ކަސްޓަމްސްއާއި ތަނުގެ މުވައްޒަފުން ބަދުނާމު ކުރުމަށް ދިޔަރެސްއިން ދަނީ ތަކުރާރުކޮށް ޚަބަރު ފަތުރަމުން: ކަސްޓަމްސް
2 އޯގަސްޓު 2022 | އަންގާރަ 07:32ކަމުގެ ޙަޤީގަތް އޮޅުން ފިލުވުމަށް މަސައްކަތެއް ނުކުރޭ
މޯލްޑިވްސް ކަސްޓަމްސް ސަރވިސް
ކަސްޓަމްސްއާއި ތަނުގެ މުވައްޒަފުން ބަދުނާމު ކުރުމަށް އޮންލައިން ނޫހެއްކަމަށްވާ ދިޔަރެސްއިން ތަކުރާރުކޮށް ޚަބަރު ފަތުރަމުންދާކަމަށް މޯލްޑިވްސް ކަސްޓަމްސް ސަރވިސްއިން ބުނެފިއެވެ.
ކަސްޓަމްސްއިން ބުނީ، ދިޔަރެސް ނޫހުގައި ކަސްޓަމްސްއާ ގުޅޭގޮތުން ތަކުރާރުކޮށް ދޮގު މައުލޫމާތު ޝާއިއު ކުރަމުންދާ ކަމަށެވެ. އެ އަމަލަކީ ކަސްޓަމްސްއާއި އެ މުއައްސަސާގެ މުވައްޒަފުން ބަދުނާމު ކުރުމަށް ކުރަމުންދާ ކަމެއްކަމަށް ކަސްޓަމްސްއިން ވަނީ ބަޔާންކޮށްފައެވެ.
ކަސްޓަމްސްއިން ބުނި ގޮތުގައި ދިޔަރެސް ނޫހުން ޚަބަރުތައް ޝާއިއު ކުރުމުގެ ކުރިން ކަމުގެ ޙަޤީގަތް އޮޅުން ފިލުވުމަށް ރަސްމީކޮށް ކަސްޓަމްސްގެ މީޑިއާ އޮފިޝަލުންގެ ބަހެއް ހޯދުމަށް މަސައްކަތް ކޮށްފައެއް ނުވެއެވެ.
އެފަދަ ހަޤީޤަތާއި ޚިލާފު ދޮގު ޚަބަރުތައް ފެތުރުން ކުށްވެރި ކުރާކަމަށް ކަސްޓަމްސްއިން ވަނީ ބަޔާންކޮށްފައެވެ.
ކަސްޓަމްސްއިން ވަނީ ކުރިއަށް އޮތް ތަނުގައި ހުރިހާ މީޑިއާތަކުންވެސް ކަސްޓަމްސްއާ ގުޅޭގޮތުން ޚަބަރާއި މައުލޫމާތު ޝާއިއު ކުރުމުގެ ކުރިން ރަސްމީކޮށް ކަސްޓަމްސްގެ މީޑިއާ އޮފިޝަލުންގެ ބަހެއް ހޯދުމަށް އެދިފައެވެ.
މީގެ އިތުރުން، މީޑިއާގައި މައުލޫމާތު ހިއްސާކުރާއިރު ކަމުގެ ޙަޤީޤަތް ބަލައި ދެ ފަރާތުގެ މައުލޫމާތު ހޯދައިގެން ޚަބަރު ހިއްސާ ކުރުމަކީ ނޫސްވެރިކަމުގެ ޒިންމާއެއްކަން ބަޔާންކޮށް ކަސްޓަމްސްއިން ބުނީ، ފޯނު އަދި އީމެއިލްގެ ޒަރިއްޔާއިންވެސް މައުލޫމާތު ސާފު ކުރެވޭނެ ކަމަށެވެ.
ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމުގައި ކަސްޓަމްސްއިން ތަންފީޒު ކުރަންޖެހޭ ޤާނޫނުތަކާއި ޤަވާއިދުތައް ތަންފީޒު ކުރުމުގައި ސާބިތުކަމާއެކު މަސައްކަތް ކުރާނެކަމަށްވެސް ކަސްޓަމްސްއިން ބުނެފައިވެއެވެ.
