އާރްޑީސީއަކީ ހިލޭސާބަހަށް މަސައްކަތްކުރާ ކުންފުންޏެއްނޫން: މޫކޭ
ކުރިޔަށް އޮތް އަހަރުތަކުގައި އާރްޑީސީން އިތުރު ކާމިޔާބީތައް ހޯދާނެ
އާރްޑީސީގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ)
އާރްޑީސީއަކީ ހިލޭ ސާބަހަށް މަސައްކަތް ކުރާ ކުންފުންޏެއް ނޫންކަމަށް އެ ކުންފުނީގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ) ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން މޫކޭ ވިދާޅުވީ، އާރްޑީސީއަކީ ރާއްޖޭގެ އެކި ރަށްރަށުގެ މަގު ހެދުމުގެ މަގުސަދުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އުފައްދަވާފައިވާ ކުންފުންޏެއްކަމަށާއި، އާރްޑީސީއާއެކު އުފެދުނު އެހެން ކުންފުނިތަކާ އަޅައިބަލާއިރު، އާރްޑީސީން ބޮޑެތި ކުރިއެރުންތަކެއް ހޯދާފައިވާކަމަށެވެ.
މޫކޭ ވިދާޅުވީ، ކުރިޔަށް އޮތް އަހަރުތަކުގައި އާރްޑީސީން އިތުރު ކާމިޔާބީތައް ހޯދާނެކަމަށާއި، އެކަމަށް ގަދައަޅާ މަސައްކަތްކުރާނެކަމަށެވެ. އަދި އާރްޑީސީގެ ސްޓާފުންނަކީ އެއް އަޒުމެއްގައި، ވަރުބަލިކަމެއްނެތި އެއް ޓީމެއްގެގޮތުގައި މަސައްކަތްކުރާ ސްޓާފުންތަކެއްކަމަށާއި، ކުރިޔަށް އޮތް ދުވަސްތަކުގައި އާރްޑީސީން ކަނޑައެޅި ލަނޑުދަނޑިތައް ހާސިލްކުރާނެކަމަށެވެ.
މާލޭ ސްޓްރީޓް ސްކޭޕިންގ ޕްރޮޖެކްޓަށް އަލިއަޅުވާލައްވައި މޫކޭ ވިދާޅުވީ، އެ ޕްރޮޖެކްޓު ލަސްވެފައި އޮންނަނީ ސަރުކާރު ނުވަތަ އާރްޑީސީގެ މަސައްކަތްތައް ލަސްވެގެންކަމަށް ބައެއް ފަރާތްތަކުން ރައްޔިތުންނަށް ވިސްނައިދޭ ކަމަށެވެ.
އެއީ ކަނޑައެޅިގެން ދޮގެއްކަން ފާހަގަ ކުރައްވައި އޭނާ ވިދާޅުވީ، މަސައްކަތް އޭރު ހުއްޓާލީ އާރްޑީސީއަށް ދޭންޖެހޭ އެތައް މިލިއަން ރުފިޔާއެއް ނުދީގެން ކަމަށެވެ. އެގޮތުން މާލޭ ސިޓީ ކައުންސިލުން އާރްޑީސީއަށް ދައްކަންޖެހޭ އެތައް މިލިއަން ރުފިޔާއެއް ނުދައްކައިހުރިކަމަށް މޫކޭ ވިދާޅުވިއެވެ. އަދި އެކަމުގެ ސަބަބުން ކުންފުންޏަށްވެސް ބޮޑެތި ގެއްލުންތަކެއްވިކަން އޭނާ ފާހަގަ ކުރެއްވިއެވެ.
އާރްޑީސީއަކީ ހިލޭ ސާބަހަށް މަސައްކަތްކުރާ ކުންފުންޏެއް ނޫންކަމަށާއި، މުވައްޒަފުންނާއި އެހެން ޚަރަދުތައްވެސް ކުންފުނިން ކުރަންޖެހޭކަމަށެވެ.
އެކަންކަން ހައްލުކުރުމަށް ގިނަ މަޝްވަރާތަކެއްކޮށްގެންވެސް އޭރު ހައްލެއް ނައިކަަމަށް އޭނާ ވިދާޅުވިއެވެ.
މޫކޭ ވިދާޅުވީ އެމްއާރުޑީސީން ގެއްލިފައިވާ އެތައް ވެހިކަލެއް އެބަހުރި ކަމަށާއި، އެއިން އެއްވެސް އެއްޗަކަށް ވީނުވީއެއް ނޭނގޭކަމަށެވެ.
އަދި މީގެކުރިން ކުންފުނިތަކަށް ވާނުވާ ނުވެސް އެނގޭކަމަށާއި، އެއީ ކިހިނެއްވެގެން ކަމެއް ނޭނގޭކަމަށެވެ. އަދި ކޮންމެ ކުއާޓަރއެއްގައި ކަން ހިނގާފައިވާ ގޮތް އެނގެން ނޯންނަކަމަށް މޫކޭ ވިދާޅުވިއެވެ. އެހެންނަމަވެސް މިއަދު ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކަންކަން ބަލައި ރައްޔިތުންނަށް ހާމަކުރަމުންދާކަމަށް އޭނާ ވިދާޅުވިއެވެ. މިއަދުގެ ސަރުކާރަކީ ރައްޔިތުންނަށް ވެރިކަންކޮށްދޭ ސަރުކާރެއް ކަމަށްވެސް މޫކޭ ވަނީ ވިދާޅުވެފައެވެ.
އެގޮތުން، ރައީސް އިބްރާހީމް މުހައްމަދު ސޯލިހު ވެރިކަމާ ހަވާލުވެވަޑައިގެންނެވިއިރު، މަގުތައް ޒަމާނީ ފެންވަރަށް ތަރައްގީކުރާނެ ކުންފުންޏެއް ނެތުމުން، 2019 ވަނަ އަހަރު އޮކްޓޫބަރު މަހުގެ ތެރޭގައި އާރްޑީސީގެ ނަމުގައި ކުންފުންޏެއް އުފެއްދީކަން މޫކޭ ފާހަގަކުރެއްވިއެވެ.
