ޖޫލްސް ކޮންޑޭ ހޯދުމަށް ޗެލްސީން ރަސްމީކޮށް ބިޑުކޮށްފި

ސެވިއްޔާއަށް ކުޅެމުން އަންނަ ފްރާންސްގެ ޑިފެންޑަރު ޖޫލްސް ކޮންޑޭ ހޯދުމަށް ޗެލްސީން ރަސްމީކޮށް ބިޑުކޮށްފިއެވެ.

މިއީ އައު ސީޒަނަށް ޗެލްސީގެ ޑިފެންސް ލައިން ވަރުގަދަ ކުރުމަށް އެ ޓީމުން ކުރާ މަސައްކަތުގެ ތެރެއިން ހޯދަން ބޭނުންވާ ކުޅުންތެރިޔެކެވެ. ޗެލްސީގެ ކޯޗު ތޯމަސް ޓުޗެލް މިހާރު ބޭނުންވަނީ ޑިފެންސްގގައި ކުޅޭނެ މޮޅު ކުޅުންތެރިންނެވެ.

ކޮންޑޭ ހޯދުމަށް ޗެލްސީން ބިޑުކުރިއިރު، އޭނާ ހޯދުމަށް ސްޕެއިންގެ ބާސެލޯނާއިން ވެސް އަންނަނީ މަސައްކަތް ކުރަމުންނެވެ. އައު ސީޒަނަށް ގިނަ ކުޅުންތެރިންތަކެއް ހޯދައި، ބާސެލޯނާގެ އަމާޒު ވެސް މިހާރު ހުރީ ޑިފެންޑަރުން ހޯދުމަށެވެ. ގިނަ ޓްރާންސްފާތަކަކަށްފަހު އެ ޓީމުގެ ރައީސް ޖޯން ލަޕޯޓާ ބުނީ ދެން ހޯދާނީ ޑިފެންޑަރުން ކަމަށް ހާމަކޮށްފައެވެ.

ޒުވާން ޑިފެންޑަރު ހޯދުމަށް ޗެލްސީން ވަނީ 55 މިލިއަން ޕައުންޑުގެ ބިޑެއް ހުށަހަޅާފައެވެ. ޗެލްސީގެ އައު އޯނަރު ޓޮޑް ބޮހްލީ ޓީމާ ހަވާލުވެ، އެ ޓީމުން އަންނަނީ ވަރުގަދަ ކުޅުންތެރިން ހޯދުމަށް މަސައްކަތް ކުރަމުންނެވެ. ބިޑަށް ބަލާއިރު، ޗެލްސީން ހުށަހަޅާފައިވާ އަގަކީ ރަނގަޅު އަގެއް ކަމަށް ބެލެވޭ ކަމަށް މީޑިއާ ރިޕޯޓުތައް ބުނެއެވެ. އަދި މިހާރު ޗެލްސީ އާއި ސެވިއްޔާއާ ދެމެދު ބިޑުގެ ސްޓްރަކްޗަރގެ ވާހަކަތައް ދަނީ ދެކެވެމުންކަމަށް ވެސް ރިޕޯޓުތައް ބުނެއެވެ.

ކޮންޑޭ ހޯދުމަށް ޗެލްސީން ރަސްމީކޮށް ބިޑު ކުރި ނަމަވެސް، އޭނާ ބަދަލުވާނެ ވަކި ކުލަބެއް އަދި ނުނިންމައެވެ. އޭނާ ހޯދުމަށް ބާސެލޯނާއިން ވެސް ވަރުގަދަޔަށް މަސައްކަތް ކުރާއިރު، އެ ޓީމަށް ބަދަލުވުމަކީ ވެސް އެކަށީގެންވާ ކަމެއް ކަމަށް ރިޕޯޓުތައް ބުނެއެވެ.

ކޮންޑޭ ވަނީ މިހާތަނަށް ސެވިއްޔާއަށް 95 މެޗު ކުޅެދީ، ފަސް ލަނޑު ޖަހާފައެވެ. އޭނާ ވަނީ ސެވިއްޔާއާއެކު ޔުއެފާ ޔޫރޮޕާ ލީގު ކާމިޔާބުކޮށްފައެވެ. މީގެ އިތުރުން ފްރާންސްގެ ޤައުމީ ޓީމަށް ވެސް ކުޅެމުން އަންނަ 23 އަހަރުގެ ކޮންޑޭ ވަނީ، މިހާތަނަށް ޤައުމީ ޓީމަށް 11 މެޗު ކުޅެދީފައެވެ. ޤައުމީ ޓީމުގައި އޭނާ ހިމަނާފައިވަނީ 2021 ވަނަ އަހަރުއެވެ. ފްރާންސާއެކު އޭނާ ވަނީ ޔުއެފާ ނޭޝަންސް ލީގު ކާމިޔާބުކޮށްފައެވެ.