ޕީއެސްޖީއަށް ކުޅެމުން އަންނަ ބްރެޒިލްގެ ފޯވާޑް ނޭމާ ޖޫނިއަރ، ސްޕެނިޝް ކޯޓަށް ހާޒިރުވާން އަންގައިފިއެވެ.

ނޭމާ ކޯޓަށް ހާޒިރުކުރަން ނިންމާފައިވަނީ ވޯލްޑް ކަޕް ފެށުމުގެ މަހެއްހާ ދުވަސް ކުރިން، އޮކްޓޫބަރު މަހުގެ 17 ވަނަ ދުވަހުއެވެ. ނޭމާ ކޯޓަށް ހާޒިރުކުރަނީ ސެންޓޯސްއިން ބާސެލޯނާއަށް ބަދަލުވި ފަހުން ޓެކްސް ދެއްކުމުގައި މަކަރާއި ކޮރަޕްޝަމްގެ އަމަލުތައް ހިންގާފައިވާކަމަށް ތުހުމަތުކޮށެވެ.

ސްޕެއިންގެ ޓެކްސް އޮތޯރިޓީތަކުން ދައުވާކޮށްފައި ވަނީ ނޭމާއަށް ދެއަހަރުގެ ޖަލު ހުކުމެއް ކުރުމަށެވެ. އަދި ލިބުނު ގެއްލުމުގެ ބަދަލުގައި 10 މިލިއަން ޔޫރޯ ހޯދުމަށްވެސް ޓެކްސް އޮތޯރިޓީން ދައުވާކޮށްފައިވެއެވެ. ދައުވާގައިވާގޮތުން 8.4 މިލިއަން ޔޫރޯގެ ޓެކްސް ނުދައްކާ ނޭމާ ވަނީ އޮޅުވާލާފައެވެ.

މީގެ އިތުރުން ނޭމާގެ 40 ޕަސެންޓް ޕްލޭޔާސް ރައިޓްސް އޮތް ބްރެޒިލްގެ ޑީއެސްއައި އިންވެސް ވަނީ ފަސް އަހަރުގެ ޖަލު ހުކުމެއް ނޭމާއަށް ކުރުމަށް އެދިފައެވެ. އަދި އެކުންފުންޏަށް ލިބުނު ގެއްލުމުގެ ބަދަލުގައި 150 މިލިއަން ޔޫރޯ ހޯދުމަށްވެސް ޑީއެސްއައި އިން އެދިފައިވެއެވެ.

ނޭމާގެ އިތުރުން ބާސެލޯނާގެ ކުރީގެ ދެރައީސުން ކަމުގައިވާ ސަންޑްރޯ ރޮސެލްއާއި ހޯސެފް މާރިއާ ބާޓޮމޭއޯ އަދި ނޭމާގެ އާއިލާގެ މައްޗަށްވެސް ޓެކްސް ދެއްކުމުގައި އޮޅުވާލި މައްސަލާގައި ދައުވާކޮށްފައިވެއެވެ. ރިޕޯޓުތައް ބުނާ ގޮތުން ޓެކްސް އޮތޯރިޓީން ވަނީ ނޭމާގެ ބައްޕައަށް ދެއަހަރުގެ އަދި އޭނާގެ މަންމައަށް އެއް އަހަރުގެ ޖަލު ހުކުމެއް ކުރުމަށް ދައުވާކޮށްފައެވެ.