް ވާސިލްވުމަށްޓަކައި އޭނާއަށް ކުރެވެން ހުރި ހުރިހާ މަސައްކަތެއް ކުރާނެކަމަށެވެ.
