ޔޯގާ ހަރަކާތުގައި ހަމަނުޖެހުން އުފެއްދިކަމުގެ ތުހުމަތުގައި ހައްޔަރުކުރި ޝައިޚް މުހައްމަދު ފަޒްލޫން ޝަރުތުތަކާއެކު ބަންދުން ދޫކޮށްލައިފިއެވެ.

އޭނާ ހައްޔަރުކޮށްފައިވަނީ 22 ޖޫންވީ ބުދަ ދުވަހުގެ ރޭގެ ވަގުތެއްގައެވެ. އޭރު އޭނާ ހައްޔަރުކޮށްފައިވަނީ، ގަލޮޅު ދަނޑުގައި ހިންގި ހަމަނުޖެހުންތަކާ ގުޅިގެން ފުލުހުން ހިންގި އޮޕަރޭޝަނެއްގެ ދަށުންނެވެ. އެ މައްސަލައާ ގުޅިގެން އޭނާއަށް ދީފައިވާ ދީނީ ތަގުރީރު ކުރުމާއި ވައުޟޫ ވިދާޅުވުމުގެ ހުއްދަވެސް އިސްލާމިކް މިނިސްޓްރީން ވަނީ ހިފަހައްޓާފައެވެ.

އޭނާ ބަންދު ކުރުމަށްފަހު އެކި ފަހަރުމަތިން މުއްދަތު އިތުރު ކުރަމުންގޮސް މިހާރު ޝަރުތުތަކާއެކު ބަންދުން ދޫކޮށްލުމަށް ވަނީ ނިންމާފައެވެ. އެގޮތުން މާލެއާއި ރާއްޖެއިން ބޭރަށް ދާނަމަ ކޯޓަށް އެންގުމާއި، ފުލުހުންގެ ތަހުގީގަށް އެއްބާރުލުން ދިނުމާއި، ކޯޓަށް ހާޒިރުވާން އެންގުމުން ހާޒިރުވުން ފަދަ ޝަރުތުތައް ކޮށްފައިވެއެވެ.

ބައިނަލްއަގުވާމީ ޔޯގާ ދުވަހުގެ ހެނދުނު ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތް ހުއްޓުވުމަށް އެތަނަށް ވަދެ ބަޔަކު ވަނީ އެތަނުގައި ހުރި ތަކެއްޗާއި ހަރަކާތުގައި ތިބި މީހުންނަށް ހަމަލާ ދީފައެވެ. މި ހަމަނުޖެހުންތަކާ ގުޅިގެން ފުލުހުން ވަނީ ބައެއް މީހުން ހައްޔަރުކޮށްފައެވެ.

ޔޯގާ ހަރަކާތް ހުއްޓުވުމަށް ބާރުގެ ބޭނުން ކުރުމަށް، އެކަމުގައި އިސްކޮށް އުޅުނު ބައެއް ފަރާތްތަކުން ބާރުއަޅާފައިވާ ކަމަށާއި، މި މައްސަލައިގައި ހައްޔަރުކުރި މީހުންގެ ތެރެއިން 4 މީހުން އޭގެ ތެރޭގައި ހިމެނޭކަމަށް ފުލުހުން ބުނެފައިވެއެވެ. އަދި ޔޯގާ ހަރަކާތް އޮތް ދުވަހުގެ ކުރީ ރެއިން ފެށިގެން އެ ހަރަކާތް ހުއްޓުވުމަށް ތައްޔާރުވިކަމަށާއި އެއިރުވެސް ހަރަކާތް ހުއްޓުވުމަށް އެކި ކަންކަން ރާވާފައިވާކަމަށް މައުލޫމާތު ލިބިފައިވާކަމަށް ފުލުހުން ވަނީ ބުނެފައެވެ.

މި މައްސަލަ ސީރިއަސް މައްސަލައެއްގެ ގޮތުގައި ދިވެހި ފުލުހުންގެ ހިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ދަނީ ތަހުގީގު ކުރަމުންނެވެ. އެ އަމަލު ހިންގުމުގައި ބައިވެރިވި މީހުންގެ މައްސަލަ ތަހުޤީޤުކޮށް، ޤާނޫނީ ފިޔަވަޅު އެޅުމަށް ކުރަންޖެހޭ މަސައްކަތްތައް ދިވެހި ފުލުހުންގެ ޚިދުމަތުން ކުރަމުންދާކަމަށް އެއިދާރާއިން ވަބީ ބުނެފައެވެ.

މި ޙަރަކާތުގެ ތެރެއިން ހަމަނުޖެހުން އުފެއްދި ފަރާތްތަކާމެދު ހަރުކަށި ފިޔަވަޅު އެޅުމުގެ އިތުރުން، ފުލުހުންގެ އޮޕަރޭޝަންތައް މިހާރަށްވުރެ ރަނގަޅު ކުރުމަށްވެސް މަސައްކަތް ކުރާނެކަން ފުލުހުން ބުނެފައިވެއެވެ.