އެއް ޖިއްސުން ގުޅުން ހިންގި މައްސަލައެއްގައި ހައްޔަރުކުރި މީހާގެ ބަންދަށް 10 ދުވަސް
މިއީ ބުރާސްފަތި ދުވަހު މީހުން ހައްޔަރުކުރި ކޭހުގެ ތެރެއިން ހައްޔަރުކުރެވުނު މީހެއް ނޫން
މޯލްޑިވްސް ޕޮލިސް ސަރވިސްގެ ހެޑް ކުއާޓަރ، ޝަހީދު ހުސައިން އާދަމް ބިލްޑިންގ
އެއް ޖިންސުން ގުޅުން ހިންގި މައްސަލައެއްގައި ހައްޔަރުކުރި އުމުރުން 28 އަހަރުގެ މީހާގެ ބަންދަށް 10 ދުވަސް ޖަހައިފިއެވެ.
އެއްޖިންސުން ގުޅުން ހިންގި މައްސަލައެއްގައި ހުކުރު ދުވަހު ވަނީ އުމުރުން 28 އަހަރުގެ ފިރިހެނަކު ހައްޔަރުކޮށްފައެވެ. ފުލުހުން ބުނިގޮތުގައި މިއީ ބުރާސްފަތި ދުވަހު މީހުން ހައްޔަރުކުރި ކޭހުގެ ތެރެއިން ހައްޔަރުކުރެވުނު މީހެއްނޫނެވެ. އޭނާ ހައްޔަރުކޮށްފައިވަނީ އެއްޖިންސުން ގުޅުންހިންގުމުގެ އެހެން މައްސަލައެއްގައިކަމަށް ފުލުހުން ބުނެފައިވެއެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 10 ދުވަހުގެ މުއްދަތެއް ދީފައިވާކަމަށް ފުލުހުން ބުނެއެވެ.
ދާދި ފަހުން ސޯޝަލް މީޑިއާގައި ވަނީ ދިވެހިންތަކެއް އެއްޖިންސުން ގުޅުންހިންގާ މަންޒަރު ފެންނަ ވީޑިއޯތަކެއް އާންމުވެފައެވެ. މީގެ ތެރޭގައި ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގީރް ކިޔާ މީހަކާއެކު އެއްޖިންސުން ގުޅުން ހިންގާފައިވާކަމަށް ތުހުމަތުކުރެވޭ ގިނަ ބައެއްގެ ވީޑިއޯ ހިމެނޭކަމަށް މައުލޫމާތުލިބެއެވެ.
ފުލުހުން ބުނެފައިވާގޮތުގައި އެއްޖިންސުން ގުޅުން ހިންގުމުގެ މައްސަލަތަކަކާއި އެފަދަ މަންޒަރުތައް ވީޑިއޯކޮށް ފޮޓޯ ނަގައި ބްލެކްމެއިލްކުރި މައްސަލަތަކެއް ދަނީ ބަލަމުންނެވެ.
އެމްޑީ އަލްމަގީރްއާއެކު އެއްޖިންސުން ގުޅުންހިންގާތަން ފެންނަ ވީޑިއޯތަކުގެ މައްސަލައިގައި މިހާތަނަށް 3 މީހުން ވަނީ ހައްޔަރު ކޮށްފައެވެ. އެއީ 45 އަހަރާއި 46 އަހަރާއި 35 އަހަރުގެ ދިވެހި ފިރިހެނުންނެވެ. މީގެ ތެރޭގައި ގާނޫނީ ވަކީލު ނާޒިމް ސައްތާރުއާއި ނޮޅިވަރަމު ދާއިރާގެ ކުރީގެ މެންބަރު މުހައްމަދު ނަޝީދު (ކާނަލް)ވެސް ހިމެނެއެވެ. މި މައްސަލައިގައި ހިމެނޭ 46 އަހަރުގެ މީހާއަށް 7 ދުވަހުގެ ބަންދުގެ މުއްދަތެއް ދީފައިވާ ކަމަށާއި 35 އަހަރުގެ މީހާއަށް 15 ދުވަހުގެ ބަންދުގެ މުއްދަތެއް ދީފައިވާކަމަށް ފުލުހުން ބުނެއެވެ.
