މަސްތުވެގެން މަގުމައްޗަށް، ރައްޔިތުން ބޭނުންވަނީ އަމާންކަން!

މަސްތުވާތަކެއްޗަކީ ރާއްޖޭގައި އޮތް އިޖުތިމާއީ އެންމެ ބޮޑު އެއް މައްސަލައެވެ. މަސްތުގެ ހާލަތުގައި މިހާރު ނުކުންނަނީ މަގުމައްޗަށެވެ. މަގުމަތީގައި އެއްބަޔަކު ނުހިނގި ވެއްޓިފައި ތިބޭއިރު، އަނެއް ބަޔަކު އުޅެނީ އާއްމުންނަށް އުނދަގޫކުރުމުގައެވެ. މިކަން މާލޭގެ މަގުމަތީގައި ގިނަވެ، މަގުމަތިން އާއްމުންނަށް ލިބެންވާ އަމާންކަން ނެތްކަމަށާއި، އެ އަމާންކަން ޔަގީންކޮށްދޭން ތިބި ފަރާތްތަކަށް އެކަން ނުކުރެވޭކަމަށް ގިނަ ބަޔަކު ގަބޫލުކުރެއެވެ.

މަސްތުގެ ހާލަތުގައި ހުރި ފިރިހެނަކު ފެންނަ ވީޑިއޯއެއް ސޯޝަލް މީޑިއާގައި ހިއްސާކޮށް މީހަކު ކޮށްފައިވާ ޕޯސްޓެއްގައި ބުނެފައިވަނީ، މީހަކު މަގުމަތީގައި ހުރެގެން އޭނާގެ ޖިންސީ ގުނަވަން މަގުމަތިން ދާ މީހުންނަށް ދައްކަމުންދިޔަކަމަށެވެ. ވީޑިއޯގައިވެސް އެފަދަ ގޮތަކަށް އޭނާ އަމަލުކުރާތަން ފެނެއެވެ. މި ވީޑިއޯ ހިއްސާކުރި މީހާވެސް ވަނީ، މަގުމައްޗަކީ ރައްކާތެރި ތަނަކަށް ހަދައިދިނުމަށް މޯލްޑިވްސް ޕޮލިސް ސަރވިސްއަށް ގޮވާލާފައެވެ.

އެ ވީޑިއޯގެ ކުރިންވެސް އެފަދަ އަމަލެއްގައި މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މަގުމަތިން ދިޔަ އަންހެންކުދިންތަކަކަށް ޖިންސީ ގުނަވަން ދެއްކިިކަމުގެ ތުހުމަތުގައި ހައްޔަރުކޮށްފައިވަނީ ދިވެހި ޒުވާން ފިރިހެނެކެވެ. އޭނާ އެވަގުތު ހުރީ މަސްތުގެ ހާލަތުގައިކަމަށް އެކުދިން ބުނެއެވެ. އަދި އޭނާ ފުލުހުންނާ ހަވާލުކުރުމުން ފުލުހުންގެ ކުރިމަތީގައި، އެ އަންހެން ކުދިން މަރާލާނެކަމުގެ އިންޒާރު ދިންކަމަށްވެސް އެކުދިން ބުނެއެވެ.

މިއީ މިގޮތަށް މަސްތުގެ ހާލަތުގައި ތިބެގެން މީހުންނަށް ފުރައްސާރަ ކޮށް، ޖިންސީ ގުނަވަން ދައްކައި، މީހުންނަށް ބިރުދެއްކި ފުރަތަމަ ފަހަރެއް ނޫނެވެ. މިފަދަ އެތައް މައްސަލަތަކެއް ފުލުހަށްވެސް ވަނީ ހުށަހަޅާފައެވެ. ނަމަވެސް ހިތާމަޔަކީ މިކަންކަން ހައްލުނުކުރެވި އަދިވެސް މާލޭގެ މަގުތަކުން މި މަންޒަރުތައް ފެނުމެވެ.

މަސްތުގެ ހާލަތުގައި ނޫނަސް ބައެއް މީހުން މަގުމަތީގެ އަމާންކަން ނަގާލައެވެ. އެގޮތުން، މާރާމާރީ ހިންގުމާއި ފޭރުމަކީވެސް މާލޭގެ މަގުމަތިން ފެންނަ ކަންކަމެވެ.

މަގުތަކަކީ ކުދި ބޮޑު އެންމެން ބޭނުންކުރާ ތަނަކަށްވާއިރު، އެތަން ވާންޖެހޭނީ ކޮންމެ މީހަކަށްވެސް ރައްކާތެރި ތަނަކަށެވެ. ކުޑަކުދިންނަށް ފެނިގެންނުވާނެ މަންޒަރުތައް މަގުމަތިން ފެނިގެން ނުވާނެއެވެ. އަދި އިވިގެންނުވާނެ އަޑުތައް މަގުމަތިން އެ ކުދިންނަށް އިވިގެން ނުވާނެއެވެ.

މަގުމައްޗަކީ އާއްމުންނަށް ރައްކާތެރިތަނެއްކަން ކަށަވަރުކުރަން ޖެހޭނީ ފުލުހުންނެވެ. ނަމަވެސް އެކަން ފުލުހުންނަށް ނުކުރެވޭކަމަށް ގިނަ ބަޔަކު ގަބޫލުކުރެއެވެ. ބައެއް ފަރާތްތަކުން ބުނާގޮތުގައި ފުލުހުންނަށް އަޅާނުލެވެނީއެވެ. ރައްޔިތުން އެދެނީ ފުރިހަމަގޮތުގައި ޒިންމާ އަދާކޮށް، އެފަދަ ކުށްވެރިން ހައްޔަރުކޮށް ހައްގު އަދަބު ދިނުމަށާއި، މާލޭގެ މަގުތަކަކީ އާއްމުންނަށް ރައްކާތެރިތަނަކަށް ހަދައިދިނުމަށެވެ.

މަސްތުވާތަކެތީގެ ވަބާގައި ރާއްޖޭގެ އައު ޖީލުތައްވެސް ދަނީ ހަލާކުވަމުންނެވެ. އުމުރުން އެންމެ 8 އަހަރުގެ ކުދިންވެސް އެ ވަބާގައި ޖެހިފައިވާއިރު، މިއީ ހަރުކަށި ފިޔަވަޅުތަކެއް ނާޅައިފިނަމަ ގައުމުގެ މުސްތަގުބަލު އެއްކޮށް ހަލާކުކޮށްލާނެ ކަމެކެވެ.