ދިވެހި ފުލުހުންގެ ޚިދުމަތާއި އަލަށް ގުޅުނު ފުލުހުން ހުވާކޮށްފި
3 އޯގަސްޓު 2022 | ބުދަ 01:57ފުލުހުންގެ ޚިދުމަތާއި އަލަށް ގުޅުނު 82 ފުލުހުން ވަނީ ހުވާކޮށްފައި
ފުލުހުންގެ ޚިދުމަތާއި އަލަށް ގުޅުނު ފުލުހުން
ދިވެހި ފުލުހުންގެ ޚިދުމަތާއި އަލަށް ގުޅުނު ފުލުހުން ހުވާކޮށްފިއެވެ.
މިއީ ދިވެހި ފުލުހުންގެ ޚިދުމަތުގެ ގާނޫނުގައި ބަޔާންކޮށްފައިވާ ގޮތުގެ މަތިން އެ ޚިދުމަތާ އަލަށް ގުޅޭ ފުލުހުން ހުވާކުރުމަށް ބާއްވާ ރަސްމިއްޔާތެކެވެ. މި ރަސްމިއްޔާތު ބާއްވާފައިވަނީ އިސްކަންދަރު ބިލްޑިންގެ މަލްޓި ޕާރޕަސް ހޯލުގައެވެ.
މި ރަސްމިއްޔާތުގައި ފުލުހުންގެ ޚިދުމަތާ އަލަށް ގުޅުނު ފުލުހުންނަށް ހުވާ ލައިދެއްވާފައި ވަނީ ސިވިލްކޯޓުގެ ގާޒީ އަބްދުލްނާސިރު ޝަފީގުއެވެ.
ފުލުހުންނަށް ހުވާލައިދިނުމަށް ބޭއްވި ރަސްމިއްޔާތުގައި ހެޑް އޮފް ހިއުމަން ރިސޯސަސް ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ނާފިޒްއާއި، ހެޑް އޮފް ވޯކްފޯސް ޕްލޭނިންގ އެންޑް މެނޭޖްމަންޓް ސްޕްރިންޓެންޑެންޓް އޮފް ޕޮލިސް އަޙްމަދު މުސްލިމުގެ އިތުރުން ވޯކްފޯސް ޕްލޭނިންގ އެންޑް މެނޭޖްމަންޓްގެ އިސްވެރިން ބައިވެރިވެވަޑައިގެންނެވިއެވެ.
އަންގާރަ ދުވަހު ބޭއްވި މި ރަސްމިއްޔާތުގައި ޖުމްލަ 82 ފުލުހުން ހުވާ ކުރިއެވެ. އޭގެތެރޭގައި 26 ފިރިހެން ފުލުހުންނާއި 16 އަންހެން ފުލުހުންގެ އިތުރުން ސްޕެޝަލް ކޮންސްޓަބްލަރީ އަންހެން 20 ފުލުހުންނާއި ސްޕެޝަލް ކޮންސްޓަބްލަރީ ފިރިހެން 20 ފުލުހުން ހިމެނެއެވެ. ހުވާކުރުމަށްފަހު ހުވާގެ އިގުރާރުގައި މުވައްޒަފުން ވަނީ ސޮއިކޮށްފައެވެ.
