ހަރިކޭން އާއި ޔެޓީ ފައިނަލްއަށް

ހދ. ހިރިމަރަދޫ ކުލަބް ޑޮމިނޭޓަރސް އިން އިންތިޒާމުކޮށްގެން ކުރިއަށްގެންދާ ޑޮމިނޭޓަރސް ފުޓްސަލް ކަޕް 2022 ގެ ފައިނަލުގެ ޖާގަ ހަރިކޭން އަދި ޔެޓީ ހޯދައިފިއެވެ.

މި ދެޓީމުވެސް ފައިނަލުގެ ޖާގަ ކަށަވަރުކުރީ މިއަދު ކުޅުނު މެޗު ކާމިޔާބުކޮށްގެންނެވެ. މިއަދުގެ ފުރަތަމަ މެޗުގައި ބައްދަލުކުރީ އެފްސީ ހިރިއާއި ޔެޓީއެވެ. މި މެޗު ޔެޓީ ކާމިޔާބުކުރީ 4-5ންނެވެ. މެޗުގެ މޮޅު ކުޅުންތެރިއަކީ ޔެޓީގެ އަލީ އަންވަރުއެވެ.

ދެވަނަ މެޗުގައި ހަރިކޭން ނިކުތީ ޓީމް ރޯޔަލްއާއި ދެކޮޅަށެވެ. ރޯޔަލްގެ މައްޗަށް ހަރިކޭން ކުރިހޯދީ 3-0ންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ހަރިކޭންގެ އަހުމަދު އާފަގުއެވެ.

މި ދެޓީމަށް ފައިނަލުގެ ޖާގަ ލިބުނީ ހަތަރު ޓީމު ބައިވެރިވި މި މުބާރާތުގެ ލީގު ބުރު ނިންމާލިއިރު ތާވަލުގެ އެންމެ ކުރިން ޖާގަ ހޯދުމުންނެވެ. މުބާރާތުގެ ފައިނަލް މެޗު އޮންނާނީ މި މަހުގެ 24 ވަނަ ދުވަހުއެވެ.