ބައިޑެން އަދިވެސް ކޮވިޑަށް ޕޮޒިޓިވް، ހާލުކޮޅު ރަނގަޅު

އެމެރިކާގެ ރައީސް ޖޯ ބައިޑަން އަދިވެސް ކޮވިޑް-19ށް ޕޮޒިޓިވްކަމަށް ބައިޑެންގެ ޑޮކްޓަރު ކެވިން އޯ ކޮނަރ ވިދާޅުވެއްޖެއެވެ.

ބުދަ ދުވަހު ވައިޓް ހައުސްއިން ޑޮކްޓަރ ކެވިންއާ ހަވާލާދީ ނެރުނު މެމޯއެއްގައި ބުނެފައިވަނީ ބައިޑެން ކުޑަކޮށް ކަސްރަތު ކުރެއްވިފަހުން ކޮވިޑަށް ޓެސްޓްކޮށްފައިވާކަމަށެވެ. ނަމަވެސް އެޓެސްޓްގެ ނަތީޖާވެސް ޕޮޒިޓިވްވެފައިވާކަމަށެވެ.

ނަމަވެސް ބައިޑަންގެ ހާލުކޮޅު ރަނގަޅުކަމަށާއި ހުންވެސް ރަނގަޅުވެފައިވާކަމަށް ޑޮކްޓަރު ވިދާޅުވިކަމަށެވެ. އަދިވެސް ކެއްސާކަމަށާއި ނަމަވެސް އަންގާރަ ދުވަހާ އަޅާބަލާއިރު މިހާރު ކެއްސާ މިންވަރު މަދުކަމަށްވެސް ވަނީ ބުނެފައެވެ.

އުމުރުފުޅުން 79 އަހަރުގެ ބައިޑެން ދެވަނަ ފަހަރަށް ކޮވިޑަށް ޕޮޒިޓިވްވެފައިވަނީ ހޮނިހިރު ދުވަހުއެވެ. އެކަމާއިގުޅިގެން ޑޮކްޓަރު ވިދާޅުވީ އެންޓިވައިރަލް ބޭހެއްކަމުގައިވާ ޕެކްސްލޮވިޑް ބޭނުންކުރާ ބައެއް މީހުންނަށް އަލުން ކޮވިޑް ޖެހުމުގެ ފުރުސަތު އޮންނަކަމަށެވެ.

އެންމެ ފުރަތަމަ ބައިޑަން ކޮވިޑަށް ޕޮޒިޓިވްވެފައިވަނީ ޖުލައި 21 ވަނަ ދުވަހުއެވެ.

އައިސޮލޭޝަންގައި ފަސް ދުވަހު ބައިޑަން ހުންނެވިއެވެ. ފަސް ދުވަސް ބުދަދުވަހަށް ހަމަވެފައިވާއިރު އަދިވެސް ޕޮޒިޓިވްވުމުން ހުންނެވީ އައިސޮލޭޝަންގައެވެ.