ދިހަވަރަކަށް އަހަރު ފަހުން އެމެރިކާގައި ފުރަތަމަ ފުރަތަމަ ފަހަރަށް މީހަކަށް ޕޯލިއޯ ޖެހިފައިވާކަން ރިޕޯޓްކޮށްފިއެވެ. ނިއުޔޯކްގެ ސިއްހީ އޮފިޝަލުން ރިޕޯޓްކޮށްފައިވާ ގޮތުގައި ބަލި ޖެހިފައިވަނީ ރޮކްލަންޑް ކައުންޓީއަށް ނިސްބަތްވާ މީހަކަށެވެ. މިއީ މެންހެޓަން ސްޓޭޓް އާއި 48 ކިލޯމީޓަރު ދުރުގައިވާ ތަނެކެވެ. އޮފިޝަލުން ހާމަކޮށްފައިވާ ގޮތުގައި އެމީހާގެ ހާލަތު ދަނީ ގާތުން މޮނިޓަރ ކުރަމުންނެވެ. އަދި އޭނަ ފުށުން އެހެން މީހުންނަށް ބަލި އަރާފައިވާކަމަކަށް ނުބެލެވެއެވެ. އެހެން ނަމަވެސް އިތުރު ކޭސްތައް ފެނިދާނެކަމަށް ސަމާލުވުމަށާއި އަދި ވެކްސިން ނުޖަހާތިބި މީހުން ވެކްސިން ޖެހުމަށް ދަނީ އަންގަމުންނެވެ.

ޕޯލިއޯ ބައްޔަކީ ދުނިޔޭގެ ގިނަ ހިސާބުތަކަކުން މުޅިން ފިލުވާލެވިފައިވާ، އެހެން ނަމަވެސް ނުރައްކާތެރި، ފަސޭހައިން އަރާ ބައްޔެކެވެ. ޕޯލިއޯ ބަލި އާންމު ގޮތެއްގައި ޖެހެނީ ކުޑަކުދިންނަށެވެ.  

އެންމެ ފަހުން ފެނުނު މި ކޭސް އާއި ގުޅިގެން އެމެރިކާގެ ސެންޓަރ ފޯ ޑިޒީސް ކޮންޓްރޯލް (ސީޑީސީ) އިން ބުރާސްފަތި ދުވަހު ހާމަކޮށްފައިވާ ގޮތުގައި އެންމެ ފަހުން އެމެރިކާގައި ޕޯލިއޯ ބައްޔަށް ޕޮޒިޓިވް ވެފައިވަނީ 2013 ވަނަ އަހަރު އިންޑިޔާއިން އެމެރިކާގެ ޓެކްސަސްއަށް ދިޔަ އާއިލާއެއްގައި ހިމެނޭ ހަތް މަހުގެ ކުއްޖެކެވެ. އޭގެ ކުރިން 1979 އިން ފެށިގެން އެއްވެސް ކޭސްއެއް ފެނިފައި ނުވާކަމަށް އެފަރާތުން ބުނެފައިވެއެވެ.

1955 ވަނަ އަހަރުން ފެށިގެން ހިންގި ކާމިޔާބު ވެކްސިނޭޝަން ޕްރޮގްރާމަކަށް ފަހު 60ގެ އަހަރުތަކުގައި ބަލިޖެހުނު މީހުންގެ އަދަދު100 އަށް، އަދި 70ހައިގެ އަހަރުތަކުގައި ބަލި ޖެހުނު މީހުންގެ އަދަދު 10އަށް ތިރި ކުރެވުނެވެ. އަދި 1979 ވަނަ އަހަރުވަނީ ޕޯލިއޯ މުޅި އެމެރިކާއިން ފިލުވާލެވިއްޖެ ކަމަށް އިއުލާންކޮށްފައެވެ.

އަދިވެސް އަފްޣާނިސްތާން، ޕާކިސްތާން އަދި އިންޑިޔާގެ ބައެއް ހިސާބުތަކުން ޕޯލިއޯ ފެންނަ ކަމަށް ރިޕޯޓްތައް ލިބެއެވެ.