ކުރީގެ ރައީސް އަބްދުﷲ ޔާމީނުގެ ވެރިކަމުގައި ފުލުހުންގެ ޚިދުމަތް ބޭނުން ކުރައްވާފަވަނީ މީހުން ފުރޭމް ކުރުމަށާއި ޤާނޫނީ އިމުން ބޭރުން މީހުން ހިފާހައްޔަރުކުރުމަށް ކަމަށް ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ވިދާޅުވެއްޖެއެވެ.

ރިޔާޒް މިހެން ވިދާޅުވީ ރައީސް ޔާމީނުގެ ވެރިކަމެއްގައި ދިވެހި ފުލުހުންގެ ޚިދުމަތަށް އިސްލާހީ ބޮޑެތި ބަދަލުތަކެއް ގެންނަވާނެކަމަށް ވިދާޅުވެ ހުޅުމާލޭ ކައުންސިލް މެމްބަރު އިބްރާހިމް ޝުޖާއު ކުރެއްވި ޓްވީޓް އަކަށް ދެއްވި ރައްދެއްގައެވެ. މިއަދު މިފެންނަނީ ދިވެހި ފުލުހުން ލައްވައި ރައްޔިތުންނާ ދޭތެރޭ ހާލަތާ ނުބައްދަލު ބާރުގެ ބޭނުންކުރާ މަންޒަރުކަމަށް ވިދާޅުވެ ޝުޖާއު ވިދާޅުވެފައިވަނީ، ރައީސް ޔާމީނު  2028-2023 އަށް ކުރައްވާ ވެރިކަމުގައި ދިވެހި ފުލުހުންގެ ޚިދުމަތައް އިސްލާހީ ބޮޑެތި ބަދަލުތަކެއް ގެންނަވާނެ ކަމަށެވެ.

އެޓްވީޓް އާއި ގުޅިގެން ރިޔާޒް ވިދާޅުވީ، ރައީސް ޔާމިނުގެ ވެރިކަމުގަ ފުލުހުންގެ ޚިދުމަތް ބޭނުން ކުރައްވާފަވަނީ މީހުން ފުރޭމް ކުރުމަށާއި ޤާނޫނީ އިމުން ބޭރުން މީހުން ހިފާ ހައްޔަރު ކުރުމުގައި ކަމަށެވެ. އަދި އޭރު މުޅި މުއައްސަސާ އޮތީ ބޮއްސުންލާފައިކަމަށް ރިޔާޒް ވިދާޅުވިއެވެ.

އޭރު އެހެން ކަންކަން ވަމުންދިޔައިރުވެސް އެކަންކަން އިސްލާހު ކުރުމަށް ކޮށްދެއްވި ކަމެއް ނެތްކަން ފާހަގަ ކުރައްވައި ރިޔާޒް ވިދާޅުވީ،  ދެ ވަނަ ދައުރެއް ޔާމިނަށް ދީފިނަމަ އަނިޔާވެރިކަން އިތުރުވާނެ ކަމަށެވެ.

ދިވެހި ފުލުހުންގެ މުއައްސަސާ ސިޔާސީވެ، 2012 ވަނަ އަހަރު ރާއްޖޭގެ ޤާނޫނީ ވެރިކަން ވައްޓާލަން ނިކުތުމަށްފަހު، އެ މުއައްސަސާއާއިމެދު ރައްޔިތުންގެ އިތުބާރު ވަރަށް ބޮޑަށް ގެއްލިގެން ދިޔައެވެ.

މީގެ އިތުރުން، 2013 ވަނަ އަހަރު ރާއްޖޭގައި ބޭއްވި ރިޔާސީ އިންތިޚާބުގެ ދެވަނަ ބުރު ފުރަތަމަ ހުއްޓުވީވެސް އޭރު ފުލުހުން ނިކުމެއެވެ. އިންޓެލިޖެންސް ރިޕޯޓެއްގެ މައްޗަށް ބިނާކޮށްކަމަށް ބުނެ، ސުޕްރީމް ކޯޓުން އިންތިޚާބު ބާތިލްކުރިއިރު، އިންތިޚާބު ބާތިލްކުރާ ވަރުގެ ގޯސްތަކެއް ހެދި ބައެއްގެ މައްޗަށް މިހާތަނަށް ދައުވާއެއްކޮށް، ތަހުޤީޤެއް ހިންގާފައެއް ނުވެއެވެ.

ޑިފެންސް މިނިސްޓަރ ކާނަލް މުހައްމަދު ނާޒިމްގެ ގެކޮޅުން ފިސްތޯލައެއް ފެނުނުކަމަށް ބުނެ އެހިންގި އަމަލުތަކާއި، ދޭތެރެ ދޭތެރެއިން އެނިކުންނަ ފުލުހުންގެ އިންޓެލިޖެންސް ރިޕޯޓްތަކުގެ ސަބަބުން ފުލުހުންގެ މުއައްސަސާ ސިޔާސީ ވެފައިވާ މިންވަރާއިމެދު ދެކެވޭ ވާހަކަތައްވެސް އިތުރުވެގެން ދިޔައެވެ.

ހަމައެއާއެކު، 2018 ވަނަ އަހަރުގެ ރިޔާސީ އިންތިޚާބުގެ ތައްޔާރީތައް ފެށުނުފަހުން، އިދިކޮޅު ފަރާތްތަކުގެ ކެމްޕެއިނަށް ހުރަސް އެޅުމަށް ފުލުހުން ހިންގި އަމަލުތަކާއި، ވެރިކަންކުރާ ޕާޓީއިން އިދިކޮޅު ފަރާތްތަކުގެ ކެންޕެއިނަށް ހުރަސް އެޅުމަށް ހިންގާފައިވާ އަމަލުތަކާއި ދޭ އިންޒާރުތައް ބެލުމުގައި ފަސްޖެހުން މިއީވެސް ރައީސް ޔާމީނުގެ ވެރިިކަމުގައި ފުލުހުންނާމެދު ކުރެވިފައިވާ ތުހުމަތުތަކެވެ.

2023 ގެ އިންތިޚާބް ކައިރި ވަމުން އަންނަ އިރު މިހާރު މިވަނީ ދެފަރާތުގެ ސަޕޯޓަރުން ކެމްޕެއިން މަސައްކަތް ފަށާފައެވެ.