ލީގުގައި ކޮންމެ ޓީމަކަށް ބާކީ ދެ މެޗު، ގަދަ ހަތަރެއްގެ ފަހު ޖާގައިގެ ވާދަވެރިކަން ބޮޑު!

ދިވެހި ޕްރިމިއަރ ލީގުގައި ކޮންމެ ޓީމެއް 19 މެޗު ކުޅެ ނިމުނުއިރު, ގަދަ ހަތަރެއްގެ ވާދަވެރިކަން ބޮޑުވެއްޖެއެވެ.

މިހަފުތާގެ މެޗުތައް ހުކުރު ދުވަހުގެރޭ ނިމުނުއިރު ތިންވަނައަށް ޖެހިލީ ޓީސީއެވެ. އެއީ 27 ޕޮއިންޓާއެކުއެވެ. ޓީސީގެ ފަހަތުން އޮތް ތިން ޓީމްވެސް އޮތީ 26 ޕޮއިންޓްގައެވެ. ޓީސީ 27 ޕޮއިންޓް ހަމަކުރީ ހުކުރު ދުވަހުގެ ރޭ ކްލަބް ވެލެންސިޔާއާ ވާދަކޮށް ހޯދި ޕޮއިންޓާއެކުއެވެ. އެ މެޗު އެއްވަރުވީ ލަނޑެއްނުޖެހިއެވެ. އެމެޗުން ލިބުނު ޕޮއިންޓާއެކު ވެލެންސިޔާއަށް 26 ޕޮއިންޓް ލިބުނުނަމަވެސް ލަނޑުގެ ތަފާތުން ވެލެންސިޔާއަށް ލިބެނީ ހަވަނައެވެ. ހަތަރުވަނަ ލިބެނީ ގްރީން ސްޓްރީޓްސްއަށެެވެ. ފަސްވަނަ ލިބެނީ ޔުނައިޓެޑް ވިކްޓްރީއަށެވެ. ތިން ޓީމްވެސް އޮތީ 26 ޕޮއިންޓްގައެވެ. ކޮލިފިކޭޝަން ކުޅެން ޖެހޭނެކަން ޔަގީންވެފައިވަނީ ހަތްވަނާގައި އޮތް ސަސްއާއި އަށްވަނާގައި އޮތް ދަ ގްރާންޑޭއަށެވެ.

ނަވާރަވަނަ މެޗު ނިމުނުއިރު ލީގުގެ ޗެމްޕިއަންކަން މާޒިޔާއަށް ވަނީ ކަށަވަރުވެފައެވެ. އަދި ލީގު ތާވަލްގެ ދެވަނަވެސް އީގަލްސްއަކަށް ނުގެއްލޭނެއެވެ. އެކަމަކު ތިންވަނަ ހޯދުމުގެ ފުރުސަތު ހަތަރު ޓީމަށްވެސް އެބައޮތެވެ. އެއީ މިވަގުތު ތިންވަނާގައި އޮތް ޓީސީގެ އިތުރުން، ޕޮއިންޓެއްގެ ފަރަގަކާއެކު ޓީސީގެ ފަހަތުގައި އޮތް ތިން ޓީމެވެ.