ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލަ ކޯޓުގައި ކުރިއަށްދަނީ ކުރީގެ ރައީސް އަބްދުﷲ ޔާމީނާއި، ޔޫސުފް ނައީމްގެ ދައުވާތައް އެކުއެކީގައެވެ.

މި މައްސަލައިގައި މިހާރު ކުރިއަށްދަނީ ހެކިބަސް ނެގުމުގެ މަރުޙަލާއެވެ.

ހޯމަ ދުވަހުގެ އަޑުއެހުން:

ހޯމަ ދުވަހުގެ އަޑުއެހުމުގައި ހެއްކެއްގެ ގޮތުގައި ހާޒިރުކޮށްފައިވަނީ ދައުލަތުގެ ހެއްކެއްކަމަށްވާ އަހުމަދު ތައުސީމްއެވެ.

އޭނާ ހާޒިިރުކުރީ އޭނާ ތައްޔާރުކުރި ފުލުުހުންގެ ޑޮކިއުމަންޓް އެގްޒެމިނޭޝަން ރިޕޯޓާއި ގުޅޭގޮތުންނެވެ.

އޭނާއަކީ ފުލުހުންގެ ޑިޖިޓަލް އެވިޑެންސް ލެބޯޓަރީގައި ސީނިއަރ ފޮރެންސިކް އެނަލިސްޓެއްގެ ގޮތުގައި މަސައްކަތް ކުރައްވާ ފަރާތެކެވެ.

އޭނާ ވަނީ މާއްދީ ހެކި ލެބޯޓަރީއަށް އައުުމުން އެ ހެކިތަކާއި ޙަވާލުވުމަށް ކުރިއަށްގެންދާ އިޖުރާއަތުތަކާއި ފުރިހަމަވާން ޖެހޭ ކަންކަމާއި ގުޅޭގޮތުން ވާހަކަ ދައްކަވާފައެވެ. އެގޮތުން އެ ކަންކަން ފުރިހަމަކަން ކަށަވަރު ކުރުމަށްފަހު މާއްދީ ހެކި ތަހުލީލުކުރުން ކުރިއަށް ގެންދާކަމަށް އޭނާ ވިދާޅުވިއެވެ.

މި މައްސަލައާ ގުޅިގެން ތަހުލީލު ކުރަން ހުށައެޅުނު މާއްދީ ހެކިތަކުގެ ތަފްސީލު އޭނާ ވަނީ ދެއްވާފައެވެ. އެގޮތުން ސުވާލު އުފެދިގެން ހުށައެޅިފައިވާ ޑޮކިއުމަންޓާއި، މި މައްސަލައިގައި އަޅާ ކިއުމަށް ހުށައެޅުނު ނަމޫނާ ލިޔެކިޔުންތައް އޭގެ ތެރޭގައި ހިމެނެއެވެ.

އޭނާ ތަހުލީލު ކޮށްފައިވަނީ ސުވާލު އުފެދިފައިވާ އަތުލިޔުމެއްގެ ގޮތުގައި ހިމެނޭ "ޓުވާރޑްސް މައި ޕޮލިޓިކަލް ކެމްޕޭން" އޭ ބަޔާންކޮށްފައިވާ ލިޔުމަކާއި އެ ލިޔުންތަކުގައި ހިމެނޭ ސޮއެވެ.

އޭނާ ވިދާޅުވީ، އެ ލިޔުންތަކުގައިވާ އަތުލިޔުމާއި ސޮއި އަޅާކިޔުއްވާފައިވާ ކަމަށެވެ. އޭގެ ތެރޭގައި ޑިޕޮސިޓް ސްލިޕްތަކާއި ސިޓީތައް ހިމެނެއެވެ. އެއީ ހައްތަހާވެސް 2015 ގެ ލިޔެކިޔުންތަކެކެވެ.

ހެކިވެރިޔާ ވަނީ ސޮއި އެއްގޮތްތޯ ނުވަތަ ނޫންތޯ ބެލުމަށް ބަލާ ކަންކަން ކިޔާދެއްވާފައެވެ.

އޭނާ ވިދާޅުވީ، ސުވާލު އުފެދިގެން ތަހުލީލުކުރި ލިޔުމުގައި ހިމެނޭ އަތުލިޔުމާއި ސޮއި، ނަމޫނާ ލިޔުންތަކުގައި ހިމެނޭ އަތުލިޔުމާއި ސޮޔާއި ދިމާވާ ކަމަށް އެއްވެސް ޝައްކެއް ނެތި ޔަޤީންވާ ކަމަށެވެ.

މި މައްސަލައާ ގުޅިގެން ރައީސް ޔާމީނުގެ ވަކީލުން ވަނީ ނުކުތާއެއް ފާހަގަކޮށްފައެވެ. އެއީ ހެކީގެ ޗެއިން އޮފް ކަސްޓަޑީގައި ނުބައި ތާރީޚެއް ލިޔެފައިވާކަމެވެ. އެގޮތުން ލިޔުމުގައި ހެކި ހޯދި ތާރީޚެއްކަމަށް ބަޔާންކޮށްފައިވަނީ 23 އޯގަސްޓު 2026 އެވެ.

ހެކިވެރިޔާ ވިދާޅުވި ގޮތުގައި އެއީ މި ހެކިތަކުގެ ތަހުލީލު ރިޕޯޓުތަކުގެ ސައްޙަކަމާއި ގުޅޭ ނަތީޖާއަށް އަސަރު ކުރާނެ ކަމެއް ނޫނެވެ.

ދެން މި މައްސަލައިގެ އަޑުއެހުމެއް އޮންނާނީ 4 އޯގަސްޓުގައެވެ.

މި މައްސަލައިގައި 16 ޖޫންގައި ބޭއްވި އަޑުއެހުމުގައި ވަނީ ފުރަތަމަ ހެކީގެ ހެކިބަސް ނަގާފައެވެ. އެ ދުވަހުގެ އަޑުއެހުމުގައި ދިވެހި ފުލުހުންގެ ޚިދުމަތުގެ ފޮރެންސިކް ސަރވިސްގެ ޑިޖިޓަލް އެވިޑެންސް ލެބޯޓަރީގައި މަސައްކަތް ކުރަމުންދާ އަބްދުﷲ ޝިފާޒުގެ ހެކިބަސް ވަނީ ނަގާފައެވެ. އެއީ މި މައްސަލައިގައި ހެއްކެއްގެ ގޮތުގައި ހުށައަޅާފައިވާ މޯބައިލް ފޮރެންސިކް ރިޕޯޓާއި ގުޅިގެންނެވެ.

19 ޖޫން 2022 ގައި ބޭއްވި އަޑުއެހުމުގައި ވަނީ  ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ޑިޖިޓަލް ފޮރެންސިކް އެގްޒެމިނަރެއްގެ ގޮތުގައި މަސައްކަތް ކުރައްވާ އިބްރާހިމް ޒުހައިރުގެ ހެކިބަސް ނަގާފައެވެ. އެއީ މި މައްސަލައިގައި ހެއްކެއްގެ ގޮތުގައި ހުށައަޅާފައިވާ ކޮމްޕިއުޓަރ ފޮރެންސިކް ރިޕޯޓާއި ގުޅިގެންނެވެ.

އެއަށްފަހު 30 ޖޫންގައި ބޭއްވި އަޑުއެހުމުގައި ވަނީ ޓޫރިޒަމް މިނިސްޓްރީގެ ލީގަލް ބައިގައި ކުރިން މަސައްކަތް ކުރެއްވި ފަސީހް ޒާހިރުގެ ހެކިބަސް ނަގާފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލެވެ.