ކަރެކްޝަންސްއަށް އިތުރު އޮފިސަރުން ބޭނުންވޭ: ސީޕީ
ކަރެކްޝަންސްގައި ހަރަކާތްތެރިވާ މުދައްރިބުންނަށް ތަމްރީނު ޕްރޮގްރާމެއް ވަނީ ފަށާފައި
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު
މޯލްޑިވްސް ކަރެކްޝަނަލް ސަރވިސްއަށް މިއަދު ކުރިމަތިވެފައިވާ އެންމެ ބޮޑު ގޮންޖެހުމަކީ މުވައްޒަފުންގެ ދަތިކަން ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު ވިދާޅުވެއްޖެއެވެ.
ސީޕީ މިފަދައިން ވިދާޅުވީ މޯލްޑިވްސް ކަރެކްޝަނަލް ސަރވިސް (އެމްސީއެސް) އިން މުވައްޒަފުންނާއި އޮފިސަރުންގެ ތެރެއިން އެކި ދާއިރާތަކުން ކިޔަވައިދިނުމުގައި ހަރަކާތްތެރިވާ މުދައްރިބުންނަށް އެ ފަރާތްތަކުގެ ކިޔަވައިދިނުމުގެ ހުނަރު އިތުރަށް ތަރައްޤީ ކުރުމުގެ ގޮތުން، “އިންސްޓްރަކްޓަރ ޓްރޭނިން ޕްރޮގްރާމް” އިފްތިތާހުކޮށްދެއްވައި ދެއްކެވި ވާހަކަފުޅުގައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ސީޕީ ވިދާޅުވީ އެމްސީއެސްއާ އަލަށް ގުޅޭ ފަރާތްތައް ތަމްރީންކުރުމަށްޓަކައި ތަމްރީންވާ އޮފިސަރުންނަށް ހަވާލު ކުރެވެނީ ވަރަށް މަތިވެރި އަމާނާތަކާއި މަސައްކަތެއް ކަމަށެވެ. މިއަދު މޯލްޑިވްސް ކަރެކްޝަނަލް ސަރވިސްއަށް ކުރިމަތިވެފައިވާ އެންމެ ބޮޑު ގޮންޖެހުމަކީ މުވައްޒަފުންގެ ދަތިކަން ކަމަށް ޤަބޫލުފުޅު ކުރައްވާކަން ފާހަގަކުރައްވައި، ކޮމިޝަނަރު ވިދާޅުވީ ރަނގަޅު، ޕްރޮފެޝަނަލް ވޯކް ފޯސްއެއް ބިނާ ކުރުމަކީ ދިމާވާ ގިނަ ގޮންޖެހުންތަކުން އަރައިގަނެވޭނެ ކަމެއް ކަމަށެވެ. މިކަން ރަނގަޅުކުރުމަށްޓަކައި އައިކޯސްޓްގެ ވިސްނުމާއި އެހީތެރިކަމާއެކު އިންސްޓްރަކްޓަރުންގެ ކޯހެއް ފަރުމާކުރެވި، މި ފެށުނު ކޯހުގެ ބައިވެރިންނަކީ އައިކޯސްޓްއިން އޮފިސަރުންގެ ތެރެއިން ފާހަގަކޮށްލެވިގެން ހޮވާލެވުނު އޮފިސަރުން ކަމުގައި ވިދާޅުވިއެވެ. އަދި އެކަމަށްޓަކައި ފަޚުރުވެރި ވާންޖެހޭކަމަށް ވެސް ކޮމިޝަނަރ ވިދާޅުވިއެވެ. އަދި މި ތަމްރީން ޕްރޮގްރާމްއިން ދަސްވާ އެއްޗެހީގެ ޢަލީގައި ކުރިއަށް އޮތްތާނގައި ތަމްރީންކުރާ އޮފިސަރުންނަކީ ވީހާވެސް ޕްރޮފެޝަނަލް އަދި ޤާބިލު ބަޔަކަށް ހެދުމަށް މަސައްކަތް ކުރަމުންދާނެކަމަށް ޢުންމީދުކުރައްވާކަމަށް ސީޕީ ވިދާޅުވިއެވެ.
އިންސްޓިޓިއުޓް ފޮރ ކަރެކްޝަނަލް ސްޓަޑީޒް އިން ރާވާ އަދި ކުރިއަށްގެންދާ މި ޕްރޮގްރާމްގެ މުއްދަތަކީ 15 ދުވަހެވެ. މިއީ މި ޕްރޮގްރާމްގެ ފުރަތަމަ ބެޗެވެ. މި ޕްރޮގްރާމްގެ މަޤްޞަދަކީ ޕްރިޒަން އޮފިސަރުން، އެމީހަކާއި ގުޅޭ ދާއިރާއަކުން ނުވަތަ އެނޫންވެސް ދާއިރާއަކުން އެމީހަކު ދަސްކޮށްފައިވާ ޢިލްމާއި ފަންނީ ހުނަރެއް އެހެންބަޔަކަށް އުނގަންނައިދިނުމުގެ ހުނަރާއި ޤާބިލްކަން ލިބިދިނުމާއި މިރޮނގުން ހުނަރުވެރި މުދައްރިބަކު އުފެއްދުމެވެ.
މި ޕްރޮގްރާމްގެ ބައިވެރިންނަށް މެނޭޖިން އޮފިސަރސް ޕަރފޯމަންސް، ލެސަން ޕްލޭން، ފިޒިކަލް ޓްރެއިނިން، ސްވިމިން، ރިސްކް މެނޭޖްމަންޓް، ކްލާސްރޫމް މެނޭޖްމަންޓް، ފުޓް ޑްރިލް، އޮބްޖެކްޓިވް ރައިޓިން، ފަސްޓް އެއިޑް އަދި ޓީޗިން ޕްރެކްޓިސް ފަދަ މުހިންމު މޮޑިއުލްތައް ކިޔަވައިދިނުމަށް ވަނީ ހަމަޖެހިފައެވެ.
