އިއްޔެ އެކަނިވެސް މާލޭގެ ސްކޫލްތަކަށް ބަދަލުވާން އެދި 100 ހުށަހެޅުން ހުށަހެޅި
ސްކޫލް ދަރިވަރުންތަކެއް
މި އަހަރު މާލެ ސަރަހައްދަށް ރާއްޖޭގެ އެހެން ހިސާބުތަކުން ބަދަލުވާ ދަރިވަރުންގެ އަދަދު ކުރިއާ އަޅައިބަލާއިރު ވަރަށް ބޮޑުތަން އިތުރުވެފައިވާކަން އެޑިއުކޭޝަން މިނިސްޓްރީން ހާމަކޮށްފިއެވެ.
މިއަދު ބޭއްވި މައުލޫމާތުދިނުމުގެ ބައްދަލުވުމެއްގައި އެޑިއުކޭޝަން މިނިސްޓްރީގެ ސީނިއަރ ޕޮލިސީ ޑިރެކްޓަރ މޫސާ އާދަމް ވިދާޅުވީ، ރާއްޖޭގެ އެކި ސަރަހައްދުތަކުގައި ތައުލީމް އުނގެނެމުންދިޔަ ގިނަ އަދަދެއްގެ ކުދިން މާލެ ސަރަހައްދުގެ ސްކޫލްތަކަށް ބަދަލުވުމަށް އެދި ހުށަހަޅަމުންދާކަަމަށެވެ. ގިނަ އަދަދެއްގެ ދަރިވަރުން އެއްފަހަރާ މާލޭގެ ސްކޫލްތަކާ ގުޅުމަށް އެދެމުންދަނީ ހިޔާ ފްލެޓްތަކަށް މީހުން ބަދަލުވުމުގެ މަރުހަލާ ކުރިއަށްދާތީކަމަށް ގަބޫލުކުރެވޭ ކަމަށްވެސް އޭނާ ވަނީ ވިދާޅުވެފައެވެ.
ހިޔާ ފްލެޓުގެ އާބާދީ އިތުރުވުމާގުޅިގެން، މާލެ ސަރަހައްދުގައި އުނގެނޭ ދަރިވަރުންގެ ނިސްބަތަށް ވަނީ ބޮޑު ބަދަލެއް އައިސްފައެވެ. އެ ދަރިވަރުންނަށް އުނގަންނައިދިނުމުގައި ފަސޭހަ އިންތިޒާމްތަކެއް ހަމަޖައްސައިދިނުމުގެ މަސައްކަތް ކުރަމުންދާކަމަށް އެޑިއުކޭޝަން މިނިސްޓްރީން ވަނީ ބުނެފައެވެ. އެގޮތުން ހުޅުމާލޭގެ ފޭސް 1އާއި ފޭސް 2ގައި އިތުރު ސްކޫލްތައް އެޅުމަށް ނިންމާފައިވާއިރު އެ ސްކޫލްތައް އަޅަން ހަމަޖެހިފައި ވަނީ ދަންފަޅިއެއްގައި 1500 ދަރިވަރުންނަށް އުނގަންނައިދެވޭގޮތަށެވެ.
