އަންހެނުގެ ކޮމިޓީގެ އިންތިޚާބުތަކުގައި ވޯޓުލަނީ މަދު އިންސައްތައެއް، ކުރާ ޚަރަދަށް ބަލާއިރު ދެކޮޅު ނުޖެހޭ: އީސީ
އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބައި އިލެކްޝަނަކަށް އެވްރެޖުކޮށް 130،000 ރުފިޔާ ހޭދަވޭ
އީސީގެ ސެކްރެޓަރީ ޖެނެރަލް، ހަސަން ޒަކަރިއްޔާ
ރަށްރަށުގެ އަންހެންނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުތަކުގައި ވޯޓުލެވޭ އާބާދީއަކީ ވަރަށް ކުޑަ އިންސައްތައެއް ކަމަށާއި އެއީ ކުރާ ޚަރަދާއި އަޅާބަލާއިރު ދެކޮޅުޖެހޭ ވަރެއް ނޫން ކަމަށް އިލެކްޝަންސް ކޮމިޝަނުން ބުނެފިއެވެ.
"ރާއްޖެ ޓީވީ" ގެ ފަލަސުރުޚީގައި ވާހަކަދައްކަވަމުން އިލެކްޝަންސް ކޮމިޝަނުގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ ބައި އިލެކްޝަންތައް ބާއްވަން ޖެހޭ އަދަދު ވަރަށް ގިނަ ކަމަށެވެ. އަދި މިއީ ބޮޑެތި ޚަރަދުތަކެއް ހިނގާ ކަމެއް ކަމަށާއި ނަމަވެސް އެ އިންތިޚާބުތަކުގައި ވޯޓުލާ ފަރާތްތަކުގެ ތަރުހީބު ވަރަށް ކުޑަކަން ފާހަގަކުރެވިފައިވާ ކަމަށެވެ.
ޒަކަރިއްޔާ ވިދާޅުވިގޮތުގައި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުތަކުގައި އެވްރެޖުކޮށް ވޯޓުލަނީ ވޯޓުލެވޭ އާބާދީގެ 20 އިންސައްތައަށްވުރެ މަދު އަދަދެކެވެ. ނަމަވެސް ޚަރަދުގެ ގޮތުން ބަލާއިރު މިއިން ކޮންމެ އިންތިޚާބަކަށް އެވްރެޖުކޮށް 130،000 އެއްހާ ރުފިޔާ ހޭދަ ކުރަން ޖެހޭ ކަމަށް ވެސް އޭނާ ވިދާޅުވިއެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުތަކުގައި ތަރުހީބު ކުޑަ ނަމަވެސް ރައްޔިތުންގެ މަޖިލީހުގެ އިންތިޚާބުތަކާއި ރަށު ކައުންސިލްތަކުގެ އިންތިޚާބުތަކުގައި 70 އިންސައްތަ މީހުން ވޯޓުލާކަން ފާހަގަކުރެވިފައިވާ ކަމަށް ޒަކަރިއްޔާ ވިދާޅުވިއެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ މެމްބަރުން އިސްތިއުފާދޭ އަދަދު އިތުރުވެ، އެ ގޮނޑިތަކުގެ ބައި އިލެކްޝަން ބޭއްވުން އިލެކްޝަންސް ކޮމިޝަނަށް ބުރައަކަށްވެފައިވާއިރު، މިއަހަރު އެކަނިވެސް ބައި އިލެކްޝަންތަކަށް އެކަނިވެސް ހަތަރު މިލިއަނެއްހާ ރުފިޔާ ހޭދަ ކުރެވިފައިވާ ކަމަށް އެ އިދާރާއިން މައުލޫމާތުދެއެވެ.
ލާމަރުކަޒީ ގާނޫނަށް ގެނައި އިސްލާހާއެކު އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުތައް ވެސް މިހާރު ބާއްވަން ޖެހެނީ އިލެކްޝަންސް ކޮމިޝަނުންނެވެ. މީގެ ސަބަބުން އިންތިޚާބުތަކަށް ކަނޑައަޅާފައިވާ ބަޖެޓަށްވުރެ އެތައް ގުނައެއް އިތުރަށް ޚަރަދު ކުރަން ޖެހޭތީ އެކަން ހައްލު ކުރުމަށް ވެސް ދަނީ މަޝްވަރާތައް ކުރަމުންނެވެ. އެގޮތުން ބައި އިލެކްޝަންތައް އަހަރަކު އެއްފަހަރު ބާއްވާ ގޮތަށް މަޝްވަރާތައް ކުރެވެމުންދާ ކަމަށް އިލެކްޝަންސް ކޮމިޝަނުން ބުނެއެވެ.
މީގެ އިތުރުން ކުރިއެކޭ އެއްގޮތަށް އެ ރަށެއްގެ ކައުންސިލުގެ ޚަރަދުގައި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުތައް ބާއްވާނަމަ ވެސް އިލެކްޝަންސް ކޮމިޝަނަށް ޚަރަދުގެ ގޮތުން ވަރަށް ބޮޑު ލުޔެއް ލިބިގެންދާނެ ކަމަށް ވެސް އެ އިދާރާއިން ބުނެއެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ މެމްބަރުން އިސްތިއުފާދޭ ސަބަބުތަކުގެ ތެރޭގައި ދާއިމީ ވަޒީފާއެއް އަދާ ކުރަމުން އެ މަޤާމު އަދާކުރުމުގައި ގޮންޖެހުންތައް ހުރުމާއި ކައުންސިލްތަކުގެ އެއްބާރުލުން ނުލިބުމާއި އެކަށީގެންވާ މުސާރައެއް ނުލިބުން ހިމެނެއެވެ. ނަމަވެސް ސީދާ ސަބަބުތައް ދެނެގަނެވޭނީ ތައުލީމީ ދިރާސާއެއް ހަދައިގެން ކަމަށް އިލެކްޝަންސް ކޮމިޝަނުން ބުނެއެވެ.
