އެއާރޕޯޓުގެ ޗެކިންގ ސިސްޓަމަށް ދިމާވި މައްސަލަ ހައްލުކޮށްފި
ސޮފްޓްވެއަރ އަޕްގްރޭޑުކޮށް، ވަރުގަދަކުރުމުގެ މަސައްކަތް ދަނީ ކުރަމުން
ވެލާނާ އިންޓަރނޭޝަނަލް އެއާޕޯޓުގެ ޗެކިން ކުރިއަށްދަނީ
ވެލާނާ އިންޓަރނޭޝަނަލް އެއާރޕޯޓު (ވީއައިއޭ)ގެ ޗެކިންގ ސިސްޓަމަށް ދިމާވި މައްސަލަ ހައްލުކޮށްފިއެވެ.
ރާއްޖެއެމްވީއަށް މައުލޫމާތުދެއްވަމުން އެމްއޭސީއެލްގެ ޖެނެރަލް މެނޭޖަރ ކޯރޕަރޭޓް އެފެއަރޒް، ހަސަން އަރީފް ވިދާޅުވީ، މައްސަލަ ހައްލުކުރުމުގައި އިސްކަންދިނީ އިންޓަރނޭޝަނަލް ޓަރމިނަލްގެ ސިސްޓަމްތައް ރަނގަޅުކުރުމަށްކަމަށެވެ.
ފިޔަވަހިތަކަކަށް ބަހާލައިގެން ކުރި މަސައްކަތާއެކު ޑޮމެސްޓިކް ޓަރމިނަލްގެ ސިސްޓަމްތައްވެސް މިހާރު ރަނގަޅުކޮށްފައިވާކަމަށް އޭނާ ވިދާޅުވިއެވެ. ޗެކިންގ ސިސްޓަމަށް މައްސަލަ ދިމާވުމުން ޗެކިންގ ކުރުމުގެ މަސައްކަތް ކުރިއަށްގެންގޮސްފައިވަނީ މެނުއަލްކޮށެވެ.
ވެލާނާ އިންޓަރނޭޝަނަލްގެ ޗެކިންގ ސިސްޓަމްތަކަށް ދިމާވީ ސޮފްޓްވެއަރގެ މައްސަލައެއްކަމަށާއި، މިއީ ވެލާނާ އިންޓަރނޭޝަނަލް އެއަރޕޯޓަށް މީގެކުރިން ދިމާވި މައްސަލައެއް ނޫންކަމަށްވެސް އަރީފް ވިދާޅުވިއެވެ. ސޮފްޓްވެއަރ އަޕްގްރޭޑުކޮށް، ވަރުގަދަކުރުމުގެ މަސައްކަތް ކުރަމުންދާކަމަށް އަަރީފް ފާހަގަކުރެއްވިއެވެ.
އެއާރޕޯޓުގެ ޗެކިންގއަށް މައްސަލަ ދިމާވިނަމަވެސް އޮގަސްޓް 2 ވަނަ ދުވަހު އެކަނިވެސް އިންޓަރނޭޝަނަލް 70 ފްލައިޓުން 5124 ފަސިންޖަރުން ވަނީ ރާއްޖެއައިސްފައެވެ. އަދި ޑޮމެސްޓިކް ފްލައިޓް 49 ފްލައިޓް ދަތުރުކޮށްފައިވާއިރު، ޖުމުލަ 1874 ފަސިންޖަރުން ރާއްޖޭގެ އެކިތަންތަނަށް ވީއައިއޭއިން ދަތުރުކޮށްފައިވެއެވެ.
