މި ސަރުކާރުގެ ޚާރިޖީ ސިޔާސަތަކީ ދުނިޔެ ބަލައިގެންފައިވާ ތިލަފަތްހަމަ ހަރުދަނާ ސިޔާސަތެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.

މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ދެއްވި ޚިތާބުގައި ވަނީ ދިވެހިރާއްޖޭގެ މިނިވަން ކަމަށް 57 އަހަރު ފުރޭ 58 ވަނަ މިނިވަން ދުވަހުގެ ތަޙްނިޔާ އެންމެހާ ލޮބުވެތި ދިވެހި ރައްޔިތުންނަށް އަރިސްކުރައްވާފައެވެ.

މިއަދު ލިބިފައިމިވާ މިނިވަންކަމުގެ އަގު ފުރާނައިން އަދާކުރެއްވި ބަޠަލުންގެ ލިސްޓް ފެށެނީ ޝަހީދު އަލި ރަސްގެފާނުގެ ނަންފުޅުންކަން ފާހަގަ ކުރައްވައި ރައީސް ވަނީ އެކި ގޮތްގޮތުން މިނިވަންކަމަށްޓަކައި މަސައްކަތް ކުރެއްވި އަބްތާލުންގެ ޒިކުރާ އައު ކުރައްވާފައެވެ.

ރައީސް ވިދާޅުވީ، ދިވެހިރާއްޖޭގެ މިނިވަންކަމާއި، ސިޔާދަތާއި އިސްތިޤްލާލް އެކީ-އެއްމާރަކުން ބަނދެވިގެންވާ ހަޤީޤީ ސިއްރަކީ މާތްވެގެންވާ އިސްލާމްދީން ކަމަށެވެ. ހަމައެއާއެކު، އެދީނުގެ ރިޞާލަތާ، ޙިދާޔަތުން ދިވެހި އުންމަތް އެކުއެކީ، އަލިވެ އުޖާލާވެގެން ދިއުމަކީ ދެދުނިޔޭގައިވެސް، ރާއްޖެއަށް ލިބޭނެ އެންމެ ބޮޑު ނަޞީބާ ރަޙްމަތްކަން ފާހަގަ ކުރައްވައި ރައީސް ވަނީ،  ދިވެހިރާއްޖެ ރާއްޖޭގެ ގޮތުގައިފުރާފުރިހަމަވި ސަބަބަކީވެސް މުސްލިމް ދިވެހި ރައްޔިތުންތަކެއް އުޅުންކަމަށް ވިދާޅުވެފައެވެ.

ޤައުމެއްގެ މިނިވަންކަމަކީ، އެޤައުމެއް ދިރިދެމި އޮތުމުގެ އެންމެ މުހިއްމު ރުކުންކަމަށް ރައީސް ވިދާޅުވިއެވެ. އެގޮތުން ސުލްޙަ މަސަލަސްކަމާއި، ހަމަޖެހުމާއި އެފަދަ ހުރިހާ ކަމެއް ގުޅިލާމެހެނީ މިނިވަންކަމުގެ ފޮނި މީރުކަމާކަން ރައީސް ފާހަގަ ކުރެއްވިއެވެ.

އޭގެ އިތުރުން ދިވެހިންނަކީ ފެށުނީއްސުރެ މިނިވަންކަމަށް ލޯބިކުރާ ބައެއްކަން ފާހަގަ ކުރައްވައި ރައީސް ވިދާޅުވީ، އެކީ އެކަތިގަނޑެއްގެ ގޮތުގައި މިނިވަންކަމަށްޓަކާ ވާންޖެހުނު ކޮންމެ ޤުރުބާނީއެއް ދިވެހިންވަނީ ވެފައި ކަމަށެވެ.

ރައީސް އިތުރަށް ވިދާޅުވީ ކިތަންމެ ހިޔާލުތަފާތުވީނަމަވެސް އެންމެން އެއްބައިވަންތަ ވުމަކީ މިނިވަންކަން މަތީގައި ދެމިތިބުމަށް އެންމެ މުހިއްމު އެއް ކަންތައް ކަމަށެވެ.

މިނިވަންކަމަށްޓަކައި ޤައުމެއްގެ ދާޚިލީ، އަދި ޚާރިޖީ ސިޔާސަތުގެ ދައުރުވެސް ވަރަށް މުހިންމުކަމަށް ރައީސް ވިދާޅުވިއެވެ. އެގޮތުން މި ސަރުކާރުގެ ކޮންމެ ސިޔާސަތަކީ، ދިވެހިރާއްޖޭގެ މިނިވަންކަމާއި ތަރައްޤީއާ ކުރިއެރުމަށް ލާބަހުރި ފަހި ސިޔާސަތެއްކަމަށް ރައީސް ވިދާޅުވިއެވެ.

ރައީސް ވިދާޅުވީ މި ސަރުކާރުގެ ޚާރިޖީ ސިޔާސަތަކީ ދުނިޔެ ބަލައިގެންފައިވާ ތިލަފަތް ހަމަ ހަރުދަނާ ސިޔާސަތެއް ކަމަށެވެ.

މުޖްތަމަޢުގެ ބައިބައިވުމާ، ދެބަސްވުމާ، ހަމަނުޖެހުމާ، ހައިޖާނަކީ ޤައުމެއްގެ މިނިވަންކަން ރަމްޒުކޮށްދޭ ކަމެއް ނޫންކަމަށް ރައީސް ވިދާޅުވިއެވެ.

ރާއްޖޭގައި ޖުލައި މަހުގެ 26 ވަނަ ދުވަސް ފާހަގަކުރަމުން ދަނީ މިނިވަން ދުވަހުގެ ގޮތުގައެވެ. މި ދުވަސް ފާހަގަކުރަމުންދަނީ 1887 ވަނަ އަހަރު ޑިސެމްބަރުން، 1965 ވަނަ އަހަރުގެ ޖުލައި މަހުގެ ސައްބީސް ވަނަ ދުވަހާހަމައަށް އިނގިރޭސީންގެ ހިމާޔަތުގެ ދަށުގައި އޮތުމަށްފަހު ރާއްޖެއަށް ފުރިހަމަ ސިޔާސީ މިނިވަންކަން ލިބުމާއި ގުޅިގެންނެވެ.