އިޓާލިއަން ލީގުގައު ރޯމާއާ ދެކޮޅަށް ކުޅުނު މެޗުން މޮޅުވެ، ޔުވެންޓަސް އިން އެއް ވަނައިގައި އޮތް އިންޓަރ މިލާންއާ ދެމެދު ފަރަގު ކުޑަކޮށްފި އެވެ.

ޔުވެންޓަސްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗަށް ނުކުތްއިރު، ޔުވެންޓަސްއާ އިންޓަރ މިލާންއާ ދެެމެދު ފަސް ޕޮއިންޓުގެ ފަރަގު އޮތެވެ. މެޗުން މޮޅުވެ ފަރަގު ކުޑަ ކުރަންް ލިބުނު ފުރުސަތުގެ ބޭނުން ހިފައި ޔުވެންޓަސް އިން ވަނީ ދެ ޕޮއިންޓަށް ފަރަގު ކުޑަކޮށްފަ އެވެ. އެއީ ލީގުގައި އިންޓަރ މިލާން އިން ކުޅުނު މެޗު އެއްވަރުވުމުންނެވެ.

މެޗުގައި ޔުވެންޓަސް އިން ރަނގަޅަށް ކުޅުނުއިރު، އެ ޓީމުން ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އެ ޓީމަށް ލީޑު ނަގައިދިނީ އެޑްރިއަން ރާބިއޮޓް އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ޑޫސާން ވްލަހޮވިޗް އެވެ. މެޗުގައި ޔުވެންޓަސް އިން ދެ ވަނަ ލަނޑެއް ޖެހި ނަމަވެސް، ވީއޭއާރު ބެލުމަށްފަހު ރެފްރީ ނިންމީ އެ ލަނޑު ބަަލައި ނުގަތުމަށެވެ.

މޮޅާއެކު ޔުވެންޓަސް ދެ ވަނައިގައި އޮތީ 18 މެޗުން 43 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އިންޓަރ މިލާން އަށް ލިބެނީ 45 ޕޮއިންޓެވެ.