ދުވާފަރު ކައުންސިލްގެ އިންކުއަރީ ހެދުމުގެ މަސައްކަތް ފަށައިފި
ދުވާފަރު ކައުންސިލް މެމްބަރުންގެ އެކައުންޓަށް ބޮޑެތި އަދަދުތަކުން ފައިސާ ވަދެފައިވާ ކަމަށް ދައްކާ
ރ.ދުވާފަރު
ރ. ދުވާފަރު ކައުންސިލުގެ ޚިޔާނާތުގެ މައްސަލަތަކެއް ފާހަގަވެފައިވާތީ އެ މައްސަލަ ބެލުމަށް އިންކުއަރީއެއް ހެދުމުގެ މަސައްކަތް ކުރަމުންދާ ކަމަށް ލޯކަލް ގަވަރމަންޓް އޮތޯރިޓީ (އެލްޖީއޭ) އިން ބުނެފިއެވެ.
ހޯމަ ދުވަހު ނެރުނު ބަޔާނެއްގައި އެލްޖީއޭއިން ބުނީ ދުވާފަރު ކައުންސިލްގެ ހާއްސަ މޮނިޓަރިން ރިޕޯޓެއް ތައްޔާރުކޮށް އާއްމު ކުރީ އެ ރަށު ކައުންސިލުގެ އިދާރީ ހިންގުމާއި ފައިސާގެ މުއާމަލާތްތަކުގައި ވައްކަމާއި ކޮރަޕްޝަން ހިންގާކަމަށް ގިނަ ފަރާތްތަކަކުން ޝަކުވާ ހުށަހެޅުމުން ކަމަށެވެ. އެގޮތުން، ޝަކުވާތައް ލިބުމުން އެލްޖީއޭގެ ކަމާ ގުޅޭ މުވައްޒަފުން އެކުލެވޭ ޓީމެއް ދުވާފަރަށް ގޮސް ފާހަގަ ކުރެވުނު ކަންކަމުގެ މައްޗަށް ތައްޔާރު ކުރި ރިޕޯޓެއް ކަމަށް ވެސް ވަނީ ބުނެފައެވެ.
މި ރިޕޯޓް އާއްމުކޮށްފައިވަނީ އެލްޖީއޭގެ ބޯޑުން ފާސް ކުރުމުންކަން ފާހަގަކޮށް އެ އޮތޯރިޓީން ބުނީ ރިޕޯޓް އާއްމު ކުރުމުގެ ކުރިން މޮނިޓަރިންގެ ތެރެއިން ފާހަގަ ކުރެވުނު މައްސަލަތަކަށް އާއްމު އުސޫލުގެ ތެރެއިން ޖަވާބުދާރީވުމުގެ ފުރުސަތު ދުވާފަރު ކައުންސިލަށް ދިން ކަމަށެވެ.
މި ރިޕޯޓާ ގުޅިގެން އިދާރީ ހިންގުމާއި މާލީ މުއާމަލާތް ކުރުމުގައި އިހުމާލުވެފައިވާ ފަރާތްތަކާމެދު ފިޔަވަޅު އެޅުމަށް ތަހުގީގީ އިދާރާތަކުގައި ބުނެފައިވާ ކަމަށް ވެސް އެލްޖީއޭގެ ބަޔާނުގައި ވަނީ ބުނެފައެވެ.
އެލްޖީއޭއިން ނެރުނު ރިޕޯޓުގައި ބުނެފައިވާ ގޮތުގައި ދުވާފަރު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ ހިމެނޭހެން ބައެއް މެމްބަރުންނާއި ބައެއް މުވައްޒަފުންގެ އަމިއްލަ އެކައުންޓުތަކަށް ބޮޑެތި އަދަދުތަކުން ފައިސާ ޖަމާކޮށްފައިވާ ކަމަށެވެ. އަދި ނަގުދު ފައިސާ ވެސް ބައެއް މެމްބަރުންނަށް ދީފައިވާކަން ފާހަގަކުރެވިފައިވާ ކަމަށް ވެސް ވަނީ ބުނެފައެވެ.
އެލްޖީއޭއިން ބުނެފައިވާ ގޮތުގައި އެކައުންޓުތަކަށް ވަދެފައި ހުރި ފައިސާ އާއި ނަގުދު ފައިސާގެ ގޮތުގައި ދީފައި ހުރި ފައިސާގެ އެއްވެސް ތަފްސީލީ މައުލޫމާތެއް ލިޔެކިޔުންތަކުން ފެންނަން ނެތެވެ.
މިކަމާ ގުޅޭގޮތުން ދުވާފަރު ކައުންސިލުން ބުނެފައިވަނީ އެ ކައުންސިލުން މާލީ މުއާމަލާތްތައް ހިންގާފައިވަނީ ކުރިންވެސް އެ މުއާމަލާތްތައް ހިންގަމުން އައި ގަވާއިދުގެ ތެރެއިން ކަމަށެވެ. އަދި އެ ކައުންސިލަށް ޖަވާބުދާރީވާނެ ފުރުސަތެއް ނުދީ ރިޕޯޓް އާއްމު ކުރުމަކީ އެލްޖީއޭއިން ކުރި ޒިންމާދާރުކަން ކުޑަ ކަމެއްކަމަށް ވެސް ވަނީ ބުނެފައެވެ.
