ރާއްޖެ ޓީވީއާއި އުހުދު ހައްޖު އެންޑް އުމްރާ ގްރޫޕް ގުޅިގެން މަސައްކަތްކުރުމަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ ބުރާސްފަތި ދުވަހު ރާއްޖެ ޓީވީގައި ބޭއްވި ޚާއްސަ ރަސްމިއްޔާތެއްގައެވެ. މި އެއްބަސްވުމުގައި ރާއްޖެ ޓީވީގެ ފަރާތުން ސޮއިކުރެއްވީ ޑެޕިއުޓީ ޗީފް އޮޕަރޭޓިންގ އޮފިސަރު ނާޒްމީ ސައީދުއެވެ. އަދި އުހުދު ހައްޖު އެންޑް އުމްރާ ގްރޫޕްގެ ފަރާތުން ސޮއިކުރެއްވީ ޗެއަރމަން އަހުމަދު ފާރޫގުއެވެ.
މި އެއްބަސްވުމާ ގުޅޭގޮތުން އެ ގްރޫޕުގެ ޑިރެކްޓަރ ޑރ. އަބްދުﷲ ޖަމީލް ވިދާޅުވީ، މި އެއްބަސްވުމާއެކު އެ ކުންފުންޏާއި ރާއްޖެޓީވީއާ ދެމެދު އޮތް ގުޅުން އިތުރަށް ބަދަހިވެގެންދިޔައީކަމަށެވެ. އެގޮތުން، މި އެއްބަސްވުމުގެ ދަށުން ދެ ކުންފުންޏަށްވެސް ފައިދާވާނެކަން އޭނާ ފާހަގަކުރެއްވިއެވެ.
ޑރ. ޖަމީލް ވިދާޅުވިގޮތުގައި، މި އެއްބަސްވުމުގެ ދަށުން، ރާއްޖެ ޓީވީއާއި ރާއްޖެއެމްވީ މެދުވެރިކޮށް އެ ގްރޫޕާގުޅޭ މައުލޫމާތާއި ޚަބަރު އާއްމުންނަށް ފޯރުކޮށްދޭނެއެވެ. އަދި އެ ގްރޫޕުގެ ޚަރަދުގައި 2023ން ފެށިގެން ކޮންމެ އަހަރަކު ރާއްޖެ ޓީވީގެ 2 މުވައްޒަފަކަށް އުމްރާއަށް ދިއުމުގެ ފުރުސަތު ލިބިގެންދާނެކަމަށްވެސް އޭނާ ވިދާޅުވިއެވެ.
މި އެއްބަސްވުމުގެ ދަށުން މިއަހަރުވެސް ރާއްޖެ ޓީވީގެ މުވައްޒަފަކަށް އުމްރާގެ ފުރުސަތު ލިބޭނެއެވެ.
